MATIYE 5 - Boy Lonana

Yesu paɗ bolla kolo kay ɦinira

¹ Yesu wi ana suuna mol ŋgolo ni, nam taɓa kolo kay ɦinira, kak kaɗu. Suu haɗi mamma mbay egemu,

² nam gijaŋ haɗta ana,

Jivira gasira

³ «Furira ka kay suu wi tasi hawra hurusi fok Lonna, Mulla huulonara ni masiya.

⁴ Furira ka kay suu tii tasina, Lona hin ɗilisi irisiya.

⁵ Furira ka kay suu ɗilina, Lona hin ɦasi ndaŋgara ni masiya.

⁶ Furira ka kay suu hal a li u minda vi Lona u hurusi halaŋŋa, nam hin hoɓosi u boy mamma.

⁷ Furira ka kay suu wi haw suuna, Lona hin wasi hahawasi may.

⁸ Furira ka kay suu hurusi haɓma, asi hin wi Lona u irisiya.

⁹ Furira ka kay suu loɓ tasi a heɓ duk gorsesina, Lona hin yasi a goryomu.

¹⁰ Furira ka kay suu suuna lasasi kay a li jivira ko Lona minda na, Mulla huulonara ni masiya.

¹¹ «Furira ka kagiya lini suuna ŋgulugiya, lasagiya, lagi ŋgeŋŋa u ka boyna kagiya, kayra agi ni suu mansinara.

¹² Furiyugiya, ayagiya kayme warak magina ha juɓugi kolo huulona. Asi las suu jok vun Lona ay fokogi jew ni na may.»

Vuvuna u kiɗikka

¹³ «Agi ni vuvuna duk suuna hu duliyara. Lini vuvuna yulumum ɓeŋ ki wa ni, aŋ hin mbuɗum yulumba ni u me olo ge? Ni nam ki ni ɓeŋiya, aŋ cukum ki daŋsaa, suuna tuɗ ki kamu.

¹⁴ «Agi ni kiɗikka duk suuna hu duliyara. Zi mini kolo kay ɦinira na, sa ndak a ŋgayam kiɗi.

¹⁵ Sana ka do pindilla, kuluɓuɗ ki kaŋgaɗi. Aŋ gaɓaɗ ki ni kolo na ɗow, a ndaɗ wi lina ki jiviya.

¹⁶ Agi a li kiɗikŋa fok suuna ni na may. Suuna wagi jivi magira na ni, asi geleɗ Bugi ma kolo huulona may.»

Yesu haɗ kay gaɗta basira

¹⁷ «Saaragi ana an mba ka a ɓeŋ gaɗta vi Moiz u ta vi suu jok vun Lona kiyo naɗi. An mba ka a ɓeŋeɗ kiɗi, mba faɗaɗ ki ni vunuɗu.

¹⁸ An dagi ni gasira. Boy Lonana ma ay jew ɓiiri dayna, ma goo na ew lay, ka ba kiɗi. Na gak gak, tew daɓ nduŋga.

¹⁹ Gaɗta vi Lonara lini ta goo ew lay, sana hiniɗ ki wa, haɗ suuna na lay, sa namma hin kaɗak ki hu Mulla huulonara. Sa ma hum u gaɗ ndaɗtana, haɗ maŋ suuna na lay na, sa namma hin mbuɗ sa ŋgolna hu Mulla huulonara.

²⁰ An dagi ana, Agi li ka hum vun Lona su suu wi magaara gaɗta u suu Farisennaɗi ni, agi ka kal hu Mulla huulonaraɗi.»

Yesu gaɗ suuna kay dlara duk ɦoŋosira

²¹ «Agi hum ana, Lona di somoyoy suu jewna ana, Aŋ ci maɗɗi. Sa ci maɗna na hin bay tuɗum ki fok suu kaɓakŋaɗi.

²² Anu, an dagi ana, Sa ma ɓeŋ hurum ki eg wayammana, hin bay tuɗum ki fok suu kaɓakŋaɗi. Sa ma ŋgul wayamma ana, Ka wi vaɗina, ɓak namma ka ni fok suu ŋgolo suu kaɓakŋa. Sa ma ŋgul wayamma ana, Puluɗiyana, ɓak namma ni gam duk kura.

²³ Lini aŋ ɦal va ma ɓivun maŋ Lona ni, humuŋ gaŋ wa ana wayaŋŋa hurum ay egeŋ ɓeŋiya ni,

²⁴ hin ɓivun maŋŋa uŋ tuwa, hoŋ eg wayaŋŋa, taɓ dukugi ay tuwa, hin hoŋ ay, li ɓivun maŋŋa maŋ Lona.

