MATIYE 10 - Boy Lonana

Suu doogo yam mbana

¹ Yesu yi suu haɗi mam suu doogo yam mbana, ɦasi saɓak ma dik ful ma cona, garaɗ suu tuguɗira u suu dagina ki lay.

² Ni sem suu doogo yam mbana, Jew ni Simon (ma yam ana Piyerna) u wayamma Andre. Jak u wayamma Jaŋ, goryoŋ Zebedena.

³ Filip u Bartelemy, Tomas u Matiye, ma vi taara, Jak goŋ Alfena u Tadde.

⁴ Simon ma min buɗ suu mamsina kina, u Yudas ma Iskariyotna, sa ma gus Yesu kina.

Yesu sun suu mam suu doogo yam mbana

⁵ Yesu sun suu mam suu doogo yam mbana, gaɗasi ha ana, «Tuɗugi hu mbassa daŋgi, tuɗugi hu mbassa Juiffa doy hol. Kalagi hu zi Samarinaɗi.

⁶ Tuɗ halagi timigii suu ki viɗina hu mbas magira doy hol.

⁷ Agi tuɗugi voɗ wanni, ɓak ha irigi ana, Mulla huulonara hin tok.

⁸ Garaɗ suu tuguɗira kiyo, dliɗ suu miɗina koloo, mbuɗ suu busuna ki jiviya, dik ful ma cona ki lay. Agi fi saɓak namma ni ɦawaa, ɦa kina ha ki ɦawa may.

⁹ Tli lor kogiɗi, tli doono kogiɗi lay, yow gursu kogi hu mbumburaɗi lay.

¹⁰ Yow mbumbu kogiɗi lay. Yow baraw kogi mba'ɗi lay, yow tuɓuruɗi lay, tli tokolo kogiɗi lay. Kayme sa sunda fi tiimma ni u sun mamba.

¹¹ «Zi ma agi cuk huna, gologi ni sa ma vagi varamma. Zira agi buu hura, bay agi jok ugi hu zi ma daŋ ba ni, jok ugi ki hura daŋgi.

¹² Zira agi cuk hura, dagi ana, Heɓpa li hu zi ndaɗta.

¹³ Suu hu zi ndaɗtana vagi jivi wa ni, heɓ magira hin kak u asiya. Asi vagi kaɗi ni, ndaɗ hin hoŋ ay kiyo.

¹⁴ Agi sel hu zi ma asi ka min vagi varasiɗina wa ni, ka min a humugi vunugiɗi lay ni, tuɗugiya, poogi gugum ma segina kaki hu zi namma.

¹⁵ An dagi ni gasagi ana, Hu buu ma kaɓakŋa, zi namma hin wi hawra su zi ma Sodom u Gomor may.»

Lassa hin mba kay suu vi Yesuna

¹⁶ «Humugi jiviya. An sunugi ha ni ko timigiina duk bosokona na. Lagi neeyra ko guygina na, ɗili ko gugukka na may.

¹⁷ Lagi tagi jiviya. Suuna hin tuɗugi fun ɓakŋa. Asi hin poŋogi u balafna hu Zira Tokka.

¹⁸ Asi tuɗugi fok suu ŋgolona u mulina kay senu. Fok suu Juifna u suu ɦawana lay ni, agi ni suu vovoɗ manda.

¹⁹ Asi yowogi fok suu kaɓakŋa wa ni, saaragi ana va ma agi hin nda ɓakamma ni mege naɗi. Boy ma agi damma hin kal ay hurugini hu li namma na gaw.

²⁰ Agi ka dam vaydegegiɗi, ɓak ay funugi ni, Musukka vi Bugi Lonara.

²¹ «Hu li namma sana ɦal wayamma ki fun maɗna lay, bu goona hin ɦal goromma ki na lay. Kemba hin hoŋ irisi eg somoyosi a casi ki lay.

²² Suuna halaŋ hin tinigi ira ki kanu. Sa ma tin hurum kanna din din na, faɗ ha ki na faɗ na, nam hin suɗ kiyo.

²³ Asi li lasagi hu zi ma wanna ni, jok ugi hu ma daŋŋa. An dagi ni gasagi, agi ka ŋguf hu zi Israelna ki halaŋ jew bay Goŋ Sanna mbaɗi.

²⁴ «Sa haɗta ka ŋgol su sa haɗammaɗi. Gogoo ma sunda ka su malammaɗi.

²⁵ Sa haɗ fok sanna hin mbuɗ ko sa haɗamma na, gogoona hin mbuɗ ni ko malamma na may. Asi yi mala zina ana Beelzebul, mul fulina, ni suu mamma asi hin yasi ni an me olo ge.»

Li ndaana ko gege?

²⁶ «Lagi ndaana ko suunaɗi. Va yam ki baarina suuna hin wam kiyo. Boy ma ki ŋgayna um hin gi ki lay, ɗowba tlesuu dluri kaŋgana halaŋ, usi hin wi ki lay.

²⁷ Gaɗta an dagira duk njeŋgera, daɗ ha ki faaliya. Boy ma hosoki humugina, sawal boy namma ha ki koloo.

²⁸ Lagi ndaana ko suu ci mbalatara ɦawanaɗi, ndak ka a ci iiriraɗi. Lagi ndaana fok Lona ɗow. Nammi sa ba mbalatara u iirira ki duk kura na.

²⁹ Agi gus layɦira mba' ni suŋgu dewɗi su? Taa dew ka ndi kaŋga bay Bugi Lona waɗɗi.

³⁰ Agi may ni tlimiɗ yagi halaŋ ki ndumiya.

³¹ Lagi ndaaɗi. Agi ŋgolo su layɦira.»

Sa ma di ki kay Yesuna u sa ma tin vunum kamma

³² «Sa ma di ki kan fok suuna ana an ni saamma na, an hin di ki kam fok Bun ma huulona ana nammi manna may.

³³ Sa ma tin vunum kan fok suuna ana nam ka wanɗi na, an hin tin vunun kam fok Bun ma kolo huulona ana an ka wambi may.»

Ka heɓpaɗi, ni duuna

³⁴ «Saaragi ana an mbaa ni heɓpa hu duliyara naɗi, an mbaa ka heɓpaɗi, may ni duuna.

³⁵ An mba ni a bus duk goona ki u bumu, goora ki u suɗu, cara ki u kunuɗta.

³⁶ Suu hu deera dewra mbuɗ honira duk tasiya.

³⁷ «Sa min bum u sum suunna ka ndaki kanɗi. Sa ma min gorom u goromba suunna ka ndaki kanɗi.

³⁸ Sa ma zii gu garak mamma, tuɗ ka unɗi na, ka ndaki kanɗi.

³⁹ Sa ma min iiri mamba kay tamma, ndaɗ hin ba kiyo, sa viɗ iiri mamba ki kanna, nam hin faɗ may.»

Suu vi suuna varasi u sem Yesuna, Lona warakasiya

⁴⁰ «Sa vagi varamma, van ni anu. Sa van varamma vi ni sa ma sunun ayna may.

⁴¹ Sa ma vi sa jok vun Lona varam ana nammi sa jok vun Lonaɗi su na, sa namma Lona hin warakam ko sa jok vun Lona na may. Sa vi sa ma ɗegee ma vi Lonna varam ana nammi sa ma ɗegee ma vi Lonnaɗi su na, sa namma Lona warakam ko sa ɗegee namma na may.

⁴² An dagi ni gasagi ana, Sa ɦal yona maŋ gogoona duk suu manna ana nammi saannaɗi su na, warak mamma ka viɗ kiɗi.»