NDUMBA 15 - Boy Lonana

Puura ma lam u mbulna u fuɗta u sum veŋŋa mayna

¹ Yawe di Moiz ana,

² «Aŋ di suu Israelna ana, hu li ma agi tew hu mbassa agi min ziigira hura wa ni, mbassa an min a ɦagirara.

³ Lini agi a li ɓivun ma ti jivina maŋ Yawe, ɓivun ma ŋgalam kina ɗowba ɓivun ma u yoori suu ŋgolona u suu gorina lay, lini ɓivun ma sa yi va kam yi kala, ɓivun ma sana gaɗ a lam u min mamba ɦawa na kala, ɗowba hu buu ma luuna kala agi min li ɓivunna u mbutl ɗowba u timii ɗowba u ɦu lay maŋ Yawe ni an hin hum his ma jivi namma.

⁴ Sa ma min a li ɓivun namma maŋ Yawe hin li puura u ŋgaf wana lay, nam yow fuɗta ay hu ii kelew hindi, yarsaɗ ki u mbulna litir dew u nus.

⁵ Ɓivun ma ŋgalam kina ma lam u goo timiina ni tli sum veŋŋa litir dew u nus may.

⁶ «Lini a li ɓivunna ni u gamla timiina ni a li puura aŋ yow fuɗta ii kelewna karkiya, larsaɗ u mbulna ii litir mba may.

⁷ Vo sum veŋŋa hu litir mba' may, ni ɓivun ma his jivi ii Yawena.

⁸ «Lini aŋ a li ɓivun ma ŋgal kina ɗowba ɓivun ma ɦawana maŋ Yawe u bol mbutlna, a faɗ vun dlara aŋ yi va kaŋ ɗowba a li ɓivun ma heɓpa ni,

⁹ a li puura a taɓ u namma aŋ yow fuɗta ay hu ii kelewna dleeŋe may, larsaɗ u mbulna ii litir hindi may.

¹⁰ Aŋ vo sum veŋŋa ay litir hindi may a li ɓivun ma his jivina maŋ Yawera.

¹¹ «Hin li u mbutlna, u gamla timiina, u goo timiina, u ɦura ni ko ndaɗta na lay.

¹² Lini agi li ɓivunna u yoorina asi bolow coco lay, lagi ki kasi na dew dew halaŋ, lini asi bolow lay.

¹³ Gegelay ma Israel ma min a li ɓivun ma jivi ii Yawena mba li ni ko ndaɗta na.

¹⁴ Lini ŋgay ma ki cuki dukugi day dayna, nam li min a li ɓivun ma his jivina maŋ Yawe ni, nam mba lini ko agi suu Israelna lira na may.

¹⁵ Agi ni suu taɓi dewna, dlaagira mba lini fun taɗ dew, suu cuki dukugina mba lini ko agi na may, ɓivun namma ni ma ka a hin kiɗina, agi lam ha fok Yawe ni na gak gak kagi agi lay kay ŋgayagi suu cuki dukugina lay basara u basara.

¹⁶ Gaɗta li dukugi ni dew, dlara agi laɗta vunugi vii kaɗ ni dew may, kagi lay kay ŋgayagi suu cuki dukugina lay.»

Ҥal yam fu ma gam jewna ki maŋ Yawe

¹⁷ Yawe di Moiz ana,

¹⁸ «Aŋ tuɗ di suu Israelna ana, hu li ma agi cuk hu mbassa an min a ɦagirara wa ni,

¹⁹ Agi a ti fu ma hu mbas ndaɗtana ni ɦam yam ki maŋ Yawe.

²⁰ Ko ndal fu ma agi gam ay ki fok jewna na, agi ɦam yam ki maŋ Yawe, agi ɦal yam funa ki ni ko ndal agi ɦal yam wa ma agi feɗem vona na may.

²¹ Fu ma agi gam ay ki fok jewna ɦam yam ki maŋ Yawe, basara u basara.»

Ɓivun ma lam kay cora paɗ koŋ paɗira

²² Lini aŋ wi kaɗi koŋ paɗ ɓalak gaɗta Yawe daɗ ka maŋ Moizza wa ni,

²³ tlesuu Yawe dasi ay fun Moiz doorogi ki kasina halaŋ, col ay hu buu ma nam di gaɗ ndaɗta day, ta ta basara u basara.

