MARK 16 - Boy Lonana

Yesu paɗ ki kolo iiriya

¹ Buu ma vi Lonna jak ki jakŋi, Mari ta Magdalara u Mari su Jak may, Salome may, gus mbul ma hisna kosi gus ni, a tuɗ yamam ta Yesu.

² U damas maɗii feɗet ni, asi tuɗ kay us Yesu.

³ Asi joɓ tasi ana, «Sa hin tuɗ lagaɗaygi ɦinira ki fun zulla ni gege?»

⁴ Asi tli irisi kolo na ni, ɦinira ŋgol ndaɗta ki lagaɗi keŋ zulla.

⁵ Asi sel ha hu zulla ni, fi goozoŋŋa kaki bik njuf u baraw ma haɓma tamu. Asi wam na ni, mbuɗ ndaana cocoo.

⁶ Nam dasi ana, «Lagi ndaaɗi. Agi halagi ni Yesu ma Nazaretna, ma ɓalam ki na, nam ka tanɗi, paɗ ki kolo iiri wa. Gologiya! ni lii ma asi gam gin huna.

⁷ Agi tuɗ di suu haɗi mamsina gi Piyer ana, Nam tuɗ ha fokogi hu mbassa Galilera, agi hin fam huwa, ko nam dagi fok jewra na.»

⁸ Asi sel ay ki fun zulla sel ni, yow liŋŋa, tasi tuɗusi dukuk dukuk ko ndaana. Asi di ka ki maŋ saɗi ko ndaana. [

Yesu tak tam ii Mari ta Magdalara

⁹ Maɗii feɗet u damassa nam paɗ ay kolora nam tak tam maŋ Mari ta Magdalara, ta nam dikiɗ fuli suu cona ki kaɗ kiɗisiyara.

¹⁰ Ndaɗ tuɗ di ki maŋ suu haɗi mamsina, fasi ni hurusi haɗa, asi tii lay.

¹¹ Asi hum ki ana Yesu ki iiriya, ndaɗ wam ay u iriɗu lay ni, asi ka vaɗ vunuɗɗi.

Yesu tak tam ii suu haɗi suu mba'

¹² Ŋgoo daganda suu haɗi suu mba', hin Yerusalem ki tani, yow a tuɗ hu zi ma daŋŋa. Yesu tak tam ki irisiya, mbuɗ tam ki zeɗ.

¹³ Asi hoŋ ay, mba di maŋ suu hiŋŋa, asi vasi vunusi kaɗi lay.

Yesu tak tam ki ii suu haɗi suu doogo yam dewna

¹⁴ Ŋgoo daganda suu haɗi suu doogo yam dewna ti funa wa ni, Yesu tak tam ki irisiya. Nam yalasi kay hurusi ma ka tini kambina. Asi min ka vi vun suu wam ay u irisinaɗira lay.

¹⁵ Nam hin dasi ana, «Tuɗugi ha ki kay yam mbassa halaŋ, dagi Boy ma Ayra ki maŋ suuna halaŋ.

¹⁶ Sa ma tin hurum kanna, fi batemma lay, nam hin suɗ kiyo. Sa ma tin hurum ka kanɗina ɓakŋa hin vamu.

¹⁷ Gola! ni dlara mbuɗta hin tak suu tin hurusi kanna kira. Asi hin dik fuli suu cona ki u senu. Asi hin ɓak vun ma wilina lay.

¹⁸ Asi hin yow guygina kosi lay, ka lasi vaɗi. Asi ci kumu ma casi kina lay ni, ka lasi vaɗi. Asi hin tin kosi kay suu tuguɗira na ni, asi garaɗ ki gaw.»

Yesu hoŋ kolo eg Bum Lona

¹⁹ Bu Suuna Yesu vunum ndi kaŋga may ni, tuɗ kolo vi Bum Lona gaw, kak kay bikim ma njufna.

²⁰ Suu haɗina tuɗ ki a di Boy ma Ayra kay yam mbassa halaŋ. Bu Suuna li sunda u asiya, mbuɗusi boy masina ki gasi u dlara mbuɗta nam ɦasira ay kosira may.]