MATIYE 2 - Boy Lonana

Suu wi dlara u ciciwra yow ay u lo maɗiina a gol Yesu

¹ Yesu vuɗ Betlehem hu mbassa Yudera. Ni hu li ma Herod a mul masina. Suu wi dlara u ciciwra yow ay u lo maɗiina, mbay Yerusalem.

² Asi joɓ ana, «Mulna vi suu Juif ma vuɗ wilina ka ni arage? Ami ay u lo maɗiina, wi ciciwra ay kamu, ami mbay a goɓ ga fokomu.»

³ Mulna Herod hum na ni, vundikim ɓigim kay boy namma, u suu mamsina halaŋ.

⁴ Nam tok muli suu li ɓivunna u suu wi magaara gaɗta ay egem wanni, joɓosi kay li ma Sa Lona Fuurumma vuɗ huna.

⁵ Asi dam ana, «Nam hin vuɗ Betlehem hu mbassa Yudera. Ni dlara sa jok vun Lona ɓiiriɗ ay ana,

⁶ Betlehem, ni zina hu mbassa Yudera, ni ka zi ma goonaɗi. Kayme mul ma hin a tuɗ fok suu man suu Israelna, hin vuɗ ni huwa.»

⁷ Nam mulna Herod yi suu wi dlara ay egem ŋgaya, nam joɓosi ana asi wi ciciwra ni saɓage.

⁸ Nam tinisi hu voɗta Betlehemba, dasi ana, «Tuɗugi halagi goo namma. Agi fam ay wa ni, mbay danu, an tuɗ goɓ ga fokom may.»

⁹ Asi hum boy ma mulna dasinana hummi, cuk tasi gaw. Ciciw mayra asi waɗ ay u maɗiinara tuɗ ha fokosiya, ndaɗ i col kay zira goona ka hura.

¹⁰ Asi wi ciciwra na ni, hurusi furi cocoo.

¹¹ Asi sel kalafi hu zira, wi goona ko sum Mari. Asi goɓ kaŋga fokomu. Asi buɗ tlegeyesi ki buɗ ni, ɦam lorra may, mbitla may, mbul ma his jivina may.

¹² Asi buu njeŋge wanni, Lona dasi hu doyra ana asi hoŋ voo wanni, tli kay mulna Herod oloɗi. Asi wi na ni, tli voɗta daŋga gaw.

Somoyoŋ Yesuna pii u nam hu mbassa Egipte

¹³ Suu wi dlara u ciciwra tuɗ tuɗ ni, sa sunda huulona di doyra maŋ Yosef ana, «Col koloo! Tli goona u sumu, piirigi hu mbassa Egipte. Aŋ kak hu mbas ndaɗta gak gak, an hin daŋ tuwa, kayme Herod hal goona a cam kiyo.»

¹⁴ Yosef col koloo duk njeŋgera, tli goona u sumu, tuɗ hu mbassa Egipte gaw.

¹⁵ Nam kak hu na gak gak, Herod miɗ ki tuwa. Dla ndaɗta li na ni u njaɗ mayra Bu Suuna daɗ maŋ sa jokom vunumma ana, «An yi goronna ay ki hu mbassa Egipte.»

Herod ci gorkemba kiyo

¹⁶ Herod wi ana suu wi dlara ganam yam mi ganiya ni, hurum ɓeŋ ki cocoo. Nam cuk suu mamma ana ci gor njufi suu vuɗ wilina u suu basaɗasi tew mbambana kiyo. Ni kayra suu wi dlara dam ana asi wi ciciwra ni hu basa ndaɗta.

¹⁷ Li ki ni dlara Jeremi, sa jok vun Lona, daɗta ana,

¹⁸ «Asi hum soora u tii ma hahawra hu zina Rama. Rakel tii ni kay goryoɗu. Ndaɗ ka min ana sa heɓeɗ huruɗɗi. Kay goryoɗ ki miɗiya.»

Somoyoŋ Yesuna hoŋ ay mbeera voo

¹⁹ Herod miɗ ki miɗ ni, sa sunda huulona hoŋ di doyra maŋ Yosef hu mbassa Egipte,

²⁰ ana, «Col koloo! Tli goona u sumu, hoŋogi hu mbassa Israella. Suu hal a ci goona kina, miɗ ki wa.»

²¹ Yosef col koloo, tli goona u sumu, hoŋ ay hu mbassa Israella.

²² Nam hum ana goŋ Herodna sem ana Arselaus mbuɗ a mulna hu mbassa Yudera balam bumu ni, nam li ndaana a hoŋ hura. Doyra hoŋ takamu, nam tuɗ hu mbassa Galilera,

²³ kak hu zina yam ana Nazaret. Li ki ni va ma suu jok vun Lona damma, «Suuna hin yam ana sa Nazaretna.»