NDUMBA 10 - Boy Lonana

Tokolom doonora mba'

¹ Yawe ɓak u Moiz dam ana,

² «Dli tokolom doonora na mba', aŋ dlasini ɗaasi ki jiviya. Tokolom namma hin njun uŋ a yi suuna hu li ma agi a mbee kina.

³ Hu li ma asi bu tokolomma wa ni suuna halaŋ tok ay egeŋ fun Mbutluɓ ma Tokkana.

⁴ Lini sana bu ni tokolom ma dewna ni tok ay ni suu ŋgolo suu tini fok suu Israelnana doy hol.

⁵ Tokolomma bu wa ko ma duuna na ni suu ziisi vii u maɗiina nana cuk tasi jew ni asiya.

⁶ Lini tokolomma ɦoŋ bu wa a yamba mbara ni suu cuki dali nana cuk tasi ni asi may. Asi buusi tokolom ma duuna a asi cuk tasi tuɗtara may.

⁷ Na may a bu tokolom ma tok suuna ayna ni buum ha ni na gak gak, ka ko bu tokolom ma duuna naɗi.

⁸ Suu bu tokolom namma ni muli suu li ɓivunna, goryoŋ Aaronna. Gaɗ ndaɗta hin ha dukugi ni a fafaɗta kagi lay kay goryogi suu ka ŋgorogina lay.

⁹ Hu li ma agi tew ki hu mbas magira wa lini suu babali magisina mba halagiya, agi a tuɗ duu u asira ni yi tora duuna, buugi tokolomma may. Ni, an Yawe humun hin gan ay kagiya agi hin suɗ ki ko suu babali magisina.

¹⁰ Hu buu ma agi a li furira ko ndal luu ma vun tilna na, ɗowba luu ma daŋŋa, buugi tokolomma hu li ma agi a li ɓivun ma ŋgalam kina u ɓivun ma mbaa heɓpana. Ni, an humun hin gan kagiya. Anni Lona, Yawe magina.»

SUU VI ISRAELNA HIN SINAY KIYO, TU Ɗ II HAKARA MOABPA Suu Israelna hin mbassa Sinayra

¹¹ Hu basara mbara dagan basara suu Israelna cuk ay ki hu mbassa Egiptera, hu til ma mbana, hu buu ma dok-mbana ni ɗugulla ka ki kay Zira Galamba vi Lonara.

¹² Suu Israelna yow ay ŋgoo bagi hu mbassa Sinayra gegelay tuɗ ni u deeresiya deeresiya ko gaɗta dira na. Ɗugulla tuɗ col fokosi ŋgoo bagi hu mbassa Paranda.

¹³ Ni a sesi ma jewna suu Israelna jok usira, ni u gaɗta Yawe ɦasira ay fun Moizza.

¹⁴ Suu cuk tasi fok jewna ni njaf suu vi Yudana u suu duu masisina. Suu duu suu vi Yudana sa ŋgol ma fokosina ni Nason ma goŋ Aminadabma,

¹⁵ suu duu suu hu njaf ma vi Isakarna sa ma ŋgol ma fokosina ni Nataneyel ma goŋ Suwarna,

¹⁶ suu duu suu hu njaf Zabulonna sa ma ŋgol ma fokosina ni Eliyab ma goŋ Helonna.

¹⁷ Asi hawaɗ Ziŋ Lonara ki hawaɗ ni suu zii gu zi ndaɗtana ni goryoŋ Gersonna u goryoŋ Merarina, asi yow Ziŋ Lonara kasi ni asiya.

¹⁸ Suu hu njaf Rubenna cuk tasi u suu duu masisina, sa ŋgol ma fokosina ni Elissur ma goŋ Sedeurna.

¹⁹ Suu duu suu hu njaf Simeonna sa ŋgol ma fokosina ni Selumiyel ma goŋ Surisadayna.

²⁰ Suu duu suu hu njaf ma vi Gadna sa ŋgol ma fokosina ni Eliyasaf ma goŋ Dewelna.

²¹ Ŋgoo dagan suu vi Kehatna cuk tasiya, asi ni suu zii li ma teteɗna. Suu hiŋŋa pi Ziŋ Lonara ha ki jew bay asi fasi tu gaw.

²² Ŋgoo dagan suu hu njaf Efrayimma cuk tasi u suu duu masisina, sa ŋgol ma fokosina ni Elisama ma goŋ Amihudna.

²³ Suu duu suu hu njaf ma vi Manasena, sa ŋgol ma fokosina ni Gamaliyel ma goŋ Pedasurna.

²⁴ Suu duu suu hu njaf ma vi Benjaminna sa ma ŋgol fokosina ni Abidan ma goŋ Gidonina.

²⁵ Suu daɓ ha ŋgorosi daganna ni njaf suu vi Danna u suu duu masisina, sa ŋgol ma fokosina ni Ahiyezer ma goŋ Amisadayna.

²⁶ Suu duu suu hu njaf Aserna sa ŋgol ma fokosina ni Pagiyel ma goŋ Okranna.

²⁷ Suu duu suu hu njaf Neftalina sa ŋgol ma fokosina ni Ahira ma goŋ Enanna.

²⁸ Suu Israelna tuɗ u suu duu masisina ni u gaɗta dasi ana asi li nara, asi tuɗ ni na.

Moiz hal sa ma tuɗ fok suunana

²⁹ Moiz di tanamma Hobab, ma goŋ Rewelna, ma kunum ma Madiyanna ana «Ami tuɗ hu mbassa Yawe vi vunum kaɗ a ɦamirara, aŋ tuɗ ay umiya, ami min ɦaŋ jivi mayra Yawe vi vunum kaɗ a ɦaɗ maŋ suu Israelnara.»

³⁰ Hobab hoŋom dira ana, «An ka tuɗɗi, an hoŋŋi hu mbas manda duk somoyon na ɗow.»

³¹ Moiz hoŋ dam ana, «Noyomi kiɗi, aŋŋi sa ma wi li ma ami a cuk ŋgoo bagi huna, aŋ li ni a sa ma takami voɗta.

³² Lini aŋ tuɗ ay u ami wa ni jivira Yawe min a ɦamirara ni ami hin laŋ jivira may.»

³³ Asi yow ha u ɦinira vi Yawera, tuɗ ta ta buuna hindi, Zandukka Galamba vi Yawera ka tuɗ fokosi hu buu ma hindi namma may, a takasi li ma asi hin vi ziisi huna.

³⁴ Faali ni ɗugulla vi Yawera kuluɓ ki ŋgusna kasiya, ni hu li ma asi yow ha hin liisi ka kina gaw.

³⁵ Hu li ma Zandukka ka tuɗ na ni Moiz di ana, «Col koloo, Yawe, suu babali maŋsina hin njay kiyo, suu gonok maŋsina yow liŋŋa fokoŋu.»

³⁶ Hu li ma asi tin Zandukka ga wa ni Moiz di ana, «Yawe hoŋ ay duk suu maŋ suu Israel suu ka ndumɓina.»