MATIYE 8 - Boy Lonana

Yesu garaɗ sa busuna lamma kiyo

¹ Yesu ay kay ɦinira ɗuŋ ay ki kaŋga ɗuŋŋi, suuna tuɗ kay ceremma zomolok.

² Sa busuna lamma mbay eg Yesu, goɓ kaŋga fokomu, joɓom ana, «Bu Suuna, lini aŋ mina ni, aŋ ndak a mbuɗun ki jivi mbuɗge.»

³ Yesu maɗ kom kamu, ŋgenemu, dam ana, «An mina, aŋ garaɗ kiyo.» Cecemi busuna hinim ki gaw.

⁴ Yesu dam ana, «Li taŋ jiviya. Di boy namma ki maŋ saɗi. Tuɗ tak taŋ ki maŋ sa li ɓivunna. Aŋ ɦal va ma li ɓivunna ko Moiz dira na may. Dla ndaɗta tak ki maŋ suuna ana taŋ hiniŋ ki wa.»

Yesu garaɗ gogoo ma vi mul asgaana kiyo

⁵ Yesu a kal hu zi Kapernaumma wanni, mul asgaana mbay egem joɓom ana nam njunumu,

⁶ «Bu Suuna, gogoo manna ha voo, gi gugufuwa, wi hawra cocoo.»

⁷ Yesu hoŋom dira ana, «An hin tuɗ garaɗam kiyo.»

⁸ Mul asgaana dam ana, «An ka ndaki a aŋ kal varanɗi. Aŋ ɓak ay u vunuŋ ɦawa lay ni, gogoo manna garaɗ kiɗi su?

⁹ Anu, suu suunna ka may. Asgaa suu an suusina ka may. An di maa wa ana nam tuɗa ni, nam tuɗa. An di maa wa ana ma daŋ mbay olo ni, nam mbaya. An di sa ma sunda wa ana nam li na ni, nam liya.»

¹⁰ Yesu hum boy namma na ni, nam furi ɦay, di suu tuɗ umma ana, «An dagi ni gasira, duk suu Israelna halaŋŋi, sa viimba ko sa nammana kaɗi.

¹¹ An dagiya, suuna ŋgolo hin mbay u lo maɗiina, u fiɗigina, lak hu Mulla huulonara ko tasi u Abraham, u Isaak u Yakob.

¹² Suu Mulla huulonara gin masina hin cuk ha ki duk ndufunda. Asi hin tiira, muɗ siisiya.»

¹³ Yesu di mul asgaana ana, «Aŋ tuɗ voo. Dla ndaɗta hin li egeŋu, ko aŋ tin huruŋ kanda na may.» Gogoo ma vi mul asgaana garaɗ ki hu li namma gaw.

Yesu garaɗ suu tuguɗira ki cocoo

¹⁴ Yesu kal vi Piyer, nam fi kunuŋ Piyerra buuri kaŋga, taɗ taɗu. Taɗ egeɗ kura na keŋ keŋ.

¹⁵ Nam vaɗ koɗ kemmi, tuguɗira hiniɗ ki gaw. Ndaɗ col koloo, gijaŋ li sunda gaw.

¹⁶ Fiɗigira mba mba ni, asi yowom suu ful ma cona lasina ay egem cocoo. Nam dik fuli suu co asina ki ni u boy mamma, garaɗ suu tuguɗira ki lay.

¹⁷ Li ni ko Ezayi sa jok vun Lon dira na. «Ana nam yowoy ndak mayra u nekka vi tuguɗi mayra halaŋ kamu.»

Suu min a tuɗ kay ce Yesuna

¹⁸ Yesu wi suuna moli egem na ni, nam di suu haɗi mamma, «Jakaygi ha ki doŋ lumma ii hiŋŋa.»

¹⁹ Sa wi magaara gaɗta ɦuɗ tam egemu joɓom ana, «Malaŋ Haɗta, an min a tuɗ kay cereŋ hu li ma aŋ tuɗ huna halaŋ.»

²⁰ Yesu dam ana, «Bayakka zuluɗ ka lay, laygina ziisi kasi lay. Goŋ Sanna, li nam koɗ tam hu kaɗi.»

²¹ San dew duk suu haɗi mamma dam ana, «Bu Suuna, hinin an tuɗ pi bun ha ki tuwa.»

²² Yesu hoŋom dira ana, «Tuɗ ay unu. Hin suu pi maɗna, pi maɗ masina haa.»

Yesu doo babaana

²³ Yesu ful hu lumba fulni, suu haɗi mamma tuɗ umu.

²⁴ Cem cem gaw ni babaa ma ŋgolna fasiya. Mbona ka bilna usi hu lumba. Yesu buuri kaŋga senna usiya.

²⁵ Suu haɗi mamma ɦuɗ tasi egemu, dliɗim koloo, dam ana, «Bu Suuna, suɗumi kiyo. Aygi ba ki ni ge.»

²⁶ Yesu dasi ana, «Agi li ndaana ni kaymege. Agi suu viigira ka ŋgolɗina.» Nam col kolo col ni, bay babaana u mbona. Babaana ba ki kaŋga na yar ɦay, yona seŋ tam na yerek yerek.

²⁷ Asi lak na jim, ɓak duk tasi ana, «Sa namma ni gege? Babaana u mbona humum vunum lay ni nanage?»

Yesu dik fuli suu cona ki kay suuna mba'

²⁸ Yesu tew ha ki ŋgoo lumma Galilena hu mbassa vi suu Gadarena. Suuna mba' sel ay ki duk ussa, ŋgaf u namu. Suu asina u fuli suu cona kasiya, sa ka tli voɗ ndaɗta kosiɗi lay.

²⁹ Asi sawalla kolo ana, «Yesu Goŋ Lonna, aŋ min me egemi ge? Aŋ mba a lasami buu mamina bay ndak su?»

³⁰ Hu li namma kosoŋŋa moli cocoo ha ki egesi na ɦuɗ, ti tlena.

³¹ Fuli suu co asina joɓ Yesu ana, «Aŋ li a dikimi kiyo ni, hinimi ami cuk hu kosoŋŋa.»

³² Yesu ana, «Tuɗugiya.» Fuli suu cona sel ay ki hu suu mba' asina, cuk hu kosoŋŋa gaw. Kosoŋŋa halaŋ yow ay liŋŋa, mba cuk duk mbona, ba kaŋga halaŋ gaw.

³³ Suu taa kosoŋŋa yow ay liŋŋa, mba njaɗ boy namma ki ɦoŋzina, u dlara li ay eg suu fuli suu cona kasina lay.

³⁴ Suu ɦoŋzina halaŋ sel ay ki, mba ŋgaf ii Yesu, asi gijaŋ ɦuum ana nam tuɗa, hinisi mbas masira.