MISE 1 - Boy Lonana

¹ Yawe di boy mamma maŋ Mise ma Moresetna hu buu ma Yotam, Ahaz, Ezekiyas a mulina hu Yudana. Dlara tak taɗ irim ki kay Samari u Yerusalem.

Yawe hin kaɓakŋa kay suu mam suu dlara vasina

² Humugi haa, agi njaf suuna halaŋ. Ndaŋgara li kagi jejege u tlesuu kaɗna halaŋ. Bu Suuna Yawe kaagi ɓakŋa kagiya, Bu Suuna ay kolo hu ziim day.

³ Gola Yawe kal ay ki hu ziimu. Nam cuk sem ay kaŋgaa, tuɗ kolo kay li ma mbuy ma kay ndaŋgarana.

⁴ Ҥinira law ki kaŋga u semu, zulla ŋgolora tos ki ko daɓaŋga kura lawaɗ kira na, ko yo ma ay kolona ɓaɗ ay kaŋgara na.

⁵ Tle asina li halaŋŋi kay yara vi Yakobpa, ni kay suluk ma vi suu Israelna. Yara Yakob laɗta ni tarage? Ka ni Samariɗi su? Li ma vi Yuda ma kolo mbuyna ni manage? Ka ni Yerusalemɗi su?

⁶ An hin mbuɗ Samari ki ni sene ma ɓeŋina, mbassa gugutlura. An hin lagaɗaɗ goygoy maɗta ki kaŋga hu giriŋŋa u zigini maɗ suu gii kaŋgana an hin takasi ki kiɗiki.

⁷ An hin tooɗ fuli maɗsina kiyo, begera ndaɗ faɗta halaŋ an hin cukuɗ ki duk kura. Fuli maɗsina halaŋ an hin toosi ki na njeɓ njeɓ, kay ana taɓira ko tasi u begera vi gawlaŋiinara, asi hin mbuɗ ki ni ko bege ndaɗta na may.

Soolla hahawra kay ɦoŋzi ma Yudana

⁸ May ɗaŋŋi an hin yoo tan ɗowba hin gurni su. An hin tuɗ ni sen siili bay tuɓurura. An hin gi soolla hahawra ko ndal bayakka na, soolla hahawra ko ndal erketta na.

⁹ Gasi ka a min oloɗi, waɗ mayra waɗaɗta. Kay ana nam mbay ta ta tew ki hu Yuda, ta ta lam vun goŋga vi suu mannara, ta ta Yerusalem.

¹⁰ Hu Gat wanni ɓakagi boy nammaɗi. Tiirigiya. Hu Bet Leafra wanni bulum tagi kaŋga duk gugumma.

¹¹ Agi suu hu mbassa Safirna, ki zoloo, siili lay. Ndaɗ hin ka kal ay ki kiɗik oloɗi. Ndaɗ mayra ka hu Saananda. Hahawra kay Bet Essel. Njunda halaŋ yowogira ki wa.

¹² Ndaɗ ki tuguɗira ni a fafaɗta. Ndaɗ mayra ka hu Morota. Gasi hahaw ndaɗta col ay ni kolo ko Yawe day mba eg vun zi ma Yerusalemma.

¹³ Njun kulumina u pupusna, ndak mayra ka hu Lakichsa. Suluk ma vi goora vi Siyonda col ay ni hu li namma, kay ana suu ci suuna hu Israelna col ay ni varaku.

¹⁴ Kay ndaɗta ndak hin min ii li ma a ɓorowogi duk ɦoŋogi kina kay Moreset u Gat. Zigini suu vi Akzibma hin ganyam muli suu Israelna.

¹⁵ Olo, an hin sa duuna mbay kagu, ndak mayra ka hu Maresetna. Bibiŋilla vi Israella hin tew ha ki hu Adoullam.

¹⁶ Wel yak kiyo, ŋgaɗ tlimiɗ yak ki kay goryok suu ndak minisina. Mbuɗ yak ki kak ko yam kokolora na, kay ana asi ha ki tuɗi hu mbassa daŋga egek day.