MISE 7 - Boy Lonana

Suu ɗegeena ka kay mbassa oloɗi

¹ Hahawra ka kanu. Anni ko ndal suu cil ɦelena vun semeɗnana na, ko ndal suu dok barra siira balam suu to wana kina na. Na may ii wa ka na dew a tiraɗi, vuɗum mayra jewra an miniɗ cocora ka na dewɗi lay.

² Ma ɗegeena tuɗ ki hin mbassa wa, sa ma jivi hin ka duk suuna oloɗi. Asi halaŋ saarasi tinira ni kay vora vo busuna kira. Gegelay min a vi wayamma kaŋga hu bayra.

³ Kosi tinira ni a li dla cora. A li jivira eg saa ni mulna joɓ va nde may, sa ma kaɓakŋa joɓ ana ɦam va ɦawa nde may. Sa ma ɓii magaara ɓakŋi kay a hoɓ hayamba ɦawaa.

⁴ Ma jivi dukusina ni ko ndal wayra na, ma jivi suna ko ndal kaa wayra na. Hu buu ma suu maŋ suu golla yaŋŋa aŋ mbay dukusiya, cecem wanda asi viɗ ki wa.

⁵ Agi vagi u sa ma hu dee magiranaɗi, agi ɦagi tagi ki maŋ sa ma banagiɗi. Fok ca mayra ka koɗ taɗ koŋga, gol taŋ jivi u dla mayra kal ay ki funuŋga.

⁶ Kay ana goona gol bum ki ni ko sa laɓana na, goora col yara eg suɗu, caŋ goonara col yara eg kunuɗta. Gegelay ni gol suu varamma irimmi babali mamsina.

⁷ An may ni ka saa ni kay Yawe, ka saa ni kay Lona saan ma suɗta, nam hin humunu Loonna.

Saara vi Yerusalemba

⁸ San unɗi, ndak babali manda. Li ni an ndi kaŋgaa, an hin col koloo, lini an ka kagi hu li ma ndufunna ni Yawe ni kiɗik manda.

⁹ Yara vi Yawera, an ndak vaɗ kanu, kay ana an li sulukŋa egem ta ta hu li ma nam kaan ɓak manna mbuɗun ki jivina. Nam hin kalan ay ki ii kiɗikka an hin golom sun mamba ɗegeera.

¹⁰ Ndaɗ hin wi ki jiviya, babali manda, ndaɗ hin mbuɗ ki zolona, ndaɗ mayra li dan ana, «Yawe, Looŋŋa, ni aragera?» Irin ka tini kaɗ ta, an hin tayaɗ ki kaŋga u sen ko ndal luɓuna hu voɗtara na.

¹¹ Buu ma hin a min gulumun maɗnana, hu buu namma asi hin ɦuɗ ii haka makka ki dagani.

¹² Hu buu namma asi hin hoŋ ay egeku, ay hu Asiri ta ta tew Egipte, col hu Egipte ta ta tew fun mbo lumma Efratna, fun mbo lum ma ŋgolna tew fun mbo lum ma ŋgol hiŋŋa lay, ay kay ɦinira ta ta tew kay ɦinira hiŋga lay.

¹³ Yam ndaŋgara hin mbuɗ ki fulla kay cora vi suu kaɗnara, hin li ni a vuɗta vi tuɗ masira ɗegeera.

¹⁴ Taa suu maŋsina u tokolo maŋga, yoori maŋsina, ka ki duk bubura kay tasiya, duk usuna. Ko asi ti haɗna hu Basan u Galaad ko ndal ay hu buu ma fok jew dayna na.

¹⁵ Ko ndal hu buu ma aŋ kal ay ki hu mbassa Egiptera na, an hin takam dlara mbuɗ mbuɗ manda.

¹⁶ Suuna hin gol u irisiya, asi hin mbuɗ ki zolona, u saɓakasi halaŋ, asi hin tin kosi funusiya, humusi hin ŋgel kiyo.

¹⁷ Asi hin of gugum daŋgara ko ndal guyugina na, ko ndal mbuuri suu ŋgoo bagina na. Asi hin sel ay ki hu ziisi dlak na keɓe keɓe a tuɗ eg Yawera, asi hin mbuɗ ki ndaana cocoo, asi hin li ndaana koŋu.

¹⁸ Hin ŋgaaŋŋi u Lo manage, aŋ ma bulum cora vi suuna kina, aŋ ma ka caa yaŋ kay yaraɗi lay na. Kay minda vi tlesuu hinna, jooŋŋa ka a mbuɗ co u yaaŋgaɗi, kay ana aŋ min a lami ni jivira egemiya.

¹⁹ Nam hin laygi jivi mamba egeygi hu olo, nam hin tayaygi co maygira ki kaŋga u semu. Aŋ hin cukusi coosira halaŋ ha ki duk mbo lum ma ŋgolna.

²⁰ Aŋ hin ɦal ɗegee maŋga maŋ Yakob, heɓ maŋga maŋ Abraham. Ni va ma aŋ vi vunuŋ ay ki u somoyomi hu buu ma ay jew dayna.