NAHUM 2 - Boy Lonana

¹ Sa vun sunda ka liŋ ay kolo kay ɦinira, nam mbaaygi ay ni heɓpa, li furira Yuda, faɗ vun ɦal maŋga ɦawara kiyo, kay sa ma dlam cona hin ka tli varaŋ oloɗi, saɓakam ka oloɗi.

² Suu li dla cora ka tuɗ ha a duu u ndaku, ndak kak jejege gol vun ziiku. Cuk suu duuna asi gol voɗta jiviya, min tak jivi a duu u suu mak suu duuna halaŋ.

³ Kay Yawe hoŋ ay ni u furira vi Yakobba, nam tamba ni furira vi Israella. Suu ɦulla mba ɦurumusi tlegeyesi lay, feɗesi sene masina ki lay.

Ninive suuna nduguɗ ɦurumuɗ kiyo

⁴ Mbari ma vi suu mam suu duuna tam cori tlawra, suu mam suu duuna baraw ma egesina tam weleɗa, kulumi suu taɗ pupusna yow kawi ma duuna ay bolow cocoo, vunusi tinira u tasi na tul tul. Suu duuna keweɗ ɓagi masina na gaw gaw.

⁵ Hu ɦoŋzi ma bagina suu kulumina nja kosi kay suuna a yara, asi ɦurum li na ko tasi ni ɦurumi ko kura ŋgal linara na, asi dik u tasi kasi ko welera weleɗ kolo huulonara na.

⁶ Mul ma Asirina yi suu mam suu ŋgolo suu duuna aya. Asi tew ka a li vaɗi. Asi dik u tasi ta ta tew ha ki eg gulumunna, mbari masina asi molom kaŋga kay tamu.

⁷ Vun zina mal ha ki kay lumma na ki tooya, hu ziŋ mulnana tlena asi toosi kiyo.

⁸ Asi tli foto loosira, boyogi suu laɗ sundana tii kaɗ ko gugukka na ci ŋgaf dikisiya.

⁹ Ay hu fokka day lay Ninive ni ko va ma ŋgay tlena na, yo lum maɗna ŋgol cocoo, nam hin doo ni namu. Cologi jiviya, cologi eŋŋe, ka a sa hoŋ daganɗi.

¹⁰ Ҥurumugi doonora, ɦurumugi lorra, begera uɗ ka daɓbi, tlesuu jivi cocona molira ko didiŋga na.

¹¹ Tlena ki ɦurumiya, ki yowiya, suu ɦiw ki tooy lay, suuna hurusi ka vi dla oloɗi, suuna gayasi ki usi kaaya, mbalatasi halaŋ dlaka, asi mbuɗ ki hahawra.

Ninive mbuɗ ko dlo ma cam kina na

¹² Zi ma ko dlona nana ni arage? Li ma gor dlona fi ti masina huna hu li ma dlona tuɗ ki a halaɗna sa ka saa kay goo dlonaɗi.

¹³ Dlona vi mbuurina ay ɦasi maŋ goryomu, maŋ suu tamagina lay. Nam oy zulum u tliw mbuuri suu nam vasi ay bagina.

¹⁴ Yawe, ma Saɓakŋa Kom Belna, ay kolo huulona, di ana, an ka duu u ndaku. An hin ŋgalak pupus makŋa ki u kura. Ŋgewra hin cak gor dlo maksina kiyo. Yowra ndak yow tlena vi suunara hin daɓ ki kay ndaŋgara, sa hin ka hum del suu ndak sunusina oloɗi.