NDUMBA 14 - Boy Lonana

Suu Israelna ka min a tuɗ fok oloɗi

¹ Suuna halaŋ taɓ vunsi dew tum soora, suu Israelna halaŋ buu njeŋge ndaɗta ni u tiina.

² Suu Israelna halaŋ gurni kay gi Moiz u Aaron suu Israelna u dlasi halaŋ mba dasi ana, «Ҥaya lini ami miɗ ha ni hu Egipte ni mariyaɗ, ɗowba lini ami miɗimi ni ŋgoo bagi tani ni irimi mariyaɗ.

³ Yawe min a tuɗumi hu mbassa a suuna cami kira ni kay mege? Boyogomi u goryomi suuna hin yowosi ki mbaɓura, mariyaɗa ni ka hoŋoygi hu Egipteɗi su?»

⁴ Asi ɓak duk tasi ana, «Manaygi sa fokoygi dew ni ɦoŋoygi hu Egipte.»

⁵ Moiz u Aaron kulup vogosi ga duk ndaŋgara fok suu Israelna halaŋ suu tokkina.

⁶ Josuwe ma goŋ Nunna u Kaleb ma goŋ Yefunna suu gol mbas ndaɗta ay u irisina, haa baraw masisina kiyo.

⁷ Asi di suu Israel suu tokkina ana, «Mbassa ami goloɗ ay ndaɗta ni mbassa jivi cocoo,

⁸ Lini Yawe waygi hahawaygi wa ni nam hin tiniygi hu mbas ndaɗta, nam hin ɦaygira, mbas mayra law mbul yumma u mbiira.

⁹ Lagi yara u Yawe na ɗowɗi, lagi ndaa ko suu hu mbas ndaɗtanaɗi lay. Suu asina hin laygi tina ni asiya, asi ki ni ii faɗta, li ma asi a ŋgay hurum kaɗi. Yawe ka u aygiya, lagisina ndaarasiɗi.»

Moiz cen Lona kay suu Israelna

¹⁰ Suu Israel suu tokkina hal a gikisi u gogoyra, may ni bibiŋilla vi Yawera tak taɗ ay ki kolo kay yam zira tokka.

¹¹ Yawe ɓak u Moiz di ana, «Suu asina panan na gak gakŋi kay mege? Asi ka min a hum unɗi ni kay mege? Dlara an takaɗ ki dukusira halaŋ asi ka vi taa na dewɗi su?

¹² An min gasi tuguɗii bora kasiya kaɗakasi ki hu jo namma. Aŋ taŋga may ni an hin mbuɗuŋ njafaŋ ŋgolla, saɓak coco su asi suu wanna lay.»

¹³ Moiz di Yawe ana, «Suu Egiptena wi ki ana saɓak maŋŋa buɗusi suu asina ay ki varsi ni namu.

¹⁴ Asi di boy namma ha ki maŋ suu hu mbassa Kanaanda, asi ha ki humi ana aŋ Yawe ka u amiya, aŋ ka tak taŋ ki ii suuna hu ɗugulla. Faali ni aŋ kuluɓumi ɗugulla kamiya, njeŋge ni aŋ ka tuɗ fokomi u kura.

¹⁵ Aŋ hin ci suu asina ki halaŋ ko sa ma dewna ɦawa na, suu may suu humuŋ seŋ tii ki cocona hin di ana,

¹⁶ Yawe ka ndaki a cuk suu mamsina hu mbassa nam vi vunum kaɗ a ɦasiraraɗi. Kay ndaɗta nam casi ki ŋgoo bagi halaŋŋi na.

¹⁷ Cemi ni an ceneŋu, Bu Suuna, hin saɓak maŋŋa liya, ko aŋ di ki fok jewra na.

¹⁸ Anni Yawe, hurun ka ɓeŋ zakgi, hurun oyra u ɗegeera, an siɓ dla cora suuna laɗta, ta ka jak ki kan bay an waɗɗi, an tin cora vi somora ki kay goryosiya kay goŋ ŋgologina lay ha kay njafasi fokosi na gak gak hindi lay, fiɗi lay.

¹⁹ Heɓ huruŋ ki eg suu asina u min maŋga ŋgolla, ko aŋ heɓ huruŋ ay ki egesi hu mbassa Egiptera ta ta mbaarasi ki tani wanda na may.»

Suuna hin poy ŋgoo bagiya busaɗta dok-fiɗi

²⁰ Yawe hoŋ dira ana, «An hinisi wa ko aŋ cenenda na may.

²¹ Na may ko an ka iiri tew tewra na, bibiŋil Yawera oy ki kay yam ndaŋgara halaŋ,

²² duk suu asina halaŋ suu wan ŋgol manda ki u irisina, wi dlara mbuɗ mbuɗta an laɗ ay hu Egiptera lay, u dlara an laɗ aya ŋgoo bagira lay, asi hin li dlara a tukunda ki yasi ca ni doogo, ka min a humun vununɗi,

²³ duk suu asina halaŋ an suu tan kiyo sa ma wi mbassa an vi vunum kaɗ a ɦasira maŋ somoyosira kaɗi, suu van vunun kaɗina sa dew lay ni ka wi mbas ndaɗtaɗi.

