MARK 7 - Boy Lonana

Yesu ciwayra u suu Farisenna kay dlaasira

¹ Suu Farisenna u suu wi magaara col ay Yerusalem, asi mba tok kaŋga eg Yesu.

² Asi gol suu haɗi suu vi Yesu suu ɦiw ti funa kosi bay mbussa. Bay mbussa ko gaɗ masira na.

³ Suu Farisenna u suu Juifna halaŋ ka ti fu bay mbus kosi ki jiviɗi, kay asi vi ni vun somoyosiya.

⁴ Asi li ay u sukŋa mba voo wani, yorok yo kasi nde, ti funa tuwa. Asi vi vun somoyosi kay tlesuu daŋŋa coco lay, ko ndal mbus tlesuu cira, u doygina, u ŋgalina u gegelina.

⁵ Suu Farisenna u suu wi magaara joɓ Yesu ana, «Suu maŋsina ka li ko somoyogi suu jewna naɗi amege? Asi ti funa bay mbus kosi ki ni kay mege?»

⁶ Yesu hoŋosi dira ana, «Agi suu hurugi mbambana, Ezayi di ki jew kagi na ni u voɗoɗu. Lona ɓak ana, Suu dee ndaɗta ŋgaan u vunusiya, hurusi ki egen day.

⁷ Asi lan un ni gaa fokon ni ɦawaa. Boy ma suuna ɓakamma ni haɗta vi suuna ɦawaa, asi vam ni ko Boy ma vi Lonna na.»

⁸ Yesu di ana, «Agi hinigi gaɗta vi Lonara ki tani, lagi ni boy ma vi suunana.»

⁹ Yesu dasi olo ana, «Agi gi gaɗta vi Lonara ki ni, a lagi dlaagira kay tagira.

¹⁰ Agi gola Moiz di ana, Tli yam buŋ u suŋ koloo. Nam hin di hu olo ana, sa pan bum u summa cam ki ciya.

¹¹ Gola agi gaɗ ana, Sa di maŋ bum u sum ana, Tlesuu an hinisi a njunugi gin na, an ɦasi ki maŋ Lona a purra wa.

¹² Ni agi ɦal voɗta ana sa tli yam bum u sum koloɗi, naɗi su?

¹³ Dlaagira agi haɗ suuna u ndaɗta, agi mbuɗ boy ma vi Lona ki lalasi. Agi li tlesuu daŋŋa coco ko dla ndaɗta na lay.»

Tlesuu ɓeŋ sana, mbuɗum ki njenjena

¹⁴ Yesu tin um yi suuna ay egem, dasi ana, «Humun ki vunun haa, wagi u boy namma ki jivi may.

¹⁵ Va ma col ay bunsu, mba hu sana, ka mbuɗum hurum njenjeɗi. Va ma col ay kurufu huu sana mbuɗum ki njenjena ni namma ɗow. [

¹⁶ Lini humugi humma ni, humugi ha jiviya.»]

¹⁷ Yesu hin suuna ha ki tani, kal kalafi kal ni, suu haɗi mamsina joɓom ana nam gasi u ndal boy namma kiyo.

¹⁸ Nam dasi ana, «Agi lay ni ndak ka a wi u boy namma kiɗi lay su? Agi ka wi kagi ana va ma col ay bunsu mba hu sanana, ka mbuɗum hurum ki njenjeɗi naɗi su?

¹⁹ Va tira ka kal hu sanaɗi, nam kal ki ni hu yorodom ɦawaa, o ki ni sotna.» Na ɗaŋi yesu di ana tlesuu tira halaŋ ni jivira a tira.

²⁰ Nam di olo ana, «Va ma col ay hu sana ɓeŋem ki ni namu.

²¹ Saara cora col ay ni hu sana. Hurum zuɗum um ha ana li dla cora, kulna u ci maɗna lay,

²² li zoŋga lay, hurum haɗ kay tlesuu vi suunana lay, a ganyam suuna lay, a li dlara dadassa, a li gonokka lay, a li ŋgeŋŋa kay suuna lay, a ɓii tara, bay u dlara lay.

²³ Tlesuu co asina halaŋ col ay ni hu sana, ɓeŋem ki ni asiya.»

Cara hu njaf ma daŋŋa tin huruɗ kay Yesu

²⁴ Yesu col ay ki tana, tuɗ ɦoŋzina tok eg zi ŋgolna Tirna. Nam kal hu zira a sa wi ana nam ka tani naɗi. Nam ka fi tamba ŋgay ko suunaɗi lay.

²⁵ Cara dew goroɗta u ful ma cona kaɗu, ndaɗ hum dla Yesu hummi, ndaɗ tuɗ goɓ kaŋga fokomu.

²⁶ Ca ndaɗta ni goora Fenisira hu mbassa Sirira, ka hu njaf ma Juifnaɗi. Ndaɗ di Yesu ana nam dikiɗ ful ma cona ki kay goroɗta.

²⁷ Yesu hoŋoɗ dira ana, «Hin gorkemba asi ti funa hoɓ ki tuwa. Tli funa vi kemba, gam ki maŋ gor diginina gaw ni, ka jiviɗi.»

²⁸ Ndaɗ dam olo: «Na ɗaŋ may, Malaŋ Haɗta. Gor diginina lay ni mbasa felek u fu ma yak ki kaŋga ko kembana layɗi su?»

²⁹ Nam daɗ ana, «Kay boy ma ndak hoŋon nana wanni, ndak tuɗa. Ful ma cona hinik gorokka ki wa.»

³⁰ Ndaɗ kal ha vo ni, fi goroɗta buuri kay layna. Ful ma cona ki tuɗiya.

Yesu mal hum sa ma ŋgeli ma ndumuna kiyo

³¹ Yesu col ha hu mbassa Tirra wanni, jak hu mbassa Sidonda. Nam hoŋ ay ŋgoo lumma Galilena, jak hu Zi ma Doogona.

³² Asi mbaaram sa ma ŋgeli ma ndumuna ay egemu. Asi dam ana nam tin kom kamu.

³³ Nam vam umu, hin suuna ha ki na day. Nam kal gor gor kom humum may, tofoɗ yoyona, tinimma kay sinimu.

³⁴ Yesu tli irim kolo huulona, musuk na ɦilif, hin di ana, «Effata» ni ana, «Aŋ mal kiyo.»

³⁵ Na gaw ni humum mal kiyo, sinim buɗ ki gaw may. Nam mbuɗ ɓak vala vala.

³⁶ Yesu gaɗ suuna ana, «Dlara an laɗ wandara tuɗ daɗ ki maŋ saɗi.» Nam gaɗasi lay ni, asi jok usi ha fok joki na ɗow ɗow.

³⁷ Na ɗaŋi suuna halaŋ mbuɗ na jim. Asi ɓak ana, «Dlara nam laɗta halaŋ ni jivi ɦay. Suu ŋgelina nam malasi humusi ki lay, suu ndumuna nam buɗusi sinisi ki lay.»