MARK 14 - Boy Lonana

Mulina gi gagara kay Yesu

¹ Luu ma asi ti fu ma bay kuffa umma, yam ana Pakŋa hin buuna mba' a lira. muli suu li ɓivunna u suu wi magaara hal yalna a vi Yesu u mbeleŋŋa, a cam kiyo.

² Asi di vun tasi ana, «Vam u luuna a suuna mun yaraɗi.»

Cara vo mbul ma hisna kay Yesu

³ Yesu ka hu Betani wanni, nam kak vi sa liɓina, yam ana Simon. Nam kakira a ti funa, cara kal ay um u mbul ma hisna koɗ hu koloɓona. Mbul namma jiviya, gus way ɦay. Ndaɗ malam vunum ki mal ni, yamam ki kay Yesu.

⁴ Suu dukusi ɦiw ni hurusi ɓeŋ ki egeɗ ana, «Ndaɗ ɓeŋ mbul namma kina ni kay mege?

⁵ Nam a gus ki ni su gursu ma kis kis hindina ɗowɗi su? Ɓorowom gin maŋ suu hahawraɗi su?» Asi gurni u ca ndaɗta coco ɦay.

⁶ Yesu dasi ana, «Hinigira na en! Agi ɦeɓeɗ ni kay mege? Dlara ndaɗ landa egenda ni jiviɗi su?

⁷ Suu hawra ka ni egegi tew tew. Falira hurugi a lasi jivira, agi hin lasira. Ko an na ni ka li egegi gak gakgi.

⁸ Ndaɗ li ni va ma saɓakaɗ ndak a lamma. Ndaɗ yaman mbulna kan ni, minin ni maɗan a panda gawɗi su?

⁹ An dagi ni gasagi, falira Boy ma Ayra di ki hu duliyara halaŋ wani, suuna humusi hin gasi kay dlara ca ndaɗta landa egenda.»

Yudas min a ɦal Yesu ki maŋ muli suu li ɓivunna

¹⁰ Sa maa dew duk suu doogo yam mbana yam ana Yudas Iskariyot nam tuɗ eg muli suu li ɓivunna ana nam hin ɦasi Yesu kiyo.

¹¹ Asi humum vunum na ni, hurusi furi ɦay ana, asi hin ɦam gursura. Nam Yudas hal li ma jivi ma ɦasina kina.

Yesu ti mappa Pakŋa u suu haɗi mamma

¹² Hu buu ma jew ma luu ma asi ti fu ma bay kuffa, ni buu ma asi ŋgaɗ gor timigiina kay luu Pakŋa huna, suu haɗina joɓ Yesu ana, «Aŋ min ana ami yaŋ mappa ma Pakŋa ni arage?»

¹³ Yesu cuk suu haɗina mba' dasi ana, «Tuɗugi hu zi ma ŋgolna, agi hin ŋgaf sana u gegelna kamu, cuk tagi umu.

¹⁴ Zi ma nam kal huna, agi joɓ malaŋ zina, Malaŋ Haɗta joɓoŋ ay ana zira nam hin a ti fu Pakŋa u suu mamsinara ni arage?

¹⁵ Sa namma hin takagi zira ŋgolla kolo kay ndaraɗta u tlena ki mini huruɗ halaŋ, agi hin laygi tlena ni huwa.»

¹⁶ Suu haɗina tuɗ hu zi ŋgolna, fi tlena halaŋ ko Yesu dasira na may. Asi li tlesuu Pakŋa huwa.

¹⁷ Fiɗigi ɗaŋi Yesu mba u suu doogo yam mbana.

¹⁸ Asi ŋguy a ti mappana wanni, Yesu dasi ana, «An dagi ni gasira, dukugi agi suu ti mappana u anna, sa maa dew hin ɦan ki maŋ suuna.»

¹⁹ Asi mbuɗ ɗus irisiya, joɓom ki dew dew ana, «Ni an su? Ni an su?»

²⁰ Yesu hoŋosi dira ana, «Ni dukugi agi suu doogo yam mbana, sa ma kom cuk u an hu ŋgotta dewra.

²¹ Goŋ Sanna hin miɗ ko Boy Lonana di ki kamba na. Hahawra ŋgolla kay sa ɦal Goŋ Sanna ki na, nam vuɗ ki ginɗi ni mariyaɗ.»

Funa vi Buu Suuna

²² Mayra asi a ti funara wanni, Yesu tli funa komu, gi deɓ Lona kamu, mbulukum irim ki duk mbulukŋi, ɦasina ana, «Vagina, ni tliwinu.»

²³ Nam tli sum veŋŋa kom olo, gi deɓ Lona kamu, ɦasina. Asi cam bel.

