NDUMBA 11 - Boy Lonana

Suu Israelna hu li ma Tabeerana

¹ Fali taa dew ni suuna gijaŋ gurniya. Yawe hum na ni hurum ɓeŋa. Boy namma ka irim jiviɗi. Yawe mbuɗ ki ya cocoo. Kura vi Yawera ŋgal suuna, ŋgal keŋ zi ma ki dew.

² Suuna tii eg Moiz, nam hin cen Yawe, kura hin heɓ gaa.

³ Asi hin tin sem li namma ana Tabeera, ma di ana kura ŋgala, kay ana kura vi Yawera ŋgal suu Israelna ki hu li namma.

Suu Israelna joɓ tliwna

⁴ Koyogi suu tuɗ ha duk suu Israelna, jenna lasiya. Asi gijaŋ yoo tasiya. Suu Israelna lay cuk tasi hu yoo ndaɗta, di ana, «Sa ma hin ɦaygi tliw ma komba ni gege?

⁵ Humuygi gaygi kay kuluf ma aygi komom ay ki Egipte ɦawana, aygi ti kusira, bubura, patlaw ŋgolona, pazaara u tumba ni bay gusa.

⁶ Cemi wanni va ka na ndeɗi, aygi ba ki ni baaya, irigi wi a va ma tira ni manna doy hol.»

⁷ Manna tli tammi ko ii va ma yam ana koriyandre haɓi.

⁸ Suuna njay kosi ki doŋ kaana a koomba, asi mba luɗum u ɦinira may, suu daŋŋa ɗuum u zuzura may. Asi yam funa nam ti ko ndal komnjoɗi ma gam u mbulna na.

⁹ Hu li ma mbaɗagira gi njeŋge kay ziisi na ni manna mbay duk gaw may.

¹⁰ Moiz huma ni suuna tiira gegelay u dee mamba ni tii laki fun ziisiya. Yawe hurum ɓeŋ ki u yara cocoo, Moiz hurum ɓeŋ ki cocoo lay.

¹¹ Moiz di Yawe ana, «Aŋ lan dla ndaɗta egen an saaŋ ma sunda na ni amege? Aŋ ka wan hahawan na wiɗi su, tinin nek suu asina kan na ni kay mege?

¹² Suu asina halaŋ an vuɗusi ni an su? An cukusi hu duliyara ni an su? A aŋ dan an koɗosi hurun ko cara vi goryoɗ huruɗta na ta ta tewesi ki hu ndaŋgara an vi vunun a ɦaɗ maŋ somoyosira ni nanage?

¹³ An fi tliw ma ɦam maŋ suu asina cocora na ni arage? Asi ka tuɗ un u tiina di ana, ɦami tliwna ami koma.

¹⁴ An u dew tanni ka ndak a zii suu asinaɗi, su ki kan nek cocoo.

¹⁵ Lini aŋ a lanni na ni mariyaɗ ni can kiyo. Lini aŋ wan hahawan wa ni, hinin a an zii dlara ɓeŋ huuna ko wanda naɗi.»

¹⁶ Yawe di Moiz ana, «Tokon suu ŋgolo suu Israelna ay egeŋ na dok-kiɗisiya, suu aŋ wi ana gasi asi ndaki suu ŋgolonana suu kaɓakŋa fok suuna. Aŋ mbaarasi ay fok Mbutluɓ ma Tokkana, asi mbay ko tasi u aŋu.

¹⁷ An hin mbay ga ɓakaŋu, an hin tli u musukka huruŋga nde kalasira hurusiya, asi hin zii nekka vi suuna ndaɗta u aŋ may, aŋ ka hin zii nek ndaɗta u dew taŋ oloɗi.

¹⁸ Suu halaŋŋa aŋ dasi ana, asi li tasi ki teteɗ kay vinda, lakagi ki jivi a kom tliwna, kay agi tuɗ tii magina eg Yawe wa. Sa ma ndak a ɦaygi tliw ma komba ni gege? Ay hu mbassa Egiptera ni aygi ay jivi cocoo, Yawe hin ɦagi tliwna ni namu, agi hin komomu.

