MISE 3 - Boy Lonana

Gi humba maŋ muli suu maŋina

¹ An di ana, «Humugi ha ɗaŋ muli suu vi Yakobma, suu kaɓakŋa vo vi Israelna, agi a wi ɗegeera ni agiɗi su?

² Agi suu noyogi dlara jivira kiyo hin minigi ni dlara corana, agi suu haragi bak suuna kiyo, haragi tliw suuna hinisi sokosi ki kiɗikŋa.

³ Agi suu komogi tliw suu mansinana, harasi bakasi kina, agi suu toosi sokosi kina, kaasi ii tliwisi ki ko tliw ma cukum kuŋgu hu doyrana na, ko ndal tliw ma kaŋga u doyrana na.

⁴ Hu li ma asi hin tii ha eg Yawena nam hin ka hoŋosi diraɗi, nam hin ŋgay tam ki irisi hu li namma, kay suluk ma asi lamma.»

Maŋ suu jok vun Lona suu viɗ Israel kina

⁵ Yawe di suu jokom vunumma, suu viɗim suu mamma kina ana, «Na ni asi ndak a fi heɓpa hu li ma siisi ka hal suuna a eɗta may su? Sa ma ka tinisi va funusiɗina asi li yara teteɗta u namu.

⁶ Magi agi may ɗaŋŋi tlena tak tasi ki irigi ni njeŋgee, magi agi may ni ndufunda, wira fokka hin li ŋgol suwa. Faɗta hin ɗik ki kay suu jok vun Lona, buuna hin kuluɓ ki kasi ndufunda.

⁷ Zolona kay suu wi u dlara, suu joɓpa hin viɗ ki lay. Asi hin kuluɓ irisi ki kaŋgaa kay ana Lona ka hoŋosi diraɗi.»

⁸ An doli ɗaŋŋi u heɓpa vi Musuk Yawera an oyra u saɓakŋa u ɗegeera u siɓpa a tak yara vi Yakobpa u suluk ma vi Israelna kiyo.

Mise ɓak ki jew kay ɓeŋga Yerusalemba

⁹ Humugi boy namma ha ɗaŋ, agi muli suu vi Yakobma, suu kaɓakŋa vi Israelna asi suu mbuɗugi boy ma jivina ki balam dla corana, dlara ɗegeera agi mbuɗuɗ ki gunira na ɗowna.

¹⁰ Minigi zi ma Siyonna u busuna, zi ma Yerusalemma u ci maɗna.

¹¹ Muli suu asina kaɓakŋa ni kay gegeli sum veŋŋa ɦawaa, suu haɗta haɗ suuna ni kay a mbuɗ tasi begera ɦawaa, suu jok vun Lona ɓak boyna ki fok jew ni kay gursura ɦawaa. Ni u saɓak ma vi Yawena asi di ana, «Yawe na ni ka dukuygiɗi su? Ҥawaa, hahawra hin ka a mba kaygiɗi.»

¹² Kay ndaɗta ni kagi agiya, ɦoŋzi ma Siyonna suuna hin zumum ki senena, Yerusalem hin mbuɗ ki ni didiŋga, ɦinira, Ziŋ Lonara mini kaɗta, hin mbuɗ ki ni bubura.