NDUMBA 1 - Boy Lonana

SUU VI ISRAELNA LAK ŊGOO BAGI U ҤINIRA SINAYRA ISRAELNA AY ŊGOO BAGI KAY ҤINIRA SINAYRA Ndumba ndum suu Israelna jewra

¹ Gola hu basara mbara ŋgoo dagan hu li ma suu Israelna cuk ay ki hin Egiptena, hu til ma mbana hu buu ma jewna ni, Yawe ɓak u Moiz kalafi hu Mbutluɓ ma Tokkana dam ana,

² «Agi u Aaron ndum suu Israelna ki na halaŋ halaŋ, hu njafasi halaŋ, hu deeresi halaŋ, hu zina dew dew halaŋ. Ɓii sem njufiina ki dew dew halaŋ.

³ Col ha kay suu basaɗasi tew ki dok-mbana, tuɗ ha fok na, suu ki ndaki a yow kawi ma duuna kosina halaŋ, ndumusi ki hu li duuna halaŋ, agi u Aaron.

⁴ Agi ndum na ni yagi suuna ay egegi dew dew hu njaf suu Israelna halaŋ, ni sa ma hin li a mulna kay suu mamsinana.

⁵ Gola ni sem suu hin lak egegina. Hu njaf Rubenni Elisur ma goŋ Sedeurna.

⁶ Hu njaf Simeonni Selumiyel ma goŋ Surisadayna.

⁷ Hu njaf Yuda ni Nason ma goŋ Aminadabma.

⁸ Hu njaf Isakar ni Nataneyel ma goŋ Suwarna.

⁹ Hu njaf Zabulonni Eliyab ma goŋ Helonna.

¹⁰ Hu njaf goryoŋ Yosefna ni njaf Efrayimmi Elisama ma goŋ Amihudna. Hu njaf Manase ni Gamaliyel ma goŋ Pedassurna.

¹¹ Hu njaf Benjaminni Abidan ma goŋ Gidonina.

¹² Hu njaf Danni Ahiyezer ma goŋ Amisadayna.

¹³ Hu njaf Aser ni Pagiyel ma goŋ Okranna.

¹⁴ Hu njaf Gad ni Eliyassaf ma goŋ Deuelna.

¹⁵ Hu njaf Neftali ni Ahira ma goŋ Enanna.»

¹⁶ Gola ni ndum suu yasi ay ki a mulina fok suu masisina na, asi ni a mulina kay njaf suu bolow suu Israelna halaŋ.

¹⁷ Moiz u Aaron yow suu manasi ki asina egesi a suu njunusina.

¹⁸ Asi tok suu Israelna egesi halaŋ hu buu ma jewna hu til ma mbana. Suu Israelna col ha kay basara dok-mba' tuɗ ha fok na ni asi ɓiirisi sesi ki dew dew halaŋ halaŋ, ki u deeresi halaŋ, ki hu ziisi dew dew bel, asi ndumusi kiyo, col ha kay suu basaɗasi ki dok-mbana hin tuɗ ha fok na.

¹⁹ Moiz ndumusi ay ni ŋgoo bagi u ɦinira Sinayra ko Yawe damba na.

²⁰ Kay njaf Ruben ma goŋ Israel ma ŋgolna, ndumusi hu deeresi u ziisi halaŋ, ndum suuna ki dew dew bel col ha kay suu basaɗasi dok-mbana tuɗ ha fok na, ndum suu may suu ndak ki a yow kawi ma duuna kosina halaŋ.

²¹ Ndum suu hu njaf Rubenna halaŋ li ni 46,500.

²² Kay njaf suu vi Simeonna ndumusi hu deeresi u ziisi halaŋ, ndum suuna ki dew dew bel col ha kay suu basaɗasi dok-mbana tuɗ ha fok na, suu may suu ndak ki a yow kawi ma duuna kosina halaŋ.

²³ Ndum suu hu njaf Simeonna halaŋ li ni 59,300.

²⁴ Kay njaf suu vi Gadna ndumusi hu deeresi halaŋ hu ziisi halaŋ, ndum suuna ki dew dew bel col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

²⁵ Ndum suu hu njaf Gadna halaŋ li ni 45,650.