¹⁹ Agi hin komommi ka buu dew hawaɗi, ka buu mba daŋgi, ka vadl ɦawaɗi, ka doogo daŋgi ɗowba dok-mba ɦawaɗi lay.

²⁰ Na may ta ta tilna dew, ta ta nam mbuɗ kal ay ki cinigiya, mbuɗ bisigi ki lay. Halaŋ ca ni kay agi noy Yawe ma ka dukugina kira, agi tii ana aygi cuk ay ki hu Egipte ni kay mege?»

²¹ Moiz hoŋ di ana, «Suu njufii suu tuɗ kay tasina ka u an ca ni na 600.000. Aŋ di ana asi hin kom tliwna ta ta tilna.

²² Lini ŋgaɗasi mbutlina u ɦugunina ki halaŋ lay ni ndakasi su? Lini ciwisi kuluf ma hu lum ŋgolnana ay ki na halaŋ lay ni nam ndak kasi su?»

²³ Yawe di Moiz ana, «Bikin an Yawe geɗeŋ su? Aŋ hin wi tuwa dlara an daɗta li hin li ɗowba ka liɗi.»

Suu ŋgolo suu dok-kiɗisiyana

²⁴ Moiz kal ay ki hu Mbutluɓ ma Tokkana, jok boy ma Yawe damma ayna ki maŋ suuna. Nam yow suu ŋgolona dok-kiɗisiya duk suuna, njarasi ki ŋguyra kay Mbutluɓ ma Tokkana na cutl.

²⁵ Yawe cuk ay ga hu ɗugulla ka ɓakamu, nam yow ki u musukka vi Moizza nde ɦaɗ ki huu suu ŋgolo suu dok-kiɗisiyana. Hu li ma musuk ndaɗta cuk kasi may ni, asi gijaŋ di dlara joɓpa gaw. Na may masira ka hin tuɗ ha fok gak gakgi.

²⁶ Suuna mba' hin ha laki hu kaŋŋa ma hiŋŋa yam ana Eldad, ma mbana yam ana Medad may, asi ni duk suu dok-kiɗisiyana, asi bay mbay ki eg suuna tu may ni, musukka cuk kasi gaw, asi gijaŋ di dlara jok vun Lona ha hu kaŋŋa gaw may.

²⁷ Goozoŋŋa dew liŋ ay mba jok boy namma maŋ Moiz ana, «Eldad u Medad ha di dlara jok vun Lona hu kaŋŋa.»

²⁸ Josuwe ma goŋ Nunna li sunda u Moiz ay ni u goo tam day di ana, «Moiz, saan ma ŋgolna, tuɗ doorosiya.»

²⁹ Moiz hoŋ dira ana, «Aŋ li honira ni egen su? Lini suu vi Yawena a mbuɗ ki suu jok vun Lona halaŋŋi suu may suu Yawe fo musuk mamba kasina.»

³⁰ Moiz u suu ŋgolo suu dok-kiɗisiyana hoŋ ha ki vo hu kaŋŋa.

Cekera cocoo

³¹ Yawe sun babaana ay col ay hu mbo lum ŋgolna na ɗow, babaana mbaa cekera ay cocoo, ndaɗ mba ŋguf ki kay yam kaŋŋa na cutl, col ha ŋgoo kaŋŋa uɗ tuɗ doo ko sana col tuɗ koyra hu buuna dewra na. Ndaɗ oy ki kay ndaŋgara wanni yam ndaŋgara ka wi kiɗi.

³² Suuna basa hee, buu tos, jak vinda huwa u sesi a ci cekera, sa ma yow buɓma ni sa yow kaɗina, asi mba cukuɗ ŋgoo kaŋŋa na tok tok.

³³ Tliwna funusi bay daɓ komma tu may ni Yawe hurum ɓeŋ egesiya, nam gasi tuguɗii bora kasiya.

³⁴ Asi tin sem li namma ana Kivrot-Taava ni ana us suu hurusi haɗ kay tlena kay asi pi suu may suu yoo tasi kay tliwnana ni hu li namma.

³⁵ Ay hu Kivrot-Taava ni suu Israel mbee ki tuɗ cuk ha ki hu Haserot, asi vi kaŋ masina ha ki hu li namma.