MATIYE 4 - Boy Lonana

Satanna hal a ndem Yesu

¹ Musuk Lonara tin Yesu ki ŋgoo bagiya a Satan ndememu.

² Yesu li buuna dok fiɗi, faali lay, njeŋge lay, ka ti vaɗi. Mayra mbuɗ camu.

³ Satanna mbay egem dam ana, «Aŋ li ni Goŋ Lonna ni, ɦinira wanni, aŋ mbuɗuɗ ki funa.»

⁴ Yesu hoŋom dira ana, «Ki ɓiiri ana, Sana ka kak iiriya kay funa sasakgi, kak iirira ni u boy ma vi Lonna.»

⁵ Satanna jokom um hu zi ma teteɗna, Yerusalem, kakam kay Ziŋ Lonara koloo

⁶ dam ana, «Aŋ li ni Goŋ Lonna ni, gi taŋ ay kaŋgaa, kayme ki ɓiiri ana, Lona hin sun suu mam suu sunda huulona aya, asi hin dlakaŋ ki kolo kosiya, ka hin a seŋ daɓ u ɦiniraɗi lay.»

⁷ Yesu dam olo, «Ki ɓiiri ana, Aŋ tuk taŋ u Lon Bu Suunaɗi.»

⁸ Satanna tuɗum kolo kay ɦinira fiyekka olo, nam takam mulla hu ndaŋgara halaŋ u bibiŋil masira,

⁹ dam ana, «Lini aŋ goɓ kaŋga fokonu ni, an ɦaŋsina halaŋ.»

¹⁰ Yesu dam ana, «Ҥuɗ taŋ ha kiyo, Satanna. Ki ɓiiri ana, Aŋ goɓmi Lona Bu Suuna dew daŋ, ka goɓ sa daŋgi.»

¹¹ Hu li namma Satanna hinimu. Asi suu sunda huulona mba eg Yesu, mbuɗ sunum ni na gaw.

Yesu gijaŋ di Boy Lonana ni hu mbassa Galilera

¹² Yesu hum ana Jaŋ ka daŋgayna ni, nam tuɗ hu mbassa Galilera.

¹³ Nam hin zi Nazaret ki tani, jok Kapernaum. Zi namma fun lumma Galilena, hu mbassa Zabulon u Neftalira.

¹⁴ Li ki ni va ma Ezayi sa jok vun Lona dam ana,

¹⁵ «Mbassa Zabulon u Neftali, Ii lum ma ŋgolna, ŋgoo lumma Yurdanna, agi ŋgaygi suu Galilena humugi haa!

¹⁶ Agi njaf suu duk ndufundana, hin wi kiɗikka ŋgolla. Agi suu duk ndufunda ko suu zolina na na, kiɗikka hin fagi lay.»

¹⁷ Hu li namma Yesu gijaŋ di boyna ana, «Jokogi hurugi ki jivi zeɗ. Mulla huulonara mba wa tok.»

Yesu yi suu ciwna fiɗi

¹⁸ Yesu tuɗ fun lumma Galilena wanni, nam wi suu ciwna mba', ni Simon (ma yam ana Piyerna) u wayamma Andre. Asi cuk bay masina goloŋ a ciwna.

¹⁹ Yesu dasi ana, «Tuɗugi ay unu. An hin mbuɗugi ki suu ciw suuna.»

²⁰ Cecemi asi hin bay masina ha ki tani, cuk tasi um gaw.

²¹ Ҥuɗ fok na nde ni, nam wi Jak, goŋ Zebedena u wayamma Jaŋ. Asi hu lumba u busi Zebede, cil ii bay masina. Yesu yasiya.

²² Cem cemi asi hin lumba ha u busi tani, cuk tasi u Yesu gaw.

²³ Yesu poy mbassa Galilera halaŋ. Nam haɗasi hu Zira Tokka, nam njaɗasi Boy ma Ayra kay Mulla huulonara. Nam garaɗ suu tuguɗira kiyo u suu dagina halaŋ.

²⁴ Sem Yesu tii ki hu mbassa Sirira halaŋ. Asi mbaaram njaf tuguɗira zeɗ zeɗ halaŋ. Suu fuli suu cona u suu lilira lasina u suu gugufuna, nam garaɗasi ki halaŋ.

²⁵ Suuna mok um na zomolok, suu Galilena, suu ay hu mbassa Zi ma Doogona, suu Yerusalemma, suu Yudena, u suu ay ŋgoo lumma Yurdanna lay.