Biblia Todo Logo
Bìoball air-loidhne

- Sanasan -

MARK 6 - Boy Lonana


Suu Nazaretna gol Yesu lalasi
( Matiye 13.53-58 ; Luk 4.16-30 )

1 Yesu tuɗ hu zi ma nam wul huna. Suu haɗi mamsina tuɗ um may.

2 Hu buu ma vi Lonna, Yesu gijaŋ haɗ suuna hu Zira Tokka. Suu moli egem a humumma mbuɗ lakira na jim. Asi di tasi ana, «Nam fi boy namma ay ni arage? Nam fi nera ŋgolora u dlara mbuɗta na ni, fasi ay ni arage?

3 Ni ka sa ceɗ gunaɗi su? Ni ka goŋ Marinaɗi su? Jak, Joses, Jud, Simon ni ka gorsemmaɗi su? Gorsem suu tamagina ka varaygi layɗi su?» Boy mamma hisisi wa. Asi min vi umbi.

4 Yesu dasi ana, «Sa jok vun Lona suuna humum boy mamma halaŋ. Hu mbassam wanni, dee mamba lay, gorsemma lay, ka wam iiɗi ni asi doy hol.»

5 Yesu ndak ka a li dlara mbuɗta varasiɗi, nam tin kom kay suu tuguɗira ni dew dew ɦawa a garaɗasi kiyo.

6 Nam mbuɗ gol na tigiriw ko suuna ka tin hurusi kambira. Yesu poy ɦoŋzina kay mbassa halaŋ a haɗ suuna.


Suu doogo yam mbana Yesu sunusi u tasi mba' mba'
( Matiye 10.5-15 ; Luk 9.1-6 )

7 Nam yi suu doogo yam mbana ay egemu, gijaŋ cukusi ki u tasi mba' mba'. Nam ɦasi saɓakŋa a dik fuli suu cona ki lay.

8 Nam gaɗasi ana, «Tli va kogi a tuɗ voɗtaɗi. Tli kogi ni tokolora doy hol. Tli va ti kogiɗi lay. Mbumbuɗi lay, gursuɗi lay.

9 Cuk tuɓuruna segiya. Yow baraw kogi mba' mbaɗi.»

10 Yesu dasi olo ana, «Agi sel hu zina wani, zira agi buu hura, bay agi a jok ugi hu zi ma daŋŋa ba ni, jok ugi ki hura daŋgi.

11 Agi sel hu zi ma asi ka min vagi varasiɗina wani, ka min a humugi vunugiɗi lay ni, agi jok ugi ki hu zi namma, poogi gugum ma segina kiyo. Agi li na ni, agi tak ki ni kay dlaasira asi laɗ cora.»

12 Asi suu doogo yam mbana mbee ki mbee ni, ɓak maŋ suuna ana jokogi hurugi kiyo, homogiya.

13 Asi dik fuli suu cona ki cocoo, fuu suu tuguɗira u mbulna coco may, suu asina garaɗ ki halaŋ.


Miɗna vi Jaŋ ma mbus batem maŋ suuna
( Matiye 14.1-12 ; Luk 9.7-9 )

14 Mulna Herod hum ana Yesu sem tii ki cocoo. Suu ɦiw di kam ana, «Jaŋ ma mbus batem maŋ suuna paɗ ay ki kolo ni namu. Nam li dlara mbuɗta ni kay ndaɗta.»

15 Suu ɦiw di ana, «Ni Eli.» Suu ɦiw olo di ana, «Ni sa jok vun Lona, tli tam u suu ay fok jewna.»

16 Hu li ma Herod hum na ni, nam di ana, «Ni Jaŋ ma an kaam yam kina, paɗ ay ki kolo iiri ni namu.»

17-18 Kay Jaŋ di Herod ana, «Aŋ ndak a tli caŋ wayaŋŋara ki uŋ bay nam miɗɗi.» Nam di na ni, kay Herod vi Herodiad caŋ wayamma Filippa ki umba. Herod hum na ni, nam sun suuna, vam Jaŋ aya. Nam njunum u zewna, gam daŋgayna.

