MARK 13 - Boy Lonana

Yesu ana zira vi Londa Yerusalemba hin to kiyo

¹ Yesu kal ay ki hu Ziŋ Lonara wanni, sa haɗi mamma dew dam ana, «Malaŋ Haɗta, aŋ gol zira mini ŋgolla, jivira u ɦinira ŋgolora gige!»

² Yesu dam ana, «Aŋ wi zira ŋgol ndaɗta su? Ҥini ta dew hin ka a li jaki kolo kay ndaraɗɗi. Asi hin tooɗ ki kaŋga halaŋ.»

Hahawra hin mba kay suuna

³ Yesu kak kay ɦinira Conora, pay Ziŋ Lonara tok. Piyer, Jak, Jaŋ u Andre egemi asi doy hol joɓom ana,

⁴ «Dami ay gige! Dla ndaɗta hin li ni saɓage? Va ma hin tak ana tle asina hin tok a liyana ni mege?»

⁵ Yesu gijaŋ dasi ana, «Lagi tagi jiviya. Hin sa a ganagi yagiɗi.

⁶ Suuna hin mba u sen bolow cocoo, hin di ana, Anni Sa Lona Fuurumma. Asi hin ganyam suuna ki usi cocoo.

⁷ Falira agi li ka hum soora vi duuna tok lay, hum boy dla duuna ha hu mbassa day lay ni, lagi ndaaɗi. Dla ndaɗta hin mbaa. Ni ka daɓpa vi ndaŋgaraɗi tuwa.

⁸ Njaf suu dewna tuɗ duu ha suu hiŋŋa may, mulla tuɗ duu ha mul hiŋga may. Ndaŋgara hin gijaŋ geŋeɗta, bakdarra ŋgolla ndi gaw may. Dla ndaɗta li ni ko cara wi hawra a gi jaŋ vuɗtara na.

⁹ «Agi gologi tagi jiviya. Suuna hin tuɗugi fun ɓakŋa. Asi hin poŋogi u balafna hu Zira Tokka. Asi tuɗugi fok suu ŋgolona u mulina kay senu. Fokosiya agi ni suu vovoɗ manda.

¹⁰ Boy ma Ayra ɓak ki jew kay yam mbassa halaŋ tuwa.

¹¹ Falira asi vagira, ɓigigi vun dikigi kay va ma agi dammaɗi. Fali ndaɗta boy ma agi damma ka dam agiɗi, dagina ay funugi ni Musuk Lonara.

¹² Hu li namma sana ɦal wayamma ki fun maɗna lay, bu goona hin ɦal goromma ki na lay. Kemba hin hoŋ irisi eg somoyosi a casi ki lay.

¹³ Suuna halaŋ hin tinigi ira ki kanu. Sa ma tin hurum kan na din din, faɗ ha ki na faɗ na, nam hin suɗ kiyo.»

Hahawra ŋgolla sa bay waɗ tura

¹⁴ «Agi hin wi hahawra ŋgolla ka gin a mba kay sa ɗira. Sa ma ndum boy namma humum ki jivina. Hu buu namma suu Yudena hin njay liŋŋa kay ɦinira.

¹⁵ Sa ma fam fun zirana ka kal kalafi a yow va kombi.

¹⁶ Sa ma fam ha ki hu senena ka hoŋ vo a yow baraw mamma kombi lay.

¹⁷ Boyogi suu wiina u suu gorra kosi fun ponana, hu buu namma asi mbuɗ ki hahawra na holiyok.

¹⁸ Cenegi Lona kay boy namma mba li hu til semeɗnaɗi.

¹⁹ Hu buu namma suuna hin wihawra cocoo. Wihaw ndaɗta ura tin ayra lay ni sa ka bay wihawra na tuwa. Wihawra ko ndaɗta na ka mba dagan oloɗi lay.

²⁰ Lini Bu Suuna ŋga buu namma ay gedeŋ ginɗi ni, sa ndak a hin iiriɗi. Nam hoŋ buu namma ki daganni kay suu nam manasi ki mamma.

²¹ «Lini sa dagi ana, Sa Lona Fuurumma ka tani, ki ɗow ni, caa yagi kay boy nammaɗi.

²² Suu ɦiw hin mba di ana, Anni Sa Lona Fuurumma. Anni sa jok vun Lonna. Ni kaboyna. Asi li dlara mbuɗta u takka ni ana lini asi fi voɗta ni, asi viɗ ii suu Lona manasi kina usiya.

²³ Na may ni, agi gologi tagi kay dlara hin mbayra, an neegi ki jewe.»

Goŋ Sanna hin hoŋ aya

²⁴ «Hu buu namma ŋgoo lassa dagan wanni, faɗta hin mbuɗ ki ndufunu, tilna ka wi haɓ oloɗi lay,

²⁵ ciciwra hin yak ay ki kaŋgaa, saɓakŋa vi tlesuu huulona hin geŋeɗa.

²⁶ Na ɗaŋ asi hin wi Goŋ Sanna mbay duk ɗugulla u saɓakŋa kom halaŋ, u bibiŋil mamba lay.

²⁷ Nam hin sun suu sunda huulona ay foko, a tok suu Lona manasina ki kay tasiya, kay yam mbassa halaŋ ay vun ndaŋgara dodora u maɗiina, u fiɗigina, mbayaw lay, dali lay.»

Haɗta kay tulumma

²⁸ «Agi gol u ɗuf tlena gege! Dulumma gijaŋ ɗuffa wani, agi wi ana ndolla hin tok.

²⁹ Agi wi ki wa ana tle asina ka li na ni, agi wi kagi ana dla ndaɗta hin tok, ka doŋ kaana.

³⁰ Gasi an dagi ni u voɗoɗu, njaf namma ka daɓ ki miɗna bay wi dla ndaɗta u irigiɗi.

³¹ Huulona u ndaŋgara hin daɓ kiyo, boy manna ka daɓ kiɗi.»

Lona wi buu namma ni nam dew

³² «Buu ma dla ndaɗta li huna, sa ka wambi. Suu sunda huulona ka wambi lay. Goŋ Lonna ka wambi lay. Buna wammi nam dew.

³³ Lagi tagi jiviya. Buurugi senɗi. Agi ka wi buu ma dla ndaɗta mba hunaɗi.

³⁴ Dla ndaɗta ni ko san tuɗ koyra na. Nam hin ziim ka maŋ suu varamma, gegelay u sun mamba komu. Sa juɓ u zina hin juɓum ni iiriya.

³⁵ Agi lay ni kakagi iiri na may, kayme agi ka wi buu ma malaŋ zina hoŋ ay vo hunaɗi. Nam hin hoŋ ay ni fiɗigi kala, duk ŋgikka kala, ŋgarapii kala, maɗii kala, agi ka wiɗi.

³⁶ Ko nam kafagi, fagi ki senɗi.

³⁷ Boy ma an daginana, ni maŋ suuna bel, juɓugi iiriya.»