MARK 4 - Boy Lonana

Yesu tin ndal boyna u waɗ njafna

¹ Yesu gijaŋ haɗta olo keŋ doŋ lumma Galile. Suuna moli egem cocoo, nam ful hu lumba, ɦuɗ tam ha ki duk mbona nde. Suuna moli kaŋga fun lumma. Yesu kak kaŋga hu lumba,

² haɗasi u ndal boyna. Nam dasi hu haɗ mamba ana,

³ «Humugi haa! Sana dew kal ay ki a waɗ njafna.

⁴ Nam a waɗta wanni, ii njaf maa ɦiw yak ki keŋ voɗta, layagina koɓom namma kiyo.

⁵ Hiŋŋa ndi kay gogoyra, ndaŋgara ka hu li namma ŋgolɗi. Nam day ki kolo zak, kay ndaŋga mamba uɗ ka zulɗi.

⁶ Faɗta ndi faali nduh nduh, ɗaŋi, nam hin ŋgal kiyo, kay sariyam ka kaŋga dayɗira.

⁷ Ma hiŋŋa ndi duk wayara. Wayara cili kam cilni, cam ki gaw. Nam cuk yam kaɗi.

⁸ Ma hiŋŋa ndi kay ndaŋgara jivira. Nam day ki kolo day ni, dla gor goora dla dlaa. Nam cuk yam ŋgolo, maa ɦiw ne dok hindi, maa ɦiw dok karkiya, maa ɦiw kis may.»

⁹ Yesu dasiya, «Agi li humma, ni humugi haa.»

Yesu tin ndal boyna ni kay mege

¹⁰ Hu li ma Yesu hin kay tamma, suu umma u suu doogo yam mbana joɓom ana nam vasi u ndal boy ma nam damma kiyo.

¹¹ Nam hoŋosi dira ana, «Agi ni suu may suu Lona gagi u boy ma ŋgay kay Mul mamba ki na, maŋ suu hiŋŋa an tinisi ndal boyna.

¹² Kay, Wira asi wiya, ka wi ki ɗal ɗalɗi. A humba asi humma, ka wam um kiɗi. Lini asi wam umu ni, asi ndak hoŋ irisi eg Lona, nam hin hinisi coosira kiyo.»

Yesu vasi u ndal boy ma nam tinim u waɗ njafna kiyo

¹³ Yesu dasi ana, «Agi ka hum u ndal boy namma kiɗi may ni, ma hin hiŋŋa agi hin humummi nanage?

¹⁴ Sa ma waɗ njafna waɗ ni Boy ma vi Lonna.

¹⁵ Suu ɦiw ka ko njaf ma yak ki keŋ voɗtana na, ni asi suu hum Boy ma vi Lonna, Satan mbay yowom ki hurusi gaw.

¹⁶ Suu ɦiw vi boy namma ko njaf ma ndi kay gogoyra na. Hu li ma asi hum boyna, asi vam u ayra.

¹⁷ Asi hinim ka a kal sariyam hurusiɗi. Nam kak hurusi ew ɗaŋ. Dlara loɓma mba kasi wa ni, suuna li lasasi kay Boy ma vi Lonna ni, asi hinim voɗom gaw.

¹⁸ Ii njaf ma ndi duk wayara na ni, suu hum Boy Lonana hummi,

¹⁹ hurusi ki tini kay tlesuu kay ndaŋgarana, begera mbaɗasi irisiya, asi gijaŋ saa kay tlesuu daŋŋa olo, tlesuu asina muruɗusi Boy Lonana ki hurusiya. Boy namma zul ka hurusiɗi.

²⁰ Ii njaf ma waɗ kay ndaŋgara jivira, ni suu hum boy namma, vam hurusina maa ɦiw irim ndum kis, ma hiŋŋa ndum dok karkiya, ma hiŋŋa ndum dok hindi may.»

Ndal boyna u pindilla

²¹ Yesu dasi ana, «Aŋ sana do pindilla koŋ do ni, kuluɓuɗ ki kaŋga ɗowba tiniɗ u layna su? Ka gaɓaɗ ki kolo hu liiɗɗi su?

²² Tlesuu megelay ŋgayna usi hin gi ki mbeeɗi su? Tlesuu megelay dluri kaŋgana halaŋ, usi hin gi ki kiɗiki.

²³ Agi suu humugi humma, humugi haa.»

²⁴ Yesu dasi olo, «Lagi tagi jivi kay boy ma agi humumma. Lona hin mba ŋgaagi dlaagira, ko tlesuu agi ŋgaasi duk tagina na may, nam hin lagi su lay.

²⁵ Kay sa ma vaamma ka komma, hin ɦam ha kam olo. Sa ma va ka kombina, va ma li ka kom nde ni, hin tlam ma ki lay.»

Ndal boyna u njaf ma day ki kolo kay tamma

²⁶ Yesu di olo ana, «Mul Lonara ni ko sana zaa waamma kaŋgara na.

²⁷ Nam buu senna, col kolo maɗiiya. Njafna daya, wul kolo lay. Sana ka wi va ma wulummaɗi.

²⁸ Ndaŋgara dayam ki kolo kay taɗu, nam tin teŋella, wulla, vi wiina, cuk yamu, ne iina coco may.

²⁹ Hu li ma wana ne wa ni, sana tli ŋgewra komu, gijaŋ feɗemu, kay nam ndakiya.»

Ndal boyna u ii seweena

³⁰ Yesu di olo ana, «Aygi hin ŋgaygi Mul Lonara ni ko mi na ge? Aygi ɓak kaɗ ni u ndal boy maanage?

³¹ Ndaɗ ko ndal ii seweena na. Ii seweena ndi kaŋga wa ni, nam goo su ii tlesuu hiŋŋa halaŋ.

³² Nam day ki kolo wa ni, wulla, mbuɗ ki ŋgol su ŋgusugi suu hiŋŋa halaŋ. Layagi suu pii kolona ndak a min ziisi hu komu.»

³³ Yesu tin ndal boyna maŋ suuna ko wandara na. Nam dasi boyna u va ma asi ndak a humumma.

³⁴ Yesu ka ɓakasi bay tinisi ndal boyɗi. Ŋgoo daganda, nam hin gam um ki maŋ suu haɗi mamsina.

Yesu seŋ babaana kiyo

³⁵ Fiɗigi hu buu namma, Yesu di maŋ suu haɗi mamsina ana, «Jakaygi ha ki doŋ lumma ii hiŋŋa.»

³⁶ Asi hin suu molina ha ki tani, suu haɗi mamsina tuɗ um hu lumba nam ay hura. Lummi suu daŋŋa jaŋ keŋemu.

³⁷ Babaa ma ŋgolna fasi duk mbona. Bil ma ka kolona kal hu lumba, hal a oyosi yona usiya.

³⁸ Yesu buu senna njaw lumba, ɗagal yam kay gu ma gi yamba. Suu haɗi mamsina dliɗim ay koloo, dam ana, «Malaŋ Haɗta, taŋ ka laŋ ndaaɗi su? Aygi ba kiyo.»

³⁹ Yesu dliɗi kolo dliɗ ni, bay babaana ana, «Seŋ taŋu.» Mbona seŋ gaw may. Babaana ba ki kaŋga na yar ɦay, mbona seŋ tam na yerek yerek.

⁴⁰ Yesu di suu haɗi mamma ana, «Agi lagi ndaana ni kay mege? Hurugi bay vi tu su?»

⁴¹ Asi mbuɗ ndaana ɓak duk tasi ana, «Sa namma ni gege? Babaana u mbona humum vunum lay ni nanage?»