MATIYE 12 - Boy Lonana

Yesu u buu ma vi Lonna

¹ Buu dagan ca ni, Yesu jak tuɗta duk senena hu buu ma vi Lonna. Suu haɗi mamsina mayra casi wanni, asi kus yam wana kosi muɗumu.

² Suu Farisenna wasi na ni, asi di Yesu ana, «Gol suu haɗi maŋsina, li dlara gaɗ mayra doo ki kaɗ hu buu ma vi Lonna gige!»

³ Yesu dasi ana, «Dlara David laɗ u suu mamsina hu li mayra casina, agi bay waɗ hu magaara tu su?

⁴ Nam kal hu zira vi Lona u suu mamsina, ti fu ma li ɓivunna maŋ Lona u namma. Fu namma suu li ɓivunna tammi asi doy hol.

⁵ Suu li Ɓivunna li sunda hu Ziŋ Lonara hu buu ma vi Lonna, ni sun ndaɗta ka ŋgaay kasi coɗi lay. Agi bay ndum boy namma hu gaɗta vi Moizza tu su?

⁶ An dagi ana va ŋgol su Ziŋ Lonara ka tani.

⁷ Lini agi wagi va ma ɓiira di kamma ni, An min ɗegeera hu sanara, ka ɓivun ma yoorinaɗi. Agi kaɓak kay suu li co kaɗinaɗi.

⁸ Goŋ Sanna ni malaŋ buu ma vi Lonna.»

Yesu garaɗ sa kom miɗina kiyo

⁹ Yesu tuɗ foko, kal hu Zira Tokka.

¹⁰ Nam fi sa ma kom ki miɗina huwa. Suu lakina duum delemu, joɓom ana, «Hu gaɗ mayra ni, ay ndak a mbuɗ sana ki jivi hu buu ma vi Lonna su?»

¹¹ Yesu dasi ana, «Dukugi tani, sa timii mamba kom dew, ndi hu giriŋŋa hu buu ma vi Lona ni, nam ka tlaɗ ay ki koloɗi su?

¹² Sa warna ka su timiiraɗi su? Gaɗ maygira ni ana li jivira eg sana hu buu ma vi Lonna.»

¹³ Yesu di sana ana, «Maɗ koŋ kiyo.» Nam maɗam ki na ni, kom mbuɗ ki jivi ko ma hiŋŋa na may.

¹⁴ Suu Farisenna sel ki sel ni, tuɗ gi gagara a hal voɗta ci Yesu kira.

Sa ma Lona manam kay sun mambana

¹⁵ Yesu hum ana asi min a cam kiyo ni, nam hin li namma ki gaw. Suuna tuɗ um bolowo. Nam garaɗ suu tuguɗira ki halaŋ.

¹⁶ Nam dasi u eŋga ana asi dam dlam ki maŋ suunaɗi.

¹⁷ Dla ndaɗta li ki ni u boy ma sa jok vun Lona Ezayi damma.

¹⁸ «Lona di ana, Gola ni sa an manam kay sun mandana. An minim cocoo, hurun furi kam may. An hin sirim Musuk manda ay kamu. Nam hin di dla kaɓak manna ki maŋ suuna halaŋ.

¹⁹ Nam ka hoo vun u saɗi lay. ka sawal na gor gorɗi lay, ka ɓak boy ma fiyek voɗɗi lay.

²⁰ Cerew ma gunina nam ka kusum kiɗi, kura vi ew ewra nam ka caɗ kiɗi. Nam hin li na gak gak, ɗegeera mbuɗ su cora.

²¹ Suuna halaŋ hin tin saa masira kamu.»

Yesu hoŋ dira kay yakka suuna yakamba

²² Asi mbaa sa dugi may, ndumu mayna, ay fok Yesu, kayme ful ma cona kamu. Yesu mbuɗ sa namma ki ɓakka, malam irim ki may.

²³ Suu moli cocona vundikisi paɗ ki na fak, ana, «Ni ka Goŋ Davidnaɗi su?»

²⁴ Suu Farisenna hum na ni, asi ana, «Sa namma dik fulina ki wanni, Beelzebul, mul fulina, ɦam saɓakŋa ni namu.»

²⁵ Yesu wasi saa masira na ni, dasi ana, «Ko suu kay mulla dewra li duu duk tasiya ni, mul masira hin ɓeŋ kiyo. Suu hu zinana li duu duk ɦoŋ tasiya ni, zi namma ka liɗi.

²⁶ Lini Satan dik ndaramma kiyo ni nam duu ni duk tamu, ɓorow irim ki wa ni, mul mamba hin li nanage?

²⁷ Agi viɗ tagi ana an dik fulina ki ni u Mul masina, Beelzebul, ni, goryogi dikisi ki ni u me may ge? Sa ɦasi saɓak namma ni gege? Kay ndaɗta asi hin kaagi ɓakŋa ni asiya.

