NAHUM 1 - Boy Lonana

¹ Ɓak boyna kay Ninive. Magaara Nahum ma Elkokŋa ɓii dlara tak taɗ irimba huruɗta.

Bu Suuna ni Lo ma ya coco may, jivi mayna

² Yawe ni Lo ma yowmus coco lay, sa sugulum layna. Yawe sa sugulumu, yaamba li suuna ndaana ɦay. Yawe sa sugulum u suu babali mamsina, nam mbuɗ yara eg suu babali mamsina.

³ Gasi, Yawe, hurum ka mbuɗ ya zakgi, u saɓakam ma ŋgolna nam ka hin va jak ki kambi. Hu li ma nam tuɗ huna, babaa ma ŋgolna li umu. Ɗugulla ni gugum ma tum kolo u semma.

⁴ Nam mbuɗ yara eg lum ma ŋgolna wa ni nam so kiyo, nam haɗak mbo lum ma gorina kiyo. Usu ma hu Basanna u ma keŋ ɦinira Karmella so kiyo, ɓo guguni suu hu Libanna logoɗ kiyo.

⁵ Ҥinira ŋgolora dlak komu, ɦinira gorira law ki lay. Yam ndaŋgara dlak kom lay, yam ndaŋgara u suu kaɗna halaŋ dlak komu.

⁶ Sa ma hin fi saɓakŋa a col fokomma ni gege? Sa ma hin col fokom a duu u nam hu li ma nam ki mbuɗi yarana ni gege? Yaamba sulul ni ko ku zinana, gogoyra loɗ ha ki fokom lay.

⁷ Yawe jiviya, nammi ŋgus ma kay suuna hu buu ma wi hawrana. Nammi sa gol suu ŋgay tasi egemma.

⁸ Hu li ma dla cora ka jakŋa lay. Nam bulum ɦoŋzi ma ŋgolna kiyo, dik suu babali mamsina tinisi ha ki hu li ma ndufunna.

Boy ma ɓakam u tam kay Yuda u Ninivena

⁹ Va ma agi saa kam eg Yawena ni mege? Nam mi sa ɓeŋ lina kina. Wihawra hin ka mba a yaɗta mbara oloɗi.

¹⁰ Kay asi cecemmi ni hinni ko wayra tligiɗi eg taɗta na. Hu liisi ma cira asi ki gurɗiya. Kura hin ŋgalasi ki halaŋ ko mal ma ki sooy jivina na.

¹¹ Sa ma li dla cora eg Yawena kal ay ki ni egegu, sa ma vuɗ ay kaŋga u dla cora na dayna.

¹² Yawe ɓak ana, li ni asi ki kay tasi bolow coco lay ni hin zaarasi ki wa ni daɓ ki gaw. Li ni an mbuɗuŋ ki zolo lay ni, an hin ka a mbuɗuŋ ki zolo oloɗi.

¹³ Cecem wanda an kusum guum ma gii deleŋŋa ki wa, an buɗuŋ zew mamma ki seŋ wa.

¹⁴ Yawe di kagi agi suu Ninivena ana, hu njafagi ma hin daganna sa hin ka tin sem ana Ninive oloɗi, an hin to tlesuu agi ceɗesi may, yoorosi mayna ki hu zira vi loogi magisinara, an minigi ni zulugi kay agi ka nek oloɗi.