²⁶ Kay njaf suu vi Yudana ndumusi hu deeresi halaŋ, hu ziisi halaŋ, ndum suuna ki dew dew bel col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

²⁷ Ndum suu hu njaf Yudana halaŋ li ni 74,600.

²⁸ Kay njaf suu vi Isakarna ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

²⁹ Ndum suu hu njaf Isakarna li ni 54,400.

³⁰ Kay njaf suu vi Zabulonna ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

³¹ Ndum suu hu njaf Zabulonna li ni 57,400.

³² Kay njaf goryoŋ Yosefna ni, kay njaf suu vi Efrayimma ni ndumusi hu deeresi halaŋ, hu ziisi halaŋ, ndumusi ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

³³ Ndum suu hu njaf Efrayimma li ni 40,500.

³⁴ Kay njaf suu vi Manasena ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

³⁵ Ndum suu hu njaf Manasena li ni 32,200.

³⁶ Kay njaf suu vi Benjaminna ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

³⁷ Ndum suu hu njaf Benjaminna li ni 35,400.

³⁸ Kay njaf suu vi Danna ndumusi hu deeresi halaŋ, hu ziisi halaŋ ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

³⁹ Ndum suu hu njaf Danna li ni 62,700.

⁴⁰ Kay njaf suu vi Aserna ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

⁴¹ Ndum suu hu njaf Aserna li ni 41,500.

⁴² Kay njaf suu vi Neftalina ndumusi hu deeresi halaŋ, hu ziisi halaŋ, ndum suuna ki dew dew bel, col ha kay suu basaɗasi dok-mbana tuɗ ha fok na, suu ndak ki a yow kawi ma duuna kosina.

⁴³ Ndum suu vi Neftalina li ni 53,400.

⁴⁴ Gola ni ndum suu may suu Moiz u Aaron ndumusi dlaɓi u muli suu yowosi ay hu njaf suu Israelna zeɗ zeɗna. Dee suu taaragelay ni tli sana ay ki hu njafasi dew dew bel.

⁴⁵ Suu Israelna halaŋ suu ndumusi ki u deeresi dew dew belna, col ha kay suu basaɗasi dok-mbana tuɗ ha fok na ni, suu Israel suu ndak ki a yow kawi ma duuna kosina halaŋ,

⁴⁶ suu ndumusi asina halaŋ li ni 603,550.

Gaɗta kay njaf suu vi Levina

⁴⁷ Njaf suu vi Levina, u dee busi ŋgolona halaŋŋi ndumusi ka duk suu Israelnaɗi.

⁴⁸ Yawe ɓak u Moiz dam ana,

⁴⁹ «Suu aŋ hinisi ki bay ndumbana ni njaf suu vi Levina hol. Aŋ ka ndum njaf suu vi Levina duk suu Israelnaɗi.

⁵⁰ Aŋ ɦasi sun masira ni kay tlesuu kalafi hu Ziŋ Ҥinira Gaɗta. Tlesuu li sunda huna halaŋ, tlesuu min zi ndaɗta u asina halaŋ. Asi li sunda hu halaŋŋi asiya, ŋguy ziisi ni kay Ziŋ Lonara gaw may.

⁵¹ Lini a jok u Ziŋ Lonara kiyo ni njaf suu vi Levina hawaɗ tlesuu min zira tokka ni asiya, li ma asi cuk huna, suu vi Levina hin pi Ziŋ Lonara kolo ni asi may. Sa ma daŋ ŋgen tam ay huwa ni daŋgay mamma ni miɗna.

⁵² «Suu Israelna cuk zina ni gegelay cukŋi hu deeremu, gegelay cukŋi eg kawi mamma hu li ma nam duu huna.

⁵³ Na may njaf suu vi Levina cukŋi keŋ Zira Galamba kay ana yaanda hoŋ kay suu Israelnaɗi, suu vi Levina ni suu juɓ u Zira Galamba.»

⁵⁴ Gola ni dlara suu Israelna laɗta, asi li ki u dlara Yawe daɗ Moizza dew dew halaŋ.