²⁵ «Lini sa yakaŋ wa a tuɗugi fun ɓakŋa ni, gagi ii dlaagira ha ki voɗ gaw. Li ka naɗi ni, nam ɦaŋ maŋ suu ɓakŋa, asi ɦaŋ maŋ asgaana, asi gaŋ daŋgayna.

²⁶ An daŋŋi gasi, Aŋ ka kal ki bunsu bay warak dlara kaŋga kiɗi.»

Yesu gaɗ kay boy zoŋga

²⁷ «Agi hum ana, Lona di somoyoy suu jewna ana, Aŋ li zoŋgi.

²⁸ Anu an dagi ana, Sa ma saa kay caŋ ndarammara ana ndaɗ irim jiviya ni, nam buu u ndaɗ u hurum wa.

²⁹ Iriŋga njuffa li tiniŋ hu cora ni ndaɗu ni, holoɗoɗ kiyo, gaɗ ha ki egeŋ day. Iriŋ ba ki dew ni, jivi su mayra gaŋ duk kura u mbalataŋ bella.

³⁰ Koŋŋa njufna li halaŋ dla cora ay kaŋŋi namu ni, kaam kiyo, gam ha ki egeŋ day. Koŋ ba ki dew ni, jivi su mayra gaŋ duk kura u mbalataŋ bella.»

Gaɗta kay bus ɗumba

³¹ «Boy namma di ay jew ana, Aŋ sa bus caaŋga kina, ɦaɗ magara bussa koɗu.

³² Anu, an dagi ana, Lini sana bus caamba ki bus, ka ana nam faɗ ay hu dlara zoŋgaɗi ni, nam mbuɗuɗ ki cara li zoŋga ni namu. Sa ma vi cara njufuɗ busuɗ ay kira, li ni zoŋga u ndaɗu.

Gaɗta vi Yesu kay suura

³³ «Agi hum ana, Lona di somoyoy suu jewna ana, Aŋ kaboy kay suu maŋgaɗi. Va ma aŋ suu taŋ fok Bu Suuna kamma, lamu.

³⁴ Anu, an dagi ana, Suurugiɗi. Suurugi u huulonaɗi, ni li kakŋa vi Lona.

³⁵ Suurugi u ndaŋgaraɗi, ni li Lona tin sem huna. Suurugi u zi Yerusalemmaɗi lay, kay nammi ɦoŋzina vi Mul ŋgolna.

³⁶ Suurugi u tlimiɗ yagiɗi lay, saɓak ma mbuɗ tlimiɗ yagi haɓma ka kogi su?

³⁷ Agi li ɓak duk tagiya ni, dlara aŋ laɗ kaɗi ni, aŋ di ana, An laɗ kaɗi. Dlara aŋ laɗ wa ni, aŋ di ana, An laɗu. Aŋ li tin vunuŋ ni u ɓakŋa ɦawaa ni, aŋ li ni dlaŋ Sa ma Conara.»

Gaɗta kay sa sugulna

³⁸ «Agi humugi ay fok jew ana, Sa cooŋ iriŋ ki wa ni, aŋ coom mamba ki lay, siimu kay siiŋ may.

³⁹ Anu, an dagi ana, Suu lagi cora egegina, sa sugulugi u asiɗi. Sa caŋ kiriŋiŋ ma njufna wa ni, aŋ pereɗ ma gulna, nam ci olo.

⁴⁰ Sa li a ndemeŋ baraw ma payaŋŋa ni, aŋ fokom ma egeŋŋa ha hu olo.

⁴¹ Sa ɦeɓeŋ wa ana aŋ tinim u vana ii kelew metrera dew ni, aŋ tuɗum kelew metrera mba'.

⁴² Sa joɓoŋ va koŋ wani, aŋ ɦamu. Li co maŋ sa mba ka balna koŋŋaɗi.»

Minigi suu babali magisina

⁴³ «Agi humugi ay fok jew ana, Aŋ min ndaraŋŋa ko aŋ min taŋga na. Noy babali maŋŋa kiyo.

⁴⁴ Anu, an dagi ana, Minigi suu babali magisina. Cen Lona kay suu lasagina.

⁴⁵ Agi li li na ni, agi hin mbuɗ ki goryoŋ Lo kolona. Nam ti fat mamba kay suu cona lay, kay suu jivina lay. Nam si yoom ay kay suu cona ko suu jivina na lay.

⁴⁶ Agi li min ni suu minigina doy hol ni, va ma agi hin fam ko Lonna ni mege? Suu vi taara li na layɗi su?

⁴⁷ Agi li gi deɓpa ni maŋ gorsegina doy hol ni, ni va ŋgol hu su? Suu ka goɓ Lonaɗina li na layɗi su?

⁴⁸ Lagi pasiyak ko Bugi ma kolo huulona pasiyakka na may.»