NDUMBA 13 - Boy Lonana

Moiz sun suu cekeɗta 12 a gol mbassa Kanaanda

¹ Yawe di Moiz ana,

² «Cuk suuna asi tuɗ gol mbassa Kanaanda aya, mbassa an ɦaɗ maŋ suu Israelnara, agi sun suuna ki ni u njafasi dew dew halaŋ, gegelay ni tuɗ kay sem somoyomu, aŋ hin manni duk suu ŋgolo suu fok suu Israelnana.»

³ Ay ŋgoo bagi hu mbassa Paranda Moiz sun suuna u dira vi Yawera may, suu asina halaŋŋi suu ŋgolo suu fok suu Israelna.

⁴ Gola ni sem suu asina, njaf ma vi Rubenna ni Samua ma goŋ Zakurna.

⁵ Njaf ma vi Simeonna ni Safat ma goŋ Horina.

⁶ Njaf ma vi Yudana ni Kaleb ma goŋ Yefunena.

⁷ Njaf ma vi Isakarna ni Igal ma goŋ Josefna.

⁸ Njaf ma vi Efrayimma ni Hosea ma goŋ Nunna.

⁹ Njaf ma vi Benjaminna ni Palti ma goŋ Rafuna.

¹⁰ Njaf ma vi Zabulonna ni Gadiyel ma goŋ Sodina.

¹¹ Njaf ma vi Yosefna, njaf Manase ni Gadi ma goŋ Susi.

¹² Njaf ma vi Danna ni Amiyel ma goŋ Gemalina.

¹³ Njaf ma vi Aserna ni Setur ma goŋ Mikaelna.

¹⁴ Njaf ma vi Neftalina ni Nabi ma goŋ Vofsina.

¹⁵ Njaf ma vi Gadna ni Guel ma goŋ Makina.

¹⁶ Ni sem suu Moiz sunsi a tuɗ gol mbassa Kanaanda asina. Hosea ma goŋ Nunna, nam jokom sem ki ana Josuwe.

¹⁷ Moiz sunusi a tuɗ cekeɗ mbassa Kanaanda, «Tuɗugi tlagi ha kolo hu Negeb na, agi ɗiŋigi ha kay ɦinira na.

¹⁸ Agi gologi mbassa ay ki jiviya, suu cuki huruɗna li saɓak kala, maŋi kala, lini suuna ka hu ŋgolɗi kala, li huruɗ zuli kala.

¹⁹ Agi hin wi lay mbassa asi cuki huruɗ ndaɗta li jivi kala, co kala, zi ma asi cuki huna li mini eŋ coco kala, li fet ɦawa kala.

²⁰ Agi wi lay ana mbas ndaɗta li jiv tlena kala, ka jiv vaɗi kala, gugunina hu kala, ka huɗi kala, lagi jiviya, yowogi vuɗ tlesuu hu mbas ndaɗta ay kogiya.» Ni hu til ma duɗ gugutlu ma ne ki fok jewna kina may.

²¹ Asi taɓa ɦinira tuɗ gol mbassa ta ta tew ay ki ŋgoo bagi hu mbassa Sinda, tuɗ Rehob ta ta hu voɗta Lebo Hamatta.

²² Asi kal ay kolo Negeb na mbay ta ta hu Hebron, ni li ma Ahiman, Sesay u Talmay njaf suu yasi ana Anakŋa suu wuli fiyeki cocona. Hebron min zi namma ni basara kiɗisiya jew Tanis ta Egiptera.

²³ Asi tuɗ ta ta mba tew hu ɦuɗugumba Esekol, ni hu li ma asi ŋgaɗ vuɗ gugutlura ay kosina, karak vuɗ tenena ay kosi may, asi ziirisi ay ni ganasi duk tasi u tokolora asi mba' mba'. Asi duɗ vuɗ gu ma yam ana grenadna u vuɗ tulumma ay kosi hu may.

²⁴ Asi yi li namma ana ɦuɗugumba vi Esekolla, ni ɦuɗugumba vuɗ gugutlura hu cocora, ni kay vuɗ gugutlu ma asi suu Israelna ŋgaɗam ay kasina.

Suu cekeɗta hoŋ aya

²⁵ Asi hoŋ ay vo hu li ma asi ay gol mbassana ni li buuna ay ni dok-fiɗi.

²⁶ Asi mba fi gi Moiz u Aaron u suu Israelna halaŋŋi hu mbassa Paranda ni hu li ma yam ana Kades, asi mba cuɗusi vun koyra u suu Israelna toki hu halaŋ, takasi vuɗ tlesuu asi duɗusi ay kosi hu mbas ndaɗtana may.

²⁷ Asi cuɗ dla ndaɗta maŋ Moiz ana, «Ami tuɗ ay hu mbassa aŋ sunumi ha hura wa, mbas ndaɗta jivi cocoo, ni mbassa li gi mbul yumma u mbiira, gola ni vuɗ tlesuu ay huna.

²⁸ Na may ni suu cuki hu mbas ndaɗtana saɓak cocoo. Ҥoŋzina mini eŋ coco u tlesuu duuna. Ami wi njaf suu vi Anakŋa ay lay.

²⁹ Suu Amalekŋa cuki ni hu mbassa Negebpa. Suu Hetna, suu Jubusna u suu Amorna cuki ni kay ɦinira, suu Kanaanna cuki eg mbo lum ŋgolna na tok may, fun mbo lum ma Yurdanna na.»

³⁰ Kaleb seŋ vun suu gurni eg Moizna dasi ana, «Tuɗuygiya, tlaygi mbassa, aygi ndak a su kasi ni ɦawaa.»

³¹ May ni suu tuɗ ay u tasi u nam tokŋa di ana, «Aygi ka ndak a duu u suu asinaɗi, kay asi saɓak coco suygiya.»

³² Asi gijaŋ cuɗ dla mbassa asi goloɗ ayra ki fok suu Israelna halaŋ ana, «Mbassa ami goloɗ ay ndaɗta ni mbas mayra kom suu huruɗna kira, suu cuki hu suu ami wasi ay wanna wuli feyeki cocoo.

³³ Ami wi suu fiyeki coco asina aya, ni goryoŋ Anakŋa ni njaf suu wul fiyekina. Aygi col fokosi ni ko ndal baarina ɦawa na, asi tasira goloygi ni ko ndal baarina na daŋ may.»