MATIYE 7 - Boy Lonana

Kaɓakŋa kay ndarayaŋŋaɗi

¹ «Kaagi ɓakŋa kay ndarayaginaɗi. Sa hin ka kaagi ɓakŋa kaɗi may.

² Lona hin kaagi ɓak magina ko agi ka ma vi suunana na may. Nam hin mba ŋgaagi dlaagira, ko tlesuu agi ŋgaasi duk tagina na may.

³ Aŋ gol usu ma ii wayaŋŋana ɗow ni, ka gol gu ma iriŋŋa ki fok jewɗi amege?

⁴ Aŋ di wayaŋŋa ana, Hinin an tlaŋ usu ma iriŋŋa kiyo, ni gu ma iriŋ taŋga aŋ ka wambi may ni amege?

⁵ Aŋ sa ma huruŋ mbambana giniŋŋa, tli gu ma iriŋ ki jewe, iriŋ mbuɗ wi ki jivi wa ni, aŋ hin tli ma ii wayaŋŋana ki tuwa.

⁶ «Ҥagi tlesuu teteɗ suu vi Lonna maŋ digininaɗi, kayme asi mbuɗ usi kagi, eɗegiya. Cuk herew magina fok kosoŋŋa a nam tayam ki kaŋga u sesiɗi.»

Cagi vun goŋga, halagiya, joɓogi lay

⁷ «Joɓogiya, agi hin fiya, halagiya, agi hin fi lay. Cagi vun goŋga, asi hin malagi lay.

⁸ San li joɓpa ni, hin fiya. San li halla ni, nam hin fi may. Sa ma ci vun goŋga, hin malam lay.

⁹ Sa ma ana goromma joɓom kay funana, nam hin ɦammi gogoyra su?

¹⁰ Li ni nam joɓom kay kulufna ni, nam hin ɦam guyna su?

¹¹ Agi suu cona wi a ɦal tlesuu jivina maŋ goryogiya, Bugi ma kolo huulona ɦal tlesuu jivina maŋ suu joɓomma ni nam ɗowɗi su?

¹² «Tlesuu agi min ana suuna lagisinana, agi lasisina na may. Ni tlesuu di ay ki hu gaɗta vi Moiz u magaara vi suu jok vun Lonna.»

Vun goŋga goora

¹³ «Cukugi kalafi hu vun goŋga goora. Vun goŋga sana kal huruɗ a ba kira ndaɗ ŋgol cocoo, voɗta tuɗ hura ŋgol coco may. Suu tuɗ huruɗna bolow coco lay.

¹⁴ Vun goŋga sana kal huruɗ a suɗ kira, ndaɗ gooro. Voɗta kal hura na keɗet daŋ. Suu tuɗ huna ka ŋgolɗi.»

Guna u vuɗumu

¹⁵ «Lagi tagi jivi ko suu kaboyna ana asi ni suu jok vun Lonna. Asi mba egegi ni, mbuɗ tasi ko timigiina na, doy hurusi kurufu ni, ko bosokona na.

¹⁶ Agi wasi ni u vuɗusiya. Aŋ sana ndoɗ vuɗ gamma a wayvirna su? Hin ndoɗ vuɗ tulumma a wayara su?

¹⁷ Gu ma jivina vuɗ ni jivi may, gu ma cona vuɗ ni co may.

¹⁸ Gu ma jivina vuɗum jivi may, gu ma cona vuɗum ka co may.

¹⁹ Gu ma vuɗum ka jiviɗina, kaam kiyo, ŋgalam ki kura.

²⁰ Ni na, agi wagi suu jok vun Lon cona ni u sun masira.»

«An wagi ay kaɗi»

²¹ «Suu yan ana, Bu Suuna, Bu Suuna, ka cuk hu Mulla huulonara belɗi. Suu li minda vi Bun ma huulona cuk hu ni asiya.

²² Buu namma ndak daa wa ni, suuna bolowo hin dan ana, Bu Suuna, Bu Suuna, ami jok boy maŋŋa ki maŋ suuna coco u seŋu, ami dik fuli suu cona ki u seŋ lay. Ami li dlara mbuɗ mbuɗta u seŋ coco lay.

²³ An hin dasi ana, An wagi ay kaɗi. Ҥuɗugi ha ki egen day, agi suu li dla cora.»

Ndal boyna kay ziginina mba'

²⁴ «Sa hum boy manna, li umma, tli tammi ko sa ma wi yalna ma min ziimba kolo kay ɦinira na.

²⁵ Lona siya, mbona tli cocoo, babaana paɗ kay zi ndaɗta lay. Zi ndaɗta ka bow kiɗi, kay ndaɗ mini kay ɦinira.

²⁶ Sa hum boy manna, ka li umbina, tli tammi ko sa ma giniŋŋa ma min ziimba kay ŋgetlna na.

²⁷ Lona siya, mbona tli cocoo, babaana paɗ coco kay zi ndaɗta, ndaɗ bow ki halaŋ gaw.»

Saɓakŋa vi Yesu

²⁸ Yesu daɓ bol mamba daɓmi, suu humumma lak na jim.

²⁹ Kaymege nam haɗasi wanni, ko sa um eŋŋa na, ka ko suu wi magaara gaɗta naɗi.