²⁴ Nam dasi ana, «Ni busu ma agi vi banara u Lona u namma. Ni busu ma vo ki kay suuna halaŋ a bulumusi coosira ki na.

²⁵ An dagi ni gasira, an ka ci vuɗ gugutlura u agi oloɗi gak gak, an hin ci ma wilina ni hu Mul Lonara tuwa.»

²⁶ Asi gi soolla luuna gi ni, cuk tasi tuɗ kay ɦinira Conora.

Yesu ana Piyer hin tin vunum kamu

²⁷ Yesu di suu haɗi mamma ana, «Agi halaŋ hin noyon kiyo. Kay Boy Lonana ki ɓiiri ana, An hin ci sa taa timigiina kiyo. Timigii mamsina hin njay ki may.

²⁸ Falira an paɗ ki kolo iiri wani, an hin tuɗ ha fokogi Galile.»

²⁹ Piyer kaam vunum ana, «Lini suu halaŋŋa hiniŋ ki lay ni, an na ɗow ni ka hiniŋ kiɗi.»

³⁰ Yesu hoŋom dira ana, «An daŋ ha ni gasi, jew golok tlekŋa hel a yamba mbara wanni, aŋ hin tin vunuŋ ki kan yaŋŋa hindi ana aŋ ka wanɗi.»

³¹ Piyer so vunum ki paɗ paɗ ana, «Asi li can ki u aŋ lay ni, an ka di ana, an ka waŋgiraɗi.» Suu haɗi suu hiŋŋa halaŋ di na lay.

Yesu cen Lona hu Getsemane

³² Asi mba hu li ma yam Getsemane. Yesu di suu haɗi mamma ana, «An nda cen Lona, agi lakagi ka tani na ca.»

³³ Nam yow ki Piyer u Jak u Jaŋ umu. Nam gijaŋ li ndaana may, tam tuɗum na dukuk dukuk.

³⁴ Nam dasi ana, «Hahawra fan wa, ni vun maɗanu. Lakagi jek jekee, buurugi senɗi, ko an na may.»

³⁵ Nam ɦuɗ fok nde ni, gi tam kaŋga, cen ana li ni dla ndaɗta liya ni, hahaw ndaɗta ɦuɗ ki egen day.

³⁶ Nam di ana, «Abba, Bunu, tlena halaŋ ka li koŋ loɓbi. Hahaw ndaɗta aŋ hininda kanɗi. Ni ka min mandaɗi, li ko aŋ minda na.»

³⁷ Nam hoŋ ay eg suu haɗi mam suu hindina wanni, fasi ki senna. Nam di Piyer ana, «Simon aŋ buu ni senna su? Aŋ ndak a kak u iriŋ na njok ki su?

³⁸ Lakagi jek jekee, buurugi sennaɗi, cenegiya a va ndemegiɗi. Saara mina, tliw tara dawiya.»

³⁹ Nam hoŋ a cenda, di ni boy ma namma olo.

⁴⁰ Nam hoŋ ay egesi fasi senna olo, kay irisi goŋ ki kasiya, asi ka fi ɗoɓ boy ma dambi.

⁴¹ Nam hoŋ ay egesi a yamba hindira dasi ana, «Agi buu senna, koɗogi tagi ɗaŋi nanage? Lin ndak wa. Gologiya! Goŋ Sanna ɦam ki ko suu hurusi cona.

⁴² Yowogi koloo! Tuɗuygiya! Sa ɦan kina ka tok.»

Suuna vi Yesu

⁴³ Vunum ma ɓakŋa bay ndi kaŋga tu may ni, Yudas ma duk suu doogo yam mbana mbay u suuna um bolowo, ŋgewegina bikisi may, tokolora kosi may. Sunusi ay ni muli suu li ɓivunna, u suu wi magaara, u suu ŋgolona lay.

⁴⁴ Yudas, ma ɦam kina, takasi mbeleŋŋa ay ki ana, «Aygi tuɗuygi ha wana, sa ma an gam deɓpa mboɗom kolo hurunna, ni namu, vagina. A tuɗumba wanni, vagina kogi jiviya.»

⁴⁵ Yudas mba mba ni, ɦuɗ tam eg Yesu gaw, yam ana, «Malaŋ Haɗta, gaŋ deɓpa,» mboɗom kolo hurumu.

⁴⁶ Suu ay u Yudasna ŋguf Yesu, vam gaw.

⁴⁷ Sa dew duk suu vi Yesuna paɗ ŋgew mamma, ka hum sa li sunda fok mul ŋgol ma li ɓivunna kiyo.

