MATIYE 9 - Boy Lonana

Yesu col sa gugufura ki koloo.

¹ Yesu ful hu lumba a hoŋ ha ki balamam ii hiŋŋa a nda hu ziimu.

² Asi mbaaram sa gugufura ay gani kay guna. Yesu wi ana hu suu asina tini kamu ni, nam di sa gugufura ana, «Goonna, so uŋ kiyo, cooŋga daɓ ki wa.»

³ Suu wi magaara gaɗta ɦiw saa hurusi ana, «Sa namma wanni pan ni Lona.»

⁴ Yesu wasi boy ma hurusina na ni, dasi ana, «Agi saa hurugi cora na ni kaymege?

⁵ Dlara loɓma ni u taarage? Kay dam ana cooŋga ki daɓiyara ɗowba col koloo, tuɗ u seŋura su?

⁶ An min a agi wi ana Goŋ Sanna ka u saɓak ma daɓ cora vi suu hu duliyara egemu.» Nam di sa gugufura ana, «Col koloo, tli dlaɗ maŋga kaŋu, hoŋ voo varaŋu.»

⁷ Sana col koloo, gi tam voo gaw.

⁸ Suu molina wi na ni, mbuɗ ndaa cocoo, geleɗ Lona kay saɓak ma nam ɦam maŋ suunana.

Yesu yi Matiye

⁹ Yesu a jak tuɗta wanni, nam wi sana yam ana Matiye kaki hu zira taara. Yesu dam ana, «Tuɗ ay unu.» Matiye col koloo, gi tam um gaw.

¹⁰ Yesu u suu mamsina kakira a ti funa varam wanni. Suu vi taara u suu cona laki ko tasi u Yesu u suu haɗi mamsina, ti funa.

¹¹ Suu Farisenna wi na ni, di suu haɗi mamsina ana, «Saagi ma ŋgolna ti funa u suu vi taara u suu cona ni nanage?»

¹² Yesu hum na ni, dasi ana, «Suu may suu tasi ka tasiɗina, ka tuɗ hu li ma hal kumunaɗi. Suu tuguɗira halammi asiya.

¹³ Tuɗugi haɗagi boy ma ɓiiri namma ay hu magaara tuwa. Boy namma di ay jew ana, An min ni ɗegeera hu sanara, ka ɓivun ma yoorinaɗi. An mbay ka yi suu hurusi ɗegeenaɗi, an mbay ni kay suu cona.»

Suuna joɓ Yesu kay laara

¹⁴ Suu haɗi suu vi Jaŋ ma mbus batemma ɦuɗ tasi eg Yesu, joɓom ana, «Ami u suu Farisenna li laara may ni, suu maŋsina ka liɗi ni kaymege?»

¹⁵ Yesu dasi ana, «Suu mba vogodona li lakira hahawra u njuf cara kaki egesina su? Falira njuf cara kaɗira, asi hin li laara tuwa.

¹⁶ «Sa ka jak baraw ma wilina fun tam u ma basinaɗi. Kay ma wilina hin haa ma basina ki olo.

¹⁷ Aŋ sana ka sel sum veŋ ma wilina hu mbumbu yo ma basinaɗi. Mbumbu yona haw ki wa ni sum veŋŋa ɓeŋ ki egeŋŋi ɦawaa, mbumbu yona ɓeŋ ki egeŋŋi ɦawa lay. Sum veŋ ma wilina aŋ voommi hu mbumbu yo ma wilina may, ni sum veŋ namma u mbumbu yona hin li koŋ jiviya.»

Goŋ mulnara u cara ŋgen baraw ma vi Yesuna

¹⁸ Yesu ɓakasi boy namma tu na ni, mul ma Juifna mbay goɓ kaŋga fokomu, dam ana, «Goonda miɗ ha cem cem, aŋ mbay tin koŋ kaɗu, ndaɗ hin suɗ kiyo.»

¹⁹ Yesu col kolo u suu haɗi mamsina, tuɗ umu.

²⁰ Cara fi busuna li basara doogo yam mba' u ndaɗu, ndaɗ wi hawra cocoo, ɦuɗ taɗ ha ŋgoo Yesu, ŋgenem vun baraw mamma.

²¹ Ndaɗ saa ana lini an ŋgenem vun baraw mamma ɦawa lay ni, tan hinin kiyo.

²² Yesu pereɗ irim, waɗu, di ana, «Goonda, li ndaaɗi. Huruk ma tini kanna suɗuk ki wa.» Hu li namma busuna hiniɗ ki gaw.

²³ Yesu tew hu zina vi mulna. Nam wi suuna bu diffa, hin tok a paɗta ni, suuna tum tiina na ŋguk ŋguk.

²⁴ Yesu dasi ana, «Selegi ha kiyo. Goora ka miɗiɗi. Ndaɗ buu ni senna ɦawaa.» Suuna hum na ni, gijaŋ san umu.

²⁵ Nam selesi ay ki bunsu sel ni, kal hu zira goora gi hura. Nam tli ko goora na ni, ndaɗ col kolo gaw.

²⁶ Boy namma njay ki hu mbas ndaɗta halaŋ.

Yesu mal ii suu dugina ki mba'

²⁷ Yesu gi tam tuɗta may ni, jak hu li maa dew. Suu dugina mba' cuk tasi ha kay ceremu, sawalla kolo, dam ana, «Goŋ Davidna, wami hahawami aya.»

²⁸ Yesu tew ki voo may ni, suu dugina ɦuɗ tasi ay egemu. Nam joɓosi ana, «Agi wi kagi ana an ndak a li dla ndaɗta su?» Asi ana, «Aŋ ndakiya, Malla Haɗta.»

²⁹ Yesu tin kom kay irisi na ni, di ana, «Dla ndaɗta li egegi ko agi tin hurugi kanda na may.»

³⁰ Irisi mal ki gaw. Yesu dlaɗasi humusi ana, «Humugi jiviya, a sa wi ana an malagi irigi kiyo naɗi.»

³¹ Asi cuk ha ki ca ni, ɓak dla Yesu ha ki hu mbas masira halaŋ gaw.

Yesu mal vun sa ndumuna kiyo

³² Asi cuk tasi may ni, suuna mbaaram sa ndumuna ay egemu. Ful ma cona lamu, ka hinim vunum a ɓakgi.

³³ Yesu dik ful ma co namma ki dikŋi, sa namma gijaŋ ɓakŋa gaw. Suu moli cocona boy namma su ki kasiya. Asi ana, «Ami bay wi dlara na hu mbas Israel tuwa.»

³⁴ Suu Farisenna di ana, «Mul fulina ɦam saɓakŋa a dik ful ma cona ki ni namu.»

Yesu wi hahaw suu molina

³⁵ Yesu tuɗ hu zi ŋgolona, hu zi gorina lay. Nam haɗasi hu Zira Tokka, nam njaɗasi Boy ma Ayra kay Mulla huulonara. Nam garaɗ suu tuguɗira kiyo u suu dugina halaŋ.

³⁶ Nam wi hahaw suu moli egemma, kayme eŋesi kaɗi, asi ni ko timigii suu sa taarasi kaɗina na.

³⁷ Nam di suu haɗi mamsina ana, «Wana ka ŋgolo, ndaki a feɗta, suu feɗemma ka ŋgolɗi.

³⁸ Joɓogi malaŋ senena haa, nam sun suu feɗ wana ay huwa.»