MISE 5 - Boy Lonana

Betlehem mbassa vi mul ma suɗ suuna

¹ Ndak, Betlehem ta Efratara, ndak goo coco a ndumuk duk njaf suu vi Yudana, saan ma ti mulla kay Israelna hin kal ay ki ni huruku. Umba col ayra hoŋ ha ki kaŋgana day, hu buu ma ay jew day dayna.

² Kay ndaɗta Lona hin noyosi ki ta ta hu li ma ca mayra a vuɗ goonara vuɗum kira. Ɗaŋŋi suu usi hin ko gorsesinana hin taɓ ko tasi u goryoŋ Israelna.

³ Nam hin col kolo taa timigii mamsina u saɓak Yawena, u bibiŋilla vi sem Yawe Lonara. Asi hin kak kaŋgaa, kay nam hin li a ma ŋgolna ta ta keŋ ndaŋgara ma daɓ ayna.

⁴ Nam kay tamba hin li ni a heɓpa. Hu li ma Asiri suu kay mbas maygira, hin tooygi ziygi kiyo, aygi hin sunuygi suu taa yoona kiɗisiya kamu, mulina kalavandi may.

⁵ Asi hin taa yoorina kay mbassa Asiri u ŋgewegina, kay mbassa Nemrodta u ŋgewegina lay. Nam tamba may ni buɗuygi ay ki ko Asiri hu li ma nam suu ay kay mbas maygira hin tooygi ii haka maygira kina.

Suu Israel suu hin duk ɦoŋ suunana

⁶ Suu vi Yakob suu usi hinna hin li duk ɦoŋ suu bolow cocona, ko ndal mbaɗagira col ay eg Yawera na, ko ndal lo ma si hum usuna na, ta ka juɓ va ko saɗira na, ka saa kay va ko suu warna naɗi layra na.

⁷ Kay ndaɗta suu vi Yakob suu usi hinna hin li ni duk mbassa bolowra, duk suu bolowna ko ndal dlona duk mbuuri suu duk gurana na, ko ndal goo dlona duk timigiina na, nam jak dukusiya, tayasi kaŋgaa, casi kiyo, sa ka hin ndak a buɗusi kiɗi.

Suu vi Yawena doorosi ki kay tlesuu co suu asi li saɓakŋa u asina

⁸ Ko koŋ tli kolo kay suu babali maŋsina, ko suu babali maŋsina bulum kiyo.

⁹ Yawe di ana, gologi va ma hin li hu buu namma na. An hin yowoŋ kulumi maŋsina kiyo, an hin njayaŋ pupus maŋŋa kiyo.

¹⁰ An hin yow ɦoŋzi ma hu mbas maŋgana kiyo, an hin hawaɗaŋ gulumun maŋŋa kiyo.

¹¹ An hin yowoŋ kumu maŋŋa kiyo, suu li kumuna hin ka li varaŋ oloɗi.

¹² An hin yow tlesuu aŋ minisina u gogoyra kiyo, aŋ hin ka goɓ kaŋga fok tlesuu aŋ minisi u koŋŋa oloɗi.

¹³ An hin yow gu ma vi Aserna ma varaŋŋa kiyo, an hin bulumuŋ ɦoŋzi maŋŋa kiyo.

¹⁴ U hurun ma yara an hin sa sugulun u suu may suu humun vunun kaɗina.