⁴⁸ Yesu dasi ana, «Agi mbay u ŋgewegina bikigi may, tokolora kogi may, a van ni, an ni sa kul su?

⁴⁹ An ay haɗagi hu Ziŋ Lonara tew tew ni, agi vanɗi kay mege? Dla ndaɗta mbay kan ni, ko Boy Lonana di ay ki fok jewra na.»

⁵⁰ Suu haɗi mamma hinim tani, njay piira gaw.

⁵¹ Goozoŋ maa dew cuɗ u Yesu haa, u barawna kelewi kelemu. Asi hal a vam may ni,

⁵² nam cukusi barawna ha kosi ca ni, paɗ liŋŋa sili gaw.

Yesu fok suu kaɓakŋa

⁵³ Asi mba Yesu fok mul ŋgol ma li ɓivunna. Suu ŋgolona u muli suu li ɓivunna u suu wi magaara tok ki gaa egemu.

⁵⁴ Piyer ay ŋgorom day, cuɗum um ay gak gak, mba kal vi mul ŋgol ma li ɓivunna. Nam kak duk suu vi mulnana, hol kura u asiya.

⁵⁵ Muli suu li ɓivunna u suu ŋgolo suu kaɓakŋa hal dlara kay Yesu a cam kira, ka faɗɗi.

⁵⁶ Dlara asi daɗ kay Yesura halaŋŋi, kaboyna sak sak, vunusi ka taɓ ko tambi.

⁵⁷ Suu ɦiw yow koloo, kaboyna egem ana,

⁵⁸ «Ami hum nam di ana, Ziŋ Lonara ta suuna miniɗ u kosira an hin tooɗ kiyo. An hin min mayra ko sa ka egeɗ ɗira, hu buuna hindi.»

⁵⁹ Kay boy namma lay ni, vunusi ka u tam dewɗi lay.

⁶⁰ Mul ŋgol ma li ɓivunna col kolo dukusi, joɓ Yesu ana, «Aŋ ka hoŋomi va ki dukŋa dewɗi amege? Aŋ ka hum dlara asi daŋga kaŋgaɗi su?»

⁶¹ Yesu seŋ tam yerek yerek, dam vun ka dukgi. Mul ŋgol ma li ɓivunna joɓom olo, «Aŋŋi Sa Lona Fuurumma, ma Goŋ Lonna ma bibiŋilna su?»

⁶² Yesu dam ana, «Ni an ɗaŋ may. Agi hin wi Goŋ Sanna kagi kay bik Lona ma njufna ma saɓakŋa kom belna. Agi hin wam nam hoŋ ay duk ɗugulla.»

⁶³ Mul ŋgol ma li ɓivunna hum na ni, haa baraw mamma ki gaw ana, «Hal ni boy me kam olo ge?

⁶⁴ Agi humum vunum ma ŋgul Lona ki halaŋ. Irigi ana mege?» Asi taɓ vunusi halaŋ ana, «Cam ki ciya.»

⁶⁵ Suu ɦiw gijaŋ tofoɗom yoyona kamu, baaram barawna irimu, cam ci ni, joɓom ana, «Sa caŋŋa ni gege?» Suu asgaana cam irim piŋ piŋ.

Piyer tin vunum ki ana, nam ka wi Yesuɗi

⁶⁶ Piyer hu taraŋga tu wanni, cara li sunda vi mulnara mbaya.

⁶⁷ Ndaɗ wi Piyer hol tam vun kura wanni, ndaɗ golom ki jivi lay, dam ana, «Aŋ ay ni u Yesu ma Nazaretna layɗi su?»

⁶⁸ Piyer tin vunum ki ana, «An ka wi u dlara ndak dan kaɗtaɗi.» Nam gi tam ki vun grekŋa. Golok tlekŋa hel gaw.

⁶⁹ Ca ndaɗta wam wi olo ni, hoŋ di maŋ suu moli egeɗna ana, «Sa namma ay dukusi may.»

⁷⁰ Piyer tin vunum olo. Kak njokŋi, suu molina di Piyer olo, «Gasi. Aŋ ay ni dukusiya. Aŋŋi sa Galilenaɗi su?»

⁷¹ Piyer gijaŋ suu tamu, «Lini an ka ni boyna ni, Lona gan daŋgayna. An ka wi sa ma agi ɓakan kammaɗi.»

⁷² Vunum ndi kaŋga may ni, golok tlekŋa hel a yamba mbara gaw. Piyer humum gam kay boy ma Yesu damma ana, «Jew golok tlekŋa hel a yamba mbara wanni, aŋ hin tin vunuŋ ki kan yaŋŋa hindi ana, aŋ ka wanɗi.» Piyer gi tam tii u simina irim na buɗuɗ.