MARK 5 - Boy Lonana

Yesu dik fuli suu cona ki kay sana

¹ Yesu u suu mamsina tew ha ki ŋgoo lumma Galilena hu mbassa vi suu Gerasenna.

² Yesu ɗiŋ ay ki kaŋga hu lumba ɗiŋi, san dew kal ay ki duk ussa, ŋgaf u namu.

³ Sa namma u fuli suu cona kamu, nam kaki ni duk ussa. Li ni u galina lay, sa ka ndak a njunum kaŋgaɗi.

⁴ Tew tew ni asi gam kinjiŋŋa semu, asi njunum kom u galina lay. Kinjiŋ ma semma nam kusum ki lay, gali ma del komma nam jaam ki lay. Sa ka tew egem a balam kaŋgaɗi.

⁵ Tew tew njeŋge, faali lay, nam poy kolo kay ɦinira duk ussa, sawalla, dak tam u gogoyra lay.

⁶ Nam wi yesu ay ki day ni, ndi liŋŋa egemu, goɓ gaa fokomu.

⁷ Nam sawalla kolo eŋga ana, «Yesu Goŋ Lo ma kolona, aŋ a min mi egen ge? An joɓoŋ fok Lona, aŋ lasanɗi.»

⁸ (Nam di na ni, kay Yesu ɦam gaɗta ana, «Ful ma cona kal ay gi hurumu.»)

⁹ Yesu joɓ sana ana, «Seŋ ana mege?» Nam hoŋom dira ana, «Bolowo, kay ami bolow cocoo.»

¹⁰ Nam joɓ Yesu sem bolowo ana dikisi ki hu mbassa daŋgaɗi.

¹¹ Hu li namma kosoŋŋa moli hu cocoo, ti tlena kay ɦinira.

¹² Fuli suu cona joɓ Yesu ana, «Hinimi, ami cuk hu kosoŋŋa.»

¹³ Yesu hinisiya, fuli suu cona sel ay ki hu sana, cuk hu kosoŋŋa gaw. Kosoŋŋa ii va ma bup bup mba', yow ay liŋŋa kay ɦinira, mba cuk ki duk mbona, ba kaŋga halaŋ gaw.

¹⁴ Suu taa kosoŋŋa yow ay liŋŋa, mba di boy namma ki maŋ suuna hu zi ma ŋgolna u ma gorira halaŋ. Suuna yow ay a gol dlara li ndaɗta.

¹⁵ Asi mba eg Yesu, fi sa ma fulina ay kamma kaki u baraw mamma egem nje. Nam ɗigil kiyo. Tasi mbuɗ ndaana.

¹⁶ Suu wi boy namma u irisina njaɗasi kay sa fulina li ay kamma u dlara li eg kosoŋŋara lay.

¹⁷ Asi gijaŋ ɦuum ana nam tuɗa hinisi mbas masira.

¹⁸ Hu li ma Yesu taɓa koloo hu lumba taɓa ni, sa ma fulina li ay kamma joɓom ana hinim nam tuɗ umu.

¹⁹ Yesu hinim kaɗi. Nam dam ana, «Hoŋ voo eg somoyoŋu, dasi kay tlesuu Bu Suuna laŋsina egeŋŋa u jivi mamba waŋ hahawaŋga.»

²⁰ Sana gi tam tuɗ di ki hu mbas mamba, Zi ma Doogona, kay tlesuu Yesu lasi egemma halaŋ. Suu hum boy namma halaŋ lak jim, saa kay boy namma.

Goŋ Jayrussa u cara ŋgen baraw ma vi Yesuna

²¹ Yesu hoŋ hu lumba a tuɗ keŋ hiŋŋa. Suuna moli egem ndiŋ ndiŋ. Nam coli fun lum ma ŋgolna tok.

²² Sa ŋgolna hu Zira Tokka sem ana Jayrus mbaa, hu li ma nam wi Yesu nam goɓ kaŋga fokomu.

