MARK 8 - Boy Lonana

Yesu ɦal funa maŋ suuna bup bup fiɗi

¹ Fali ndaɗta suuna moli eg Yesu cocoo. Vaasi ma ti kaɗi, ni Yesu yi suu haɗi mamsina ay egemu, dasi ana,

² «Suuna mbuɗ irin hahaw ɦay. Asi li buuna un ca ni hindi. Va ti funusi ka oloɗi.

³ Lini an hinisi tuɗ vo u mayra ni, suu ziisi day dayna ka duk lay, asi hin say ha ki voɗo.»

⁴ Suu haɗi mamsina hoŋom dira ana, «Sana fi fu ma hoɓ suu wanana ki duk gura bagi ni arage?»

⁵ Yesu joɓosi ana, «Funa kogi gage?» Asi ana, «Funa kiɗisiya.»

⁶ Yesu di suuna ana, «Mologi kaŋgaa.» Nam yow fu ma kiɗisiyana komu, gi deɓ Lona kamu, nam ɓorowom irim ki duk ɓorow ni, ɦam maŋ suu haɗi mamsina ana ɓorowom ha ki maŋ suuna. Asi ɓorowom ki gaw.

⁷ Kuluf ma gorina ka kosi nde may. Yesu gi deɓ Lona kamu, ɦasina asi ɓorowom ha ki maŋ suuna lay.

⁸ Suuna halaŋ ti funa, hoɓ ki lay. Suu haɗina taram umba hinda, oy kaalamina kiɗisiya.

⁹ Suuna ii va ma bup bup fiɗi. Yesu dasi ana, Tuɗugi vo ɗaŋ.

¹⁰ Na ɗaŋi nam ful hu lumba u suu haɗi mamsina. Asi tuɗ hu mbassa yaɗ ana Dalmanuta.

Suu Farisenna joɓ Yesu ana lasi dlara mbuɗta

¹¹ Suu Farisenna mbay eg Yesu, gijaŋ ciwayra u namu. A duum delemba, asi joɓom ana nam lasi dlara mbuɗta a takasi saɓakam ma col ay kolo huulona.

¹² Yesu zam na ɦuu, hin dasi ana, «Suu cukuni asina hal dlara mbuɗta ni a mege? An dagi ni gasira, dlara mbuɗ ka li maŋ suu asina oloɗi.»

¹³ Nam hinisi tani, gi tam hoŋ ful hu lumba, ɗiŋ ha ki ii lum ma hiŋŋa gaw.

Kuffa vi Farisenna u ta vi Herodta

¹⁴ Suu haɗina maa ay bay yow mappa kosiya. U mappana kosi hu lumba na dew ɗaŋ.

¹⁵ Yesu gaɗasi ana, «Lagi tagi jiviya! Fuɗugi tagi ko kuffa vi suu Farisenna u ta vi Herodta.»

¹⁶ Suu haɗina hosok tasi ana, «Nam ɓakŋi kay mappa ka koygiɗira.»

¹⁷ Yesu wasi asi hosok tasi na ni, nam dasi ana, «Agi ɓak duk tagi ana an di ni kay mappa ka koygiɗira ni nanage. Agi hum ka tuɗi su? Agi ka wi kagiɗi su? Yagi eŋ coco ɦay su?

¹⁸ Irigi kagi a wira, agi ka wiɗi su? Humugi a humba, agi ka humbi lay su? Humugi ka gagiɗi su?

¹⁹ Falira an ɓorow fu ma vadlna maŋ suu bup bup vadlna, agi taaram umba hinda yow kaalamina ni gage?» Asi hoŋom dira ana, «Doogo yam mba.»

²⁰ Yesu dasi olo ana, «Falira an ɓorow fu ma kiɗisiyana maŋ suu bup bup fiɗina, agi taaram umba hinda oy kaalamina ni gage?» Asi dam ana, «Kiɗisiya.»

²¹ Yesu dasi ana, «Agi bay hum tu olo su?»

Yesu mal ii sa dugina kiyo

²² Yesu u suu mamsina tew hu Betsaida. Asi mbaa sa irim dugina ay fokomu. Asi joɓom ana nam ŋgenemu.

²³ Yesu vi ko sa dugina, tuɗ doŋ kaana u namu. Nam doom yoyona irimu, cuk kom kam may, nam joɓom ana, «Aŋ wi va su?»

²⁴ Sa dugina tli irim koloo, hin di ana, «An wi suuna tuɗ ko ŋgusugina na.»

²⁵ Yesu cuk kom kay irim olo. Sa dugina gol irim ha duk gayra na ɗegee, nam mbuɗ wi ki jiviya.

²⁶ Yesu dam ana, «Aŋ tuɗ voo. Tli ɦoŋzinaɗi.»

Piyer di ki kay Yesu ana nammi Sa Suɗta

²⁷ Yesu u suu haɗi mamsina tuɗ irisi ha ɦoŋzina pay zi ma ŋgolona Sesare vi Filip tok. Asi hu voɗta wanni, nam joɓ suu haɗi mamsina ana, «Suuna ɓak kan ana an ni gege?»

²⁸ Asi hoŋom dira ana, «Suu ɦiw ana aŋŋi Jaŋ ma mbus batem maŋ suuna, suu hiŋŋa ana aŋŋi Eli, suu hiŋŋa olo ana aŋŋi duk suu jok vun Lonna.»

²⁹ Yesu joɓosi ana, «Agi may ni? Agi di kan ana mi may ge?» Piyer hoŋ dam ana, «Aŋŋi Sa Lona Fuurumma.»

³⁰ Yesu dasi ana asi gam um ki maŋ saɗi.

Yesu di ki kay miɗ mamma u paɗ mamba kolora

³¹ Yesu gijaŋ haɗasi ana, «Goŋ sanna hin fi lassa cocoo. Suu ŋgolona u muli suu li ɓivunna u suu wi magaara hin noyom kiyo. Asi hin cam kiyo. Hu buu ma hindina nam hin paɗ ki kolo iiriya.»

³² Nam dasi boy namma ki ni na ɗal ɗal. Piyer yam ay ki keŋ yi ni, yalamu.

³³ Yesu pereɗ irim eg suu haɗi mamsina, golosi na ni, yal Piyer ana, «Ҥuɗ taŋ ha ki ŋgoron day, Satanna. Saaraŋ ka kora vi Lonara naɗi. Ni vi suu warna.»

³⁴ Ŋgoo daganda Yesu yi suuna ay u suu haɗi mamsina, dasi ana, «Lini sana min a tuɗ kay cerenu ni, saa kay tambi, nam tli guum ma garakŋa, tuɗ ay unu.

³⁵ Sa min suɗ iiri mambana, ndaɗ hin ba kiyo. Sa ma ba iiri mamba ki kan may, kay Boy ma Ayra mayna, nam hin suɗuɗu.

³⁶ Sana li ana tlesuu kay ndaŋgarana halaŋ li ni komu ni, nam ba iiri mamba ki wani, tlesuu asina hin mbuɗum mege?

³⁷ Va sana fam a mbuɗ iiri mamba ni mege?

³⁸ Lini sana li zolona kanu, kay boy manna lay, fok suu cukunina ni, suu li zoŋgana lay, li cora lay, Goŋ Sanna hin li zolona kam may, falira nam mbay u saɓakŋa vi Bumma u suu mam suu sunda huulona may.»