19 Herodiad vi Jaŋ gonokka, ndaɗ hal a cam kiyo. Ndaɗ ndak ka a cambi,

20 kay Herod li ndaana ko Jaŋ. Nam wi kam ana Jaŋ ni sa teteɗna, ma ɗegeena. Nam doo kamu. Nam hum boy ma vi Jaŋ wanni, hurum saa na das das. Kayme hurum min a humum boy mamma jiviya.

21 Herodiad fi voɗta jivira a ci Jaŋ ma mbus batem maŋ suuna kira. Hu buu namma Herod tin luuna, tok suuna ŋgolo, suu ŋgolona hu ndaŋgara, suu mul asgaana, suu ŋgolona hu Galile ay egem halaŋ a ti funa. Ni buu ma nam vuɗ huna.

22 Goŋ Herodiadta kal hu zira a luu njoŋŋa fokosiya. Herod tam vam ki na komi komi. Suu egemma furiyuɗ coco lay. Mulna Herod di goora ana, «Ndak joɓon va huruk minimma, an ɦakŋa.»

23 Nam suu tam ki ana, «Tlesuu ndak joɓon kasina halaŋ an ɦaksina. Ndak di ana, ɓorowoy mul manda ki duk lay ni, an ɓorowoɗ lay.»

24 Goora kal ay ki kal ni di maŋ suɗ ana, «An joɓ ni mege?» Suɗ hin daɗ ana, «Ndak joɓom kay yam Jaŋ ma mbus batem maŋ suuna.»

25 Goora kal ki eg mulna Herod gaw, joɓom ana, «An min ana aŋ ɦan yam Jaŋ ay kon hu tassana cecemmi.»

26 Herod hurum haɗ cocoo. Nam min ka dooroɗɗi, kay vunum kal ki suu tam ki fok suu nam yasina halaŋ.

27 Nam sun asgaa ma zak ana tuɗ ŋgaɗam yam Jaŋ aya. Asgaana tuɗ hu zira daŋgayna, ŋgaɗam yam Jaŋ aya.

28 Nam tli yamba ay kom hu ŋgalna, mba ɦaɗ maŋ goora. Ndaɗ goora tuɗ ɦaɗ maŋ suɗ gaw.

29 Suu haɗi suu vi Jaŋŋa humum dlam hummi, mba tlam maɗam pammi na gaw.


Yesu ɦal funa maŋ suu bup bup vadlna
( Matiye 14.13-21 ; Luk 9.10-17 ; Jaŋ 6.1-14 )

30 Suu doogo yam mbana tok ay vo eg Yesu tokŋi, njaɗam tlesuu asi lasi ay na, njaɗam kay boy ma asi haɗam maŋ suunana lay.

31 Suuna mbay egesi cocoo, asi ka fi irisi a ti fuɗi. Ni kay ndaɗta Yesu dasi ana, «Ҥuɗuygi ki keŋ nde. Koɗ tagiya.»

32 Asi ful hu lumba a tuɗ vaydasi hu li namma.

33 Suuna bolowo wasi ana wanni asiya. Suu hu zina yow liŋŋa halaŋ, tuɗ tew ha ki hu li namma jewesiya.

34 Yesu cuk ki kaŋga hu lumba ca ni, gol irimu ni, suuna molira na ndil ndil. Asi mbuɗ irim hahawi, kayme asi ni ko timigiina suu sa tarasi kaɗina na. Nam gijaŋ haɗasi tlena cocoo.

35 Suu haɗina vi Yesu wi ana faɗta gi yaɗ wani, asi ɦuɗ egem dam ana, «Aygi duk gura ni, faɗta su ni suya.

36 Di suuna, asi tuɗ ɦoŋzina, hal tina funusiya.»

37 Yesu hoŋosi dira ana, «Agi ɦasi tina ni agiya.» Asi dam ana, «Aŋ min ana ami tuɗ gus tlesuu tira ay ii mbumbuna dok hindi a ɦasira su?»

