MARK 15 - Boy Lonana

Yesu fok Pilat

¹ Maɗii feɗet ni, muli suu li ɓivunna u suu ŋgolona u suu wi magara u suu ŋgolo suu kaɓakŋa halaŋ lay tok tasi a gi gagara kay Yesu. Asi ɗag Yesu, tuɗ ɦam maŋ Pilat.

² Nam joɓom ana, «Aŋŋi mulna vi suu Juifna su?» Yesu hoŋom dira ana, «Aŋ di na.»

³ Muli suu li ɓivunna ka boyna eg Yesu na gak gak.

⁴ Pilat hoŋ joɓom olo, «Aŋ ka hoŋ di na ndeɗi su? Gol asi yakaŋ gige!»

⁵ Yesu ka dam vun dukgi lay. Pilat viɗ ki duk boy namma.

Asi kaɓakŋa ana ci Yesu kiyo

⁶ Hu buu ma Pakŋa tew tew ni, sa daŋgay ma hurusi minimma, Pilat gasina ki voo.

⁷ Sa ma daŋgay maa dew, yam ana Barabbas. Asi vam ay ni duk suu mbuɗ vunna u mul masina. Asi ci sa ma ki dew, nam duk may.

⁸ Suuna yow tuɗ joɓ Pilat ana nam gasi sa ay ki dew ko nam gasisina ay ki fok jewra na.

⁹ Pilat joɓosi ana, «An gagi ki ni mulna vi suu Juifna su?»

¹⁰ Pilat ɓak na ni, kay nam wi ana muli suu li ɓivunna vi Yesu ni ii gonokka ɦawaa.

¹¹ Muli suu li ɓivunna cak suu molina ana gi Barabbas kina ɗow.

¹² Pilat hoŋ joɓosi ana, «Sa agi yam ana mulna vi suu Juifna an lammi nanage?»

¹³ Asi tum soora ana, «Ɓalam ki eg garakŋa.»

¹⁴ Pilat dasiya, «Dla cora nam laɗta ni taarage?» Asi tum soora su olo ana, «Ɓalam ki eg garakŋa! Ɓalam ki eg garakŋa.»

¹⁵ Pilat min a heɓ hu suuna wanni, nam gasi Barabbas kiyo, Yesu nam poŋom poŋŋi, ɦasina a ɓalam kay gu ma garakŋa.

Suu asgaana pan Yesu

¹⁶ Suu asgaana mbaa Yesu ay hu taraŋga vi Pilat mbaa ni, tok ndarayasi asgaana ay egesi halaŋ.

¹⁷ Asi cukum baraw ma tlawna tam ca ni, hin cilim jumba mulla wayara kamu.

¹⁸ Asi yam ana, «Gaŋ deɓpa, mulna vi suu Juifna.»

¹⁹ Asi waɗam yam sesi bolowo u tokolora, tofoɗom yoyona irim may, tin usi tani, goɓ kaŋga fokom, gam deɓpa.

²⁰ Asi panam pan pan ni, fok baraw ma tlawna kiyo, cukum mamsina egemu. Asi gam ha ki fokosi bunsu a ndaa ɓalam kira.

Asi ɓal Yesu hu gu garakŋa

²¹ Asi hu voɗta wanni, fi Simon, bu Aleksandre u Rufus, sa Sirenna. Nam ay hu sene mamma wanni, asi ɦeɓem duk gaw ana nam zii garak Yesuna.

²² Asi tuɗ Yesu hu lii yam ana Golgota, u vun masina ana, «lii ŋgot yamba.»

²³ Suu asgaana ɦam summa tlumira u mbul ma yara, Yesu cam kaɗi.

²⁴ Asi ɓalam ki hu gu garakŋa, hin ɓorowom barawi mamsina ki kosi a ci ɓelera.

²⁵ Asi ɓalam ki kolo ni faɗta mbuɗ ki baŋŋa ma yowna.

²⁶ Asi ɓii ki kolo kam ana, «Mulna vi suu Juifna,» ni dlara asi cam ki kaɗta.

