MISE 6 - Boy Lonana

Ɓak ma Yawe kaam kay suu mammana

¹ Humugi va ma Yawe damma haa, col kolo kaɓakŋa fok ɦinira, ko delek tew ha ki kolo kay ɦinira.

² Ҥinira, humugi ɓak ma vi Yawena haa. agiya u ndaŋgara ka ɓeŋ kiɗira, gologi ɓak ma vi Yawe u suu mamma na, u Israel, nam kal hu ɓakŋa wa.

³ Suu mansina, va an lagina na ni mege? An loɓogi tagi ki ni u mege? Hoŋongi dira aya.

⁴ Ni kay sella an selegi ay ki hu Egiptera su? Buɗta an buɗugi ay ki hu mbaɓurara su? U sunda an sunugi Moiz, Aaron u Miriyam ha ana asi takagi voɗtara su?

⁵ Suu mansina humugi gagi kay boy ma Balak, mul ma Moabma damma, va ma Balaam, goŋ Beorna, hoŋom dirana, li ma col ay Sittim ta ta tew Gilgalna, agi hin wi saɓakŋa vi Yawe hu li namma.

⁶ An hin col fok Yawe ni u mege? Gi yan kaŋga fok Lona ma ha kolo huulona dayna ni u mege? An hin col fokommi u ɓivun ma ŋgalam kina su? U gor mbutlugi suu basaɗasi dew dewna su?

⁷ Yawe hin min gamalagi suu bolow cocona su? Nam hin min mbul ma tini na fayaɗ ka daɓbina su? An hin ɦammi goron ma vuɗ jewna a bulumun coonda kira su? Goron ma hurunna kay co man an tandara su?

⁸ Aŋ sana, asi haɗaŋ tlesuu jivina wa, tlesuu Yawe min ana aŋ lasiyana. Va daŋ kaɗi, ni humba gasira, minda ɗegeera may, tuɗta aŋ tuɗ hu voɗta vi Lona u voɗoɗta may.

Yawe gaɗ suuna kay kulna u dlara saɓakŋa

⁹ Del Yawe ka yi ay ɦoŋzina, nam hin suɗ ki ni suu li ndaana u semma. Humugi haa, njaf suuna u suu ka hu ɦoŋzinana.

¹⁰ An ndak siɓ a suuna tok begera ɦula hu zisi na gak gak su, va ma cona, ŋgara ka ŋga tleesuu gussa u voɗosiɗira?

¹¹ An ndak di ana boy kaɗi hu li ma suuna ka ŋga nek tlena u voɗosiɗi layna su? Sawalna dew ni ka ŋgaam nekem eg liimbi lay.

¹² Ҥoŋzi ma suu begera hurumma li ni dlara saɓakŋa, suu hu zi nammana ɓakŋi boy ma ganyamba, ay funusi u sinisi ni boy ma viɗ suuna kina.

¹³ Na ɗaŋŋi an mbuɗuŋ ki tuguɗira wa, kay poŋga aŋ poŋ suunara, an yowoŋ tlegeyeŋ ki ni kay suluk ma aŋ lamma.

¹⁴ Aŋu, aŋ hin tiya, hin ka hoɓbi. Mayra hin ci varaŋu, aŋ hin mol tlena varaŋu, ka tew a ŋgayasiɗi. Tlesuu aŋ hin ŋgayasina an hin ɓeŋesi ki u ŋgew man ma fiyekŋa.

¹⁵ Aŋu, aŋ hin zaa tlena kaŋgaa, hin ka fi va a feɗɗi. Aŋu, aŋ hin em conora hin ka fi mbul ɦuɗi, aŋ hin soo veŋŋa kiyo, hin ka cambi.

¹⁶ Aŋ li u gaɗta vi Omrira, u dlara asi laɗ vo hu zina vi Akabpa lay. Agi tuɗugi ni u gaɗ masira, an may ni hin hiniŋ hu li ma hahawra, suu maŋsina hin mbuɗ ki zolona lay. Agi hin fagi ni dla co mayra suu mansina faɗta.