²⁴ Na may saan ma sunda Kaleb ma fi saara daŋga, tuɗ u gaɗ manda mbuɗ ndaa kaɗi, an hin tinim hu mbassa nam goloɗ ay ndaɗta. Njaf mamma halaŋ hin cuk ziisi huwa.

²⁵ Cemmi ni njaf suu Amalekŋa u Kanaanna ki cuki hu mbas ndaɗta. Vin maɗii gaw ni agi hoŋogi ŋgoo bagiya, tuɗugi ha fun Lum ma Cerewna na.»

Yawe kaɓakŋa kay suu Israelna

²⁶ Yawe di gi Moiz u Aaron ana,

²⁷ «Suu co asina hin a hin ŋgulla ŋgulunda ki ni saɓage? An hum gurnira asi gurni u senda wa.

²⁸ Dasi ana, an suu tan u tanda ana, an ka iiri tew tew, ni boy ma Yawe damma, an hin kaagi ɓakŋa kagi ni ko va ma an hum vunugi damma na may.

²⁹ Agi suu may suu ndumugi basaɗagi tew ki dok-mbana halaŋ hin miɗ ki ni ŋgoo bagi tani, maɗagi hin pi ni ŋgooro, agi suu gurni u senna halaŋ.

³⁰ An yi va ki kan ana agi ka hin cuk hu mbassa an vi vunum kad a ɦaɗ maŋ somoyogiraɗi, suu hin cuk huna ni Kaleb ma goŋ Yefunna u Josuwe ma goŋ Nunna doy hol.

³¹ Goryogi suu agi di kasi ana suu asina hin yowosi kiyo na hin cuk hu ni asiya, asi hin wi mbas mayra agi miniɗ kaɗira.

³² Agi tagira may ni ɦaragi hin pi ni ŋgoo bagi tani.

³³ Goryogi hin a suu taa yoorina ki ŋgoo bagina ta ta basara dok-fiɗi. Asi zii ni nek bay viigira, ta ta hu li ma agi daɓ ki miɗna ŋgoo bagina tuwa.

³⁴ Ko agi tuɗ a gol mbassa li buuna ay dok-fiɗi, ko ndaɗta na may agi hin li basara ŋgoo bagi ni dok-fiɗi may. Buuna dew ni basa dew may, ni a zii coogira agi laɗta, agi hin wi ki ana an ma ka mbuɗɗina li ni na.

³⁵ An, Yawe, di ni an daŋ may. An suu tan kiyo, min a li suu co asina ni na. Asi suu taɓ tasi a duu u anna. Asi hin daɓ ki ŋgoo bagi ni halaŋ, miɗ ni hu li namma.»

³⁶ Suu may suu Moiz cukusi a gol mbassa ayna, hu li ma asi hoŋ ayna mba ɓeŋ huu suuna ki u njaɗ masira cora, mbuɗ suuna a gurni u namu,

³⁷ suu asina hin miɗ ni miɗ ma dlam cona fok Yawe.

³⁸ Josuwe ma goŋ Nunna u Kaleb ma goŋ Yefunna hin hin iiri duk suu sunusi ay asina ni asi hol.

Suu Israelna ŋgel vun gaɗta olo

³⁹ Moiz cuɗ boy ma Yawe damma ayna ki maŋ suu Israelna halaŋ, suuna halaŋ mbuɗ ki hahaw cocoo.

⁴⁰ Vin maɗii feɗet ni asi ful kolo kay ɦinira di ana, «Ami min tuɗ hu zi ma Yawe di kamma, ami wi gasi ana ami li coo.»

⁴¹ Moiz dasi ana, «Agi lagi ni mege? Agi ŋgel gaɗta vi Yawera ni agi ka ndakgi.

⁴² Tuɗugi koloɗi kay Yawe ka u agiɗi, tuɗugi a suu babali magisina cagi ay ki ɦawaɗi.

⁴³ Suu Amalekŋa u suu Kanaanna ka moli fokogiya, agi hin cukŋi ga fokosiya kay ana agi humum vunum kaɗi, Yawe ka hin li u agiɗi.»

⁴⁴ Na may asi hum kaɗi, ɗiŋ kolo u saɓakŋa na may Zandukka Galamba vi Lonara u Moiz tamba lay sa tuɗ ka usiɗi.

⁴⁵ Suu Amalekŋa u suu Kanaanna suu cuki kay ɦini ndaɗtana cuk ay ki ga ŋgafasi casi ta ta mba tinisi ki hu mbassa Hormonda.