MATIYE 3 - Boy Lonana

Bolla vi Jaŋ ma mbus batem maŋ suuna

¹ Hu buu namma, Jaŋ ma mbus batemma maŋ suuna kal ay ki ŋgoo bagi hu mbassa Yudera. Nam sawalla

² ana, «Jokogi hurugi ki jivi zeɗ. Mulla huulonara mbawa tok.»

³ Jaŋŋi sa ma Ezayi ma jok vun Lona di ki kam ana, «Del sana sawalla ki ŋgoo bagiya, Ɗoɓogi voɗta vi Bu Suunara kiyo, Mbuuɗ huruɗ kiyo.»

⁴ Jaŋ baraw mamma cili ni u tlimiɗ jamballa, gandina njuni hurumu. Tlesuu nam tasina ni baarina u mbul yumma ki ŋgoo bagiya.

⁵ Suu Yerusalemma u suu hu mbassa Yudera u suu fun lumma Yurdanna mbay egem halaŋ.

⁶ Asi yi coosira ki u vunusiya, nam mbususi batemma duk mbo lum ma Yurdanna ni na gaw.

⁷ Jaŋ wi suu Farisenna u suu Sadusenna mbay egem coco ana nam mbususi batemma na ni, nam dasi ana, «Agi njaf guy magira, sa haɗagi a agi puruɗ tagi ki ko yara vi Lonara ni gege?

⁸ Lagi dlara jivira a tak ana hurugi ki joki zeɗ.

⁹ Saaragi hurugi ana, Abraham ni bumiya naɗi. An dagiya, Lona ndak a mbuɗ ɦinira ki a goryoŋ Abrahamma layɗi su?

¹⁰ Njetna ka gira a ka sari gugunina kiyo, gu ma vuɗum ka jiviɗi na, kaam kiyo, gam ki duk kura.

¹¹ An mbusugi batemma duk yona a tak ana hurugi mbuɗ ki zeɗ. Sa ma mbay ŋgoron daganna, hin mbusugi batemma u Musuk Lonara, u kura may, kay dlam ŋgol suunu. An ndak ka a ziirim tuɓuru mammaɗi lay.

¹² Kaalam mamba feɗ wa blena ka komu, vaa ma neeyna, cukum hu veena, barra nam hin ŋgalaɗ ki duk kura ka miɗɗira.»

Yesu mbus ki batemma

¹³ Yesu col ay hu mbassa Galilera tuɗ hu lumma yam ana Yurdanna mba eg Jaŋ ana nam mbusum batemma.

¹⁴ Jaŋ cam wayra ana, «Aŋ a mbusun batemma ni aŋ ɗowɗi su? Aŋ mbay egen na ɗow su?»

¹⁵ Yesu hoŋom dira ana, «Hin na ta! Mbusun ɗow. Ay li wa na ni, dlara Lona miniɗta.» Jaŋ hurum viya, mbusum batemma gaw.

¹⁶ Yesu fi batemma fi ni, a ɗuŋ ay ki kolora wanni, huulona mal ki gaw. Nam wi Musuk Lonara si ay kam ko gugukka na.

¹⁷ Della ɓak ay kolo huulona ana, «Wanni goron ma an minimma. Nam irin jivi ɦay.»