NAHUM 3 - Boy Lonana

Ҥoŋzi ma ci suuna hinim ki maŋ suuna a lasamba

¹ Cora ka kay ɦoŋzi ma ci suuna, zi ma oyra u tlesuu ɦulla u ɦurumba usi ka daɓbina.

² Balafna ka tiira, sem tlena ka li vunna hu voɗta, kulumina ka jaŋa, pupusna ka soo hu voɗta na ɦur.

³ Suu kulumina yow tlena kasiya, sin ŋgewra ka weleɗta, ɓagina sinim weleɗa, suu ki ciina ka ndumbi, molira ko didiŋga na, suuna tayasi kaŋga u sesiya.

Ninive mbuɗ ki ko cara gawlaŋga suuna san uɗta na

⁴ Ni kay dla cora vi gawlaŋ mayra min taɗ u tlesuu jivina a mbaɗ suunara, a puk mbassa ki kaŋga u dla cooɗta, puk suuna ki u mbeleŋ maɗna.

⁵ Yawe, ma Saɓakŋa Kom Belna, ka duu u ndaku. An hin ɗuɗuk barawra cuki payakka ki kolo ta ta kay vogoku a takak siili makka ki maŋ suuna, tak cookka ki maŋ mulina may.

⁶ An molok didiŋga kaku a mbuɗuk ki zolona, a ndak mbuɗ ni va ma takka.

⁷ Lini suuna wak may ndi liŋŋa yi ha kolo iirisi ana Ninive ɓeŋ ki wa lay. Sa hin waɗ hahawaɗna ni gege? An hin hal suu heɓek hurukŋa ay ni arage?

Dlara hin li eg Ninivera ni ko dlara li eg Thebessa na may

⁸ Va ma ndak hin suu ki kay Thebes hu li ma ndaɗ ay ki duk yo lumma Nilna, yona ŋguyuɗ yaɗ ki na cutl lay, mbo lum ma ŋgolna giira kaɗ ko ndal liwra na, suu mbo lumma ŋgolna ki ŋguyra kaɗ ko gulumunna na. Ninive suuɗ su?

⁹ Mbassa Etiyopira u mbassa Egiptera ni suu sooɗ uɗna, ni suu ɦaɗ saɓakŋa tew tewna. Suu hu mbassa Putna u suu Libina ni suu kay cerekŋa.

¹⁰ Ndaɗ taɗta may ɗaŋŋi asi tlaɗ kiyo. Asi hin vaɗ daŋgayna, goryoɗ may ɗaŋŋi asi casi ki keŋ voɗta halaŋ halaŋ. Suu maɗ suu kaɓakŋa asi ɓorowosi ki kosiya, muli maɗ suu ŋgolona asi cukusi galina kelesiya.

¹¹ Ndak may ɗaŋŋi hin guruɗ ki ko ti tara, ndaɗ hin suu kak ndak hin ndi kaŋgaa, hal lina kak ŋgay tak ko saak ma babalira may ɗaŋ.

Ninive ka ndaki a li saɓakgi

¹² Liik ma saɓakŋa halaŋŋi ko ndal gu tulum ma u vuɗta humumma na, va geŋeɗeɗ wa nde ni ndaɗ yak ki kaŋga, suuna taɗ kiyo.

¹³ Suu hin varakŋa ni boyogina ɦawaa, vun grek ma kay mbas makkana ki malira maŋ saak ma babalira na ɦoŋ, cogorom ma vun grekŋana kura ŋgalam kiyo.

¹⁴ Go yona kay liikŋa, so uk ki doo taku, kal kaŋga duk luɓuna, dloɗomu vi gu ma ci brikka koku.

¹⁵ Ni hu li namma kura hin ŋgalak kiyo, ŋgewra hin daɓak buurukŋi huwa, asi komok ki ko baa jeena ti tlena kira na. Ulul ko baa jeena na. Ulul ko baara na.

Njaf suuna halaŋ bulum kiyo

¹⁶ Suu mak suu li paara zulira suu ciwciwra kolo huulonara ko ndal baa jeena pii kolora na.

¹⁷ Gor muli maksina ko ndal baara na, muli mak suu duuna ulul ko ndal dee yumma na. Asi kak kolo hum kaana hu til semeɗna, faɗta ndi ki kasi wa ni asi tum piira ni ara kala sa ka wiɗi? Asi ni arage?

Boy ma co ma irim ka a gi oloɗina

¹⁸ Mul ma Asirina, suu maŋ suu taa suuna buu ki senna wa. Suu maŋ suu ŋgolo suu duuna ka ɦay tasi oloɗi, suu maŋsina njay kosi ki kay ɦinira wa, sa ma tokosi eg tasi kaɗi.

¹⁹ Dlaaŋga iriɗ ka a giɗi, ka a fi yal ma ciliŋ mbiliŋŋaɗi. Gegelay humuŋ dlaaŋga nam ko kom u cooŋga. Ni na, sa ma yaaŋga ŋgenem kaɗi may, tam tam kaɗi mayna ni gege?