²⁴ Lini co ndaɗta li wa ko suu tokkina halaŋ asi waɗ kaɗi ni, suu tokka halaŋ li ɓivun ma ŋgalam kina maŋ Yawe u bolo mbutlna, li puura his jivina u sum veŋŋa ko gaɗta dira na, hin vi ŋgekŋa a li ɓivun ma bulum cora kina may.

²⁵ Mul ma li ɓivunna li ɓivun ma bulum cora kina ki kay suu Israelna halaŋ, ni coosira ndaɗta hin bulum ki may, kay ana co ndaɗta paɗ kosi ni paɗi ɦawaa, asi mbaa ɓivun masi ma his jivina maŋ Yawe wa, u ɓivun ma asi lam a bulum cora kina lay.

²⁶ Cora vi suu Israelna halaŋ hin bulum kiyo, u cora vi ŋgayagi suu cuki dukusina lay, kay ana suuna halaŋŋi cuki hu cora paɗ kosi asi waɗ kiɗi ndaɗta.

²⁷ Lini sa ma dewna li co ndaɗta ni namu ni, nam vi ɦu mayra basaɗaɗ dewra mba li ɓivunna kay coomba u ndaɗu.

²⁸ Mul ma li ɓivunna lam ɓivun ma mbus cora kina kam fok Yawe kay cora paɗ kom ndaɗta, nam li ɓivunna kay sa namma wa ni coom ndaɗta hin bulum kiyo.

²⁹ Gaɗta kay cora ndaɗta ni kay suuna halaŋ, lini sa ma Israelna ɗowba ŋgay ma cuki dukusina lay, kay sa ma cora paɗ komma gegelay.

³⁰ Na may sa ma li cora ndaɗta u min mambana, lini sa ma Israelna ɗowba ŋgay ma cuki dukusina lay, ni sa namma ka duk suu mamsina oloɗi, kay nam ŋgul ni Yawe.

³¹ Kay ana nam hum ka u boy ma vi Yawenaɗi, ŋgelem vun gaɗ mamba, sa namma ni cam kiyo, coom ndaɗta ni kay yam tamu.

Gaɗta kay sa ma ɓalak buu ma vi Lonna

³² Hu li ma suu Israelna ay ŋgoo bagi hu fullana, asi fi sa ma dew ay ŋgoo njun guna hu buu ma vi Lonna.

³³ Suu fam ay asina tlam ay mbaaram ay fok Moiz u Aaron u suu tokkina halaŋ.

³⁴ Asi vi sa namma golom jiviya, kay asi ka wi dlara hin a lamba kamba tuɗi.

³⁵ Yawe di Moiz ana, «Sa namma hin cam ki ni ciya, suu tokka halaŋ gikim ki u gogoyra ha ki doŋ kaana.»

³⁶ Suu tokka vam tuɗum ha ki doŋ kaana, gikim ki u gogoyra cam kiyo. Yawe ɦal voɗ ndaɗta maŋ Moiz na ni namu.

Vun baraw ma ɦosi luy luyna

³⁷ Yawe di Moiz ana,

³⁸ «Aŋ tuɗ ɓak suu Israelna dasi ana asi li vun baraw masisina ɦosom ki na luy luy, dla ndaɗta hin ka ni kay njaf suu hin mbay daganna, a asi cil baraw dlemba haɓpa fun barawna na cutl.

³⁹ Vun baraw ma ɦosi luy luy namma ni a gagi humugi kay gaɗta vi Yawera, a agi li uɗta, hu li ma agi wi vun baraw magina na ni agi lak ɗegee ka ɓalak gaɗta oloɗi.

⁴⁰ Ni agi hin saa kay gaɗ manda a li uɗ tew tew, agi hin mbuɗ ki teteɗ fok Loogina may.

⁴¹ Anni Yawe Loogina, ma cukugi ay ki hu mbassa Egipterana, a an hin ki ni a Loogina, anni Yawe Loogina.»