38 Yesu joɓosi ana, «Funa kogi gage? Gologina gige!» Asi golom gol ni, ana, «Funa komi vadl u kulufna mba' may.»

39 Yesu di suu mamma ana, Kaagi ii suuna ki na cub cub, asi lak kaŋga kay usu ŋgolomma.

40 Asi mol kaŋga ndil ndil, irisi ka ki wanni, suu kisna may, suu dok vadlna may.

41 Yesu yow fu ma vadlna u kuluf ma mbana kom yow ni, tli irim kolo huulona, gi deɓ Lona kamu. Nam ɓorow ii funa ki ɓorow ni, ɦam maŋ suu haɗi mamsina ana asi ɓorowom ha ki maŋ suuna. Nam hin ɓorowosi ii kuluf ma mbana ha ki may.

42 Asi suuna ti funa, ndak ki u mayasi halaŋ.

43 Suu haɗina taa u fu ma hinna u kulufna halaŋ, oy kaalamina doogo yam mba'.

44 Suu ti fu nammana bup bup vadl.


Yesu tuɗ kay mbona
( Matiye 14.22-33 ; Jaŋ 6.15-21 )

45 Ŋgoo daganda Yesu ɦeɓ suu mamsina ana asi ful hu lumba, ɗiŋ ha ki doŋ lum ma keŋ hiŋŋa hu zi Betsaidana. Hu li namma nam di suu hin egemma ana, Tuɗugi voo.

46 Dukusi wal ki wal ni, nam ɗiŋ kolo kay ɦinira a cen Lona.

47 Faɗta nik nikŋi, lumba tew ki duk gaalina. Yesu hin kaki vaydam dew doŋ lumma.

48 Yesu wi ana babaana ka li hawra maŋ suu mamsina hu lumba. Ŋgarapii ŋgolla wani, Yesu tuɗ ay egesi kay mbona u semu. Nam li ko a jak ki kasi na.

49 Irisi cuk ay egem nam tuɗ kay mbona na ni, asi gijaŋ ci lulura kolo ana asi wi ni va mbuɗiya.

50 Asi wam na ni, tasi mbuɗ ki ndaana cocoo. Yesu gijaŋ ɓakasi gaw ana, «Cukugi musukugi kaŋgaa, ni anu. Lagi ndaaɗi.»

51 Nam ful usi hu lumba ful ni, babaana coɓ ndiŋ gaw. Suu haɗina mbuɗ laki na jim.

52 Kay mege asi wi u dlara mbuɗta nam laɗ kay funara kaɗi. Neesira ndak ka wi u boy nammaɗi.


Yesu garaɗ suu tuguɗira hu mbassa Genesaret kiyo
( Matiye 14.34-36 )

53 Asi tew ki doŋ lumma hu mbassa Genesaret tew ni, njun lum masira gaa.

54 Asi cuk ay ki kaŋga hu lumba na ni, suuna wi Yesu gaw.

55 Asi yow liŋŋa ɦoŋzina, gijaŋ yow suu tuguɗira ay u dlaɗi masisina, tuɗusi hu li ma asi hum dla Yesu ha huna.

56 Hu li ma Yesu tuɗ a jak huna, hu zi gorina lay, hu zi ŋgolona lay, suu asina yow suu tuguɗira ay ki u ŋgus ma dukŋa. Asi joɓ Yesu ana nam hin suu tuguɗira ŋgenem vun baraw mamma doy hol lay ni, asi hin garaɗ kiyo. Suu ŋgenemma halaŋŋi garaɗ ki may.

Bible Moussey © Bible Society of Chad, 2002.

Bible Society of Chad
Lean sinn:



Sanasan