²⁸ Gasira ni an dik fulina ki ni u Musuk Lonara, ni ana Mul Lonara mba dukugi wa.

²⁹ «Sa saɓakŋa aŋ ka kal varam a yowom tlegeyem bay ɗagam ki kaŋgaɗi. Aŋ ɗagam ki kaŋga wani, aŋ ndak a yowom tlegeyem halaŋ ni na tuwa.

³⁰ «Sa ka tuɗ unɗi na, ni babali manna. Sa ka taɓ tlegeyem u anɗi na, ni nam njayasi ki ni ɦawaa.

³¹ Kay ndaɗta an dagi ni gasira, Lona ndak a daɓ cora u ŋgulla vi suunara ki halaŋ. Sa ma ŋgul Musuk Lonara, coomba hin egem a fafatɗa, ka daɓ kiɗi.

³² Sa ɓak co kay Goŋ Sanna, coomba hin daɓ kiyo. Sa ɓak co kay Musuk Lonara, coomba ka daɓ kiɗi a fafatɗa.»

Guna u vuɗumu

³³ «Pi gu ma jivina wani, nam vuɗ ni jivi may. Ma cona vuɗ co may. Ay wasi ni u vuɗusiya.

³⁴ Agi njaf magirana. Agi cora may ni, fi boy ma jivina ni arage? Vunna di ki ni va ma ay oy huu sanna.

³⁵ Sa hurum jivina fi tlesuu jivina u jivi mamba may. Sa hurum cona fi tlesuu cona u coomba may.

³⁶ An dagi anaba, Hu buu ma kaɓakŋa Lona hin joɓ suuna kay dlara dawira asi njaɗaɗta halaŋ.

³⁷ Aŋ fi ɓak ma jivina ni u boy ma aŋ dam jivina, ma cona ni u boy ma aŋ dam cona may.»

Suuna joɓ Yesu kay dlara mbuɗta

³⁸ Suu ɦiw duk suu wi magaara gaɗta u suu Farisenna di Yesu ana, «Mala Haɗta, ami min ana aŋ lami dlara mbuɗta dew.»

³⁹ Yesu hoŋosi dira ana, «Agi njaf ma cona, hurugi ka tini kay Lonaɗi, joɓ dlara mbuɗta ni a mege? Dlara mbuɗta daŋ ta an takagi sura vi sa jok vun Lona, Jonas, kaɗi.

⁴⁰ Ko Jonas li buuna hindi hu kuluf ma ŋgolna na, Goŋ Sanna hin li buuna hindi hu zulla may.

⁴¹ Suu Ninivena hum boy ma vi Jonas na ni, asi jok hurusi ki zeɗ gaw. Kay ndaɗta hu buu ma kaɓakŋa, asi yow kolo, ɓak co kagiya. Cem cemmi sa su ki kay Jonasna ka dukugiya.

⁴² Ca mulla col ay dali day, mba eg Salomon a hum boy ma jivi ma funumma. Ni kay ndaɗta hu buu ma kaɓakŋa, ndaɗ hin col kolo, ɓak co kagiya. Cem cemmi sa su kay Salomonna ka dukugiya.»

Ful ma cona hoŋ kay sana

⁴³ «Ful ma cona hu sana, kal ay ki kal ni, tuɗ ŋgoo bagiya, a hal li ma nam buu huna. Nam fi li ay ka kambi.

⁴⁴ Nam ana, An min hoŋ hu ziin ma an hinim ha ki na. Nam hoŋ ay wanni, fi sa ka hu ziimbi, ziim ki tori jiviya.

⁴⁵ Ful ma cona hoŋ hal gorsemma ay um kiɗisiya, suu asina dlasi co suumu. Hoŋ ay ko tasi, cuk hu zi ndaɗta. Kay ndaɗta sa namma mbuɗ ki co su jewra. Dla ndaɗta hin li kagi agi suu co wanna.»

Su Yesu u gorsemma

⁴⁶ Yesu ɓak maŋ suuna tu na ni, sum u gorsemma mbaya. Asi lak ha ki bunsu, a hal Yesu a njaɗ u namu.

⁴⁷ Sa maa dew di Yesu ana, «Aŋ gola, suŋ u gorseŋŋa ka halaŋ kiɗik a njaɗ u aŋu.»

⁴⁸ Yesu di sa namma ana, «Sun ni gege, gorsen suurage?»

⁴⁹ Nam tak kom kay suu haɗi mamsina di ana, «Gola ni sunu u gorsenna.

⁵⁰ Sa ma li u minda vi Bun ma kolo huulona, sa namma ni wayanna, wayanda u sunu.»