²³ Nam tii tam egem ana, «Goonda ka tuguɗiyo, hin tok a miɗna. An ceneŋu, aŋ mbay tin koŋ kaɗu, a ndaɗ mbuɗ ki jiviya, tuguɗira hiniɗ kiyo.»

²⁴ Yesu tuɗ umu, suuna mbay um bolow cocoo, ɦeɓem koloo.

²⁵ Cara dukusi dew fi busuna li basara doogo yam mba'.

²⁶ Ndaɗ wi hawra ko suu laɗ kumuna cocoo. Begera koɗta daɓ ki basa halaŋ. Nam ka hiniɗɗi lay, zul ay egeɗ zuli na ɗow ɗow.

²⁷ Ndaɗ hum dla Yesu na ni, ndaɗ tuɗ duk suu ŋgoromma, ŋgenem baraw mamma.

²⁸ Ndaɗ di ana, «Lini an ŋgenem baraw mamma ɦawa lay ni, tan hinin kiyo.»

²⁹ Hu li namma busuna ka uɗ gaw. Ndaɗ wi kaɗ ana nam hiniɗ ki wa.

³⁰ Hu li namma gaw ni Yesu wi ana saɓak ma egem maa kal ki wa. Nam pereɗ irim eg suu ŋgoromma ana, «Saa ŋgenen baraw manna ni gege?»

³¹ Suu haɗi mamsina hoŋom dira ana, «Aŋ wi ana suuna ɦeɓeŋ kolo duku may ni, aŋ hin di ana, Sa ŋgeneŋ baraw maŋŋa ni gege, ni nanage?»

³² Nam gol irim ki payam halaŋ a wi ana sa li dla ndaɗta ni gege?

³³ Ndaɗ cara wi ana dla ndaɗta li ni koɗu ni, taɗ mbuɗ dlak jik jik ko ndaana. Ndaɗ mba goɓ kaŋga fokomu, dam gasira ki bel bel.

³⁴ Yesu hoŋ daɗu, «Goonda, huruk vi kan jiviya ni, ndak suɗ ki wa. Tuɗ u heɓpa, tuguɗi makka hinik ki wa.»

³⁵ Vun Yesu bay ndi kaŋga tu may ni, suu sunda col ay vi mulna Jayrus mba di ana, «Sa ŋgolna, goroŋga miɗ ki may ni, aŋ loɓ ta Malaŋ Haɗta ni nana olo ge?»

³⁶ Yesu noy ɓak namma na ni, nam di maŋ sa ŋgolna Jayrus ana, «Li ndaaɗi. Tin huruŋ kan ɗow.»

³⁷ Nam hin sa daŋ ka a tuɗ umbi, tuɗ ummi Piyer may, Jak u wayamma Jaŋ may.

³⁸ Asi tew vi sa ŋgol ma hu Zira Tokkana tew ni, Yesu hum tiina tum na kuu, suu sawalla lay na.

³⁹ Nam kal ha vo dukusi kal ni, dasi ana, «Agi tum vunna may, tii may ni, kay mege? Goora ka miɗiɗi. Ndaɗ buu ni senna ɦawaa.»

⁴⁰ Suuna hum na ni, gijaŋ san umu. Nam selesi ay ki bunsu halaŋ, hin ummi bu goora u suɗu, suu ay umma may. Asi cuk hu zira goora gi hura.

⁴¹ Nam tli ko goora komu, daɗ ana, «Talita kum.» U vun masina ni ana, «Goowayra, an daku, col koloo.»

⁴² Goora col koloo, gi taɗ tuɗta gaw. Goo ndaɗta basaɗaɗ doogo yam mba'. Suu egemma wi na ni, asi mbuɗ lakira na jim.

⁴³ Yesu dlaɗasi humusi ana, «Dlara an laɗ wandara, agi daɗ ki maŋ saɗi.» Nam dasi ana asi ɦaɗ va ma tiya.