²⁷ Asi ɓalam suu kul suu buu suuna voɗna ki egem mba', maa dew kay bikim maa njufna, ma hiŋŋa kay bikim ma gulna may. [

²⁸ Ni faɗ ki ni vun boy ma di ki hu magaara ana, «Asi gam ndumum ki duk suu cona.»]

²⁹ Suu jak keŋ voɗ ndaɗtana panam, kisik yasi um ana, «Waw! Waw! Aŋ sa ma ana to Ziŋ Lonara ki to ni, miniɗ hu buuna hindina,

³⁰ suɗ taŋ ki may ɗaŋgi su! Taɓa ay ki gaa hu garakŋa.»

³¹ Muli suu li ɓivunna u suu wi magaara panam ko ndaɗta na lay, ɓak tasi ana, «Nam suɗ suu daŋŋa ki ɗow ɦak ni, suɗ tamba ki mayɗi su!

³² Sa Lona Fuurumma, mulna vi suu Israelna taɓa ay ki kaŋga, ami wi u irimi wa ni, hin tin hurumi kaŋ tuwa.» Suu ki ɓali kolo eg Yesuna ŋgulum lay.

Miɗna vi Yesu

³³ Faali faɗta col duk wanni, lina mbuɗ ki ndufunda na gim, gak gak, faɗta leŋ ki u ndaɗta.

³⁴ Faɗta leŋ ki a boyogina du barra, Yesu ɓak u delemba eŋga ana, «Elowi, Elowi lema sabaktani,» u vun masina ni ana, «Loonna, Loonna, aŋ hinin ki ni kay mege?»

³⁵ Suu moli ga um suu ɦiw di ana, «Gologiya nam ka yi Eli.»

³⁶ Sa maa dew ndi liŋŋa, tluɓ va mbus ŋgotina ay duk sum dlayna kalam vun ŋgayra, ɦamma ana nam soɓomu, hin di ana, «Goloygi tuwa. Elie hin mba paɗam ki ga kalage.»

³⁷ Yesu bay eŋga na haŋgakŋi, seeɗ gaw.

³⁸ Baraw ma ŋgol ma jaki hu Ziŋ Lonara haa ki duk mba' col ay kay yamu ndi ki kaŋga mbot mbot.

³⁹ Mul asgaana coli fokom na kay wi ana nam bay bay ni, miɗ gaw, nam di ana, «Sa namma gasi ni Goŋ Lonna.»

⁴⁰ Boyogi suu ɦiw ay laki keŋ a gola lay. Dukusi wanni Mari ta Magdalara u Salome may, Mari su Jak ma goona u Joses may.

⁴¹ Boyogi suu hindi asina mayra Yesu ay Galilera ni, asi tuɗ um sunum ni asiya. Boyogi suu tuɗ ay Yerusalem u namma duk bolow may.

Asi pi maɗ Yesu

⁴² Fiɗigira ca ca ni, vin ni buu ma vi Lonna, asi min tasi kay buu namma.

⁴³ Yosef sa ma Arimatena, ni sa ŋgol ma gi ii boyna, nam juɓ Mul Lonara lay, nam so um ki so ni, tuɗ joɓ maɗ Yesu ay ko Pilat.

⁴⁴ Pilat ŋgusum paɗ ki na fak ana Yesu miɗ na zak su? Nam yi mul asgaana, joɓom ana, «Yesu miɗ ni kof day su?»

⁴⁵ Nam hum vun mul asgaana hummi, hin Yosef tuɗ tli maɗ Yesu.

⁴⁶ Yosef gus baktana kom gus ni, tuɗ paɗ Yesu ay ki hu gu ma garakŋa, ganam u baktana gan ni, gam hu zulla vekeɗ duk ɦinira. Nam lagaɗ ɦinira ŋgolla duguɗ fun zulla.

⁴⁷ Mari ta Magdalara u Mari su Joses gol hu li ma asi gi Yesu huna.