MISE 4 - Boy Lonana

Yerusalem, hoŋzi ma ŋgol ma heɓpa

¹ Hu fokka lina hin mbaa, ɦinira vi Yawera hin li ki tinira kolo kay ndarayaɗna, ndaɗ hin ti mulla kasiya. Njaf suuna hin hoŋ irisi ha kolo kaɗu.

² Njaf suuna bolowo hin gijaŋ tuɗta hin di ana, «Mbaagi aya, ɗiŋiygi kolo kay ɦinira vi Yawera, hu zi ma vi Loŋ Yakobma. Nam hin takaygi voɗ mamba, aygi hin tuɗ hu voɗ mamba. Gasi haɗ ndaɗta col ay ni hu Siyon, boy ma vi Yawena ay hu Yerusalem may.»

³ Nam hin kaɓakŋa duk suuna bolowo kaɓakŋa duk ɦoŋ mbassa saɓakŋa ɦayra, hu li ma dayna lay. Ɗuɗusi ŋgewegi masina kiyo, asi hin mbuɗusi ki a kawira zumma, u ɓagi masisina asi mbuɗusi ki maragamba. Mbas taaragelay hin ka a koo ŋgew kolo kaɗ kay ndaraɗ oloɗi, suuna hin ka haɗ yal ma duu tasina oloɗi.

⁴ Suuna hin kakŋi gegelay u ŋgus gu gugutlu mamba may, u ŋgus gu tulum mamma may, sa hin ka ɦayasi irisi oloɗi, kay ana Yawe ma Saɓakŋa Kom Belna di boy namma u vunum ni namu.

⁵ Lini suuna halaŋ gegelay tuɗ ni u sem loom ma ɦawana ni, aygi may ni tuɗuygi u sem Yawe Lo maygina a fafaɗta.

Bu Suuna ni mul ma Yerusalemma

⁶ Hu buu namma ni Yawe di ana, an hin tok suu dalira kay tasiya, an hin tok suu ŋjay kina kay tasiya, suu an lasasina kay tasi may.

⁷ Duk suu dalira an hin mbuɗusi a ura hinda, suu ay ki njayna a mbas mayra saɓakŋa. Kolo kay ɦinira Siyonda Yawe hin li ni a mul masina cecem wanda, hu fokka a fafaɗta.

⁸ Ndak, ɦinira Yersalemba ta ka juɓ u suunara. Ndakŋi ko gina pii kolo fiyek ma gol yam zina na. Ndak hin tok a fi saɓak mak ma ay fok jewna, Yerusalem hin tok a mbuɗ zi ŋgol ma vi mullana.

Tukka u buɗta Yerusalem buɗ kira

⁹ Cecem wan daŋga ndak yi kolo u delek eŋga ni kay me tuge? Mul ha ka vo varakgi su? Sa ma gaɗakŋa viɗ ki wa su, ti tara fak cecem wanda ko ndal cara a vuɗta na ɗaŋgi su?

¹⁰ Mbusuk ko ti tara hin gurniya, goora vi Siyon, ko ndal cara a vuɗta na kay cecem wanda ndak hin kal ki hu zina, ndak hin kak ki hu senena, ndak hin tuɗ ta ta tew Babilon, ndak hin fi buɗta ni hu li namma, hu li namma Yawe hin buɗuk ay ki ko suu babali maksina.

¹¹ Cecem wanda mbassa bolowo vi vunusi kaku, mbas mayra di ana, «Ko ndak mbuɗ ki lalasi, ko irigi gol ɓeŋga vi Siyonda.»

¹² Ni kay ana asi ka wi tlesuu Yawe min a lasinaɗi, asi ka wam saarambi lay. Nam tokosi ki kay tasi ni ko ndal semeɗna tok usuna ay dukumba na.

¹³ Col kolo, to wana, goora vi Siyon, mekka kakka an hin mbuɗuɗ ki kawina, sek ma tin kaŋgana an hin mbuɗum ki walakka, ndak tegeɗ suuna ki bolow cocoo, ndak hin doorosi ki kay bege masira u givunna hin ɦaɗ ki maŋ Yawe, bege masira ki ni maŋ mala mbassa halaŋ.

¹⁴ Cecem wanda ka tak mbilna goora duuna, asi hiniygi lina wa, u tokolora asi waɗ kiriŋ sa ma kaɓakŋa vi suu Israelna u ndaɗta.