NDUMBA 12 - Boy Lonana

Tuguɗii busuna cuk ki eg Miriyam

¹ Miriyam u Aaron tum u Moiz kay nam ɗum goora Kusira, nam vi goo ndaɗta umu.

² Asi di ana, «Yawe ɓak boyna ni maŋ Moiz na dew su? Nam ɓakami mami ami layɗi su?» Yawe hum boy namma.

³ Moiz ni sa ma lalam cocoo, sa ma ŋga u nam kay ndaŋgara ni kaɗi.

⁴ Na gaw ni Yawe di Moiz, Aaron u Miriyam ana, «Agi hindi halaŋ tuɗugi hu Mbutluɓ ma Tokkana.» Asi tuɗ hu hindi halaŋ may.

⁵ Yawe cuk ay ga duk ɗugulla mba col fun Mbutluɓ ma Tokkana. Nam yi gi Aaron u Miriyam. Asi jak ɦuɗ tasi ay fokomu.

⁶ Nam di ana, «Humun ki boy manna ha daŋ, lini sa ma jok vun Lona ka dukugiya ni an Yawe tak tan irimmi hu doyra ɦawaa. An njaɗ u nammi hu doyra.

⁷ Na may saan ma sunda Moiz dlaamba li ni ka naɗi. Nammi sa ma an ɦam hurun ki halaŋ kay suu man suu Israelnana.

⁸ An ɓakam ay ni u delen tanda olo ni an tak tan ki irimu, an ɓakam ka u boy ma ŋgayɗi. Nam wi ta Yawe ki u irimu. Ni nanaba agi ndak a tum u saan ma sunda Moiz nege?»

⁹ Yawe hurum ɓeŋ egesiya, hoŋ dagan ni na gaw.

¹⁰ Ɗugulla valaw ki kay Mbutluɓ ma Tokkana ni na gaw. Gola ni Miriyam busuna waraɗ ni na ɦuu gaw, taɗ mbuɗ ki haɓpa ko fuɗ barawra na, Aaron pereɗ irim goloɗ na ni, ndaɗ ki u tuguɗii ndondona.

¹¹ Nam di Moiz ana, «Ҥii, malanna, an ceneŋu, hinimi a dla coomira ami laɗ ii bay wirara hoŋ kamiɗi, ami ni suu cona daŋ may.

¹² Yaya, ka Miriyam mbuɗ ki ko gor kemba vuɗ ay ki miɗi paŋga naɗi, tliwiɗ ma ɦiw ki ni komi da, hu li ma ndaɗ kal ay ki huu suɗ na.»

¹³ Moiz tii eg Yawe ana, «Ҥii, Lona, aŋ garaɗaɗ ki na garaɗ ge.»

¹⁴ Yawe di Moiz ana, «Lini buɗ tofoɗ yoyona iriɗu ni ndaɗ ka kak hu li ma zolona ta ta buuna kiɗisiyaɗi su? Dikiɗ ha ki hu kaŋŋa ta ta buu kiɗisiya, ŋgoo dagan ndaɗ hin hoŋ ay hu liiɗna tuwa.»

¹⁵ Asi dik Miriyam ki hu kaŋŋa ta ta buuna kiɗisiya, suuna ka jok usi tuɗi ta ta ndaɗ garaɗ ki tuwa.

¹⁶ Ŋgoo dagan suu Israelna hin Haserot ki ta ni tuɗ cuk ha ki hu Paran.