MARK 2 - Boy Lonana

Yesu col sa gugufura ki koloo

¹ Li buuna ŋgoo dagan ca ni, Yesu hoŋ Kapernaum olo, suuna humum dlam ana nam kal ay vo wa.

² Suuna tok ay na ndiŋ ndiŋ, gak gak asi ka fi li ma col oloɗi, ha ki fun goŋga ni na lay. Nam dasi boy ma vi Lonna.

³ Suuna u tasi fiɗi tli sa gugufura ay kasi ganiya.

⁴ Asi ka fi li kal a tinim fok Yesuɗi, ko suuna moli cocora. Asi co duk zira hu li ma Yesu coli huna. Asi sii sa gugufura ay u dlaɗ mamba.

⁵ Hu li ma Yesu wi ana hu suu asina vi kamu ni, nam di sa gugufura ana, «Goonna, cooŋga daɓ ki wa.»

⁶ Duk suu molina, suu may suu wi magaara ɦiw saa kasi ana,

⁷ «San wanni di na amege? Nam pan ni Lona. Sa ma daɓ cora kina ni gege? Ni Lona dewɗi su?»

⁸ Yesu wi ki ana asi saa hurusi kurufu na ni nam dasi ana, «Agi saa hurugi kurufu na ni kay mege?

⁹ Dlara loɓma ni u taarage? Kay dam ana cooŋga ki daɓiyara ɗowba col koloo, tli dlaɗ maŋga kaŋu, tuɗ u seŋura su?

¹⁰ Agi wi ki anaba, Goŋ Sanna u saɓak ma daɓ cora vi suu kay ndaŋgarana egemu.» Nam di sa gugufura,

¹¹ «An daŋu, col koloo, tli dlaɗ maŋga kaŋu, hoŋ vo varaŋu.»

¹² Nam col kolo gaw, tli dlaɗ mamba tli ni, gi tam tuɗta ii suuna halaŋ. Asi wi na ni, ŋgususi paɗ ki kasi na fakat. Asi geleɗ Lona ana, «Ay day day ni, wi dlara na ka dewɗi.»

Yesu yi Levi umu

¹³ Yesu kal ay ki doŋ lum ma Galilena olo. Suuna halaŋ tok ay egemu, nam haɗasi may.

¹⁴ Hu li ma nam a jaka wanni, nam wi Levi, goŋ Alfena, kaki hu zira taara. Nam dam ana, «Tuɗ ay unu.» Levi col koloo, gi tam um gaw.

¹⁵ Yesu kakira a ti funa vi Levi. Suu vi taara u suu cona laki ko tasi u Yesu u suu haɗi mamsina, ti funa. Asi bolow cocoo, tuɗ u Yesu.

¹⁶ Hu li ma suu wi magaara u suu Farisenna wi Yesu ti funa u suu vi taara u suu cona na ni, asi ɓak maŋ suu haɗi suu vi Yesuna ana, «Nam ti funa u suu vi taara u suu cona ni nanage?»

¹⁷ Yesu hum na ni, nam dasi ana, «Suu may suu tasi ka tasiɗina, ka tuɗ hu li ma hal kumunaɗi. Suu tuguɗira halammi asiya. An mbay ka a yi suu hurusi ɗegeenaɗi. An mbay ni kay suu cona.»

Suuna joɓ Yesu kay laara

¹⁸ Fali ta dew suu haɗi suu vi Jaŋŋa u suu Farisenna li laara. Suuna mbay joɓ Yesu, «Suu haɗina vi Jaŋ u suu haɗi suu Farisenna, li laara ni, suu maŋsina ka liɗi ni kay mege?»

¹⁹ Yesu hoŋosi dira ana, «Suu mba vogodona li laara hu li ma njuf cara kaki egesina su? Ҥawaa. Njuf cara li kaki dukusiya ni, asi ka li laaraɗi.

²⁰ Falira njuf cara kaɗira, asi hin li laara tuwa.

²¹ «Sa ka jak baraw ma wilina fun tam u ma basinaɗi. Kay ma wilina hin haa ma basina ki olo, haa ndaɗta mbuɗ ŋgol suwa.

²² Aŋ sana ka sel sum veŋ ma wilina hu mbumbu yo ma basinaɗi. Li ka naɗi ni, sum veŋŋa ndi wani, mun mbumbu yona kiyo. Summa may mbumbuna may hin ɓeŋ ki ko tasi jak. Aŋ sel sum ma wilina ni, hu mbumbu yo ma wilina.»

Yesu u buu ma vi Lonna

²³ Hu buu ma vi Lonna, Yesu jak tuɗta duk senena. Suu haɗi mamsina kus yam wana kosiya.

²⁴ Suu Farisenna di Yesu ana, «Aŋ gola! Asi li tlesuu doo ki kasi hu buu ma vi Lonna ni nanage?»

²⁵ Yesu hoŋosi dira ana, «Dlara David laɗ u suu mamsinara agi bay waɗ hu magaara tu su? Va ti ka kosiɗi, mayra casi lay.

²⁶ Nam kal hu Ziŋ Lonara, ti fu ma li ɓivunna maŋ Lona u namma. Hu li namma Abiatar ni mul ŋgol ma li ɓivunna. Gaɗ mayra hin suu li ɓivunna a ti funa wani asi doy holna, David tlam tani, ɦam maŋ suu mamsina.»

²⁷ Yesu dasi olo ana, «Buu ma vi Lonna li ni maŋ sana. Sana ka maŋ buu ma vi Lonna ɗowɗi.

²⁸ Ni kay ndaɗta Goŋ Sana ni malaŋ buu ma vi Lonna.»