MARK 12 - Boy Lonana

Yesu tin ndal boyna u suu horok senena

¹ Yesu gijaŋ ɓak suuna u ndal boyna ana, «Sana li senena li ni, dlaɓam yamu, vek zulla a em gugutlura, nam pi mbutluɓma duku. Nam a tuɗ hu li ma daŋŋa wanni, ɦam ka maŋ suuna ana asi lam kaa.

² Tlesuu hu senena ndak a feɗta ndakŋi, nam sun sana ay eg suu sunda ana asi ŋgaam ii mamsina aya.

³ Asi vam paɓ, poŋom taa taa, gam u kom ma vadlna.

⁴ Malaŋ senena sun sa daŋŋa na olo. Sa namma asi coom yam kam ɦooɗoɗ, karakam ŋgulla ha lay.

⁵ Nam hin sun ma daŋŋa ha huwa, namma asi cam ki maɗna gaw. Malaŋ senena cuk suu daŋŋa ay ŋgol su suu jewna olo, suu ɦiw suu li sunda hu senena poŋosi taa taa, suu hiŋŋa asi casi ki maɗna.

⁶ Gorom ma nam minim ɦayna, hin kommi nam dew. Nam sun goorom ha dagan ni ana, Tasi hin mbuɗ zolo kombi su?

⁷ Suu li sunda hu senena wam wi ni, ɓak duk tasi ana, Cow ni sa yow daa jo bumma. Tuɗ caygina ki ci ni, jo bum hin ki maygi silik silik.

⁸ Asi vam gaw, cam ki ci ni, gam ha ki keŋ senena.»

⁹ Yesu dasi ana, «Malaŋ senena hin li nanage? Nam hin mba ci suu asina kiyo, varak suu daŋŋa hu sene mamma.

¹⁰ Agi hum boy ma ɓiiri hu magaarana kaɗi su? Ҥinira suu min goŋga noyoɗ ki kaŋgara, hin mbuɗ a jiv goŋga ki ni ndaɗu.

¹¹ Gola ni dlara Bu Suuna laɗta, aygi goloɗ na ni, ndaɗ su ki kaygi cocoo.»

¹² Muli suu Juifna hal a vi Yesu, kay asi wi ki ana nam tinisi ndal boy namma ni kasiya. Asi li ndaana ko suuna moli cocora, asi hinim tani, cuk tasi gaw.

Warak taara maŋ Mulna

¹³ Asi sun suu Farisenna ɦiw u suu vi Herodna ha eg Yesu a duum delem u boyna.

¹⁴ Asi mbay eg Yesu dam ana, «Malaŋ Haɗta, ami wi ana aŋŋi sa gasina. Aŋ ka tin yaŋ kay saara vi saɗi lay. Aŋ takŋi voɗta vi Lona ta gasira. U gaɗ maygira ni, ɦal taara maŋ Sesar, ɗowba ɦalɗi su?»

¹⁵ Yesu wasi mbeleŋesi na ni, nam dasi ana, «Agi hal a duun delen ni kay mege? Ҥan sili ay dew. An goloɗ gige.»

¹⁶ Asi ɦam taa ay dew, nam joɓosi ana, «Tinni hu ni yam gege? Ɓiiri hu ni sem gege?» Asi dam ana, «Ni Sesar.»

¹⁷ Yesu dasi ana, «Vaŋ Sesarna ɦam maŋ Sesar, vaŋ Lonna aŋ ɦam maŋ Lona may.» Asi mbuɗ lakira na jim ko boy ma Yesu hoŋosinana.

Joɓpa kay paɗta kolora vi suu miɗina

¹⁸ Suu Sadusenna mbay eg Yesu. Asi ni suu di ana suu miɗina ka paɗ ki kolo iiriɗi na.

¹⁹ Asi joɓom ana, «Malaŋ Haɗta, Moiz hiniygi gaɗta ka ana, Lini sana wayamma miɗa, hin caamba ka bay goo koɗu, nam kakaɗ a vuɗ gotra maŋ wayamma.

²⁰ Ko ndaɗtana goryoŋ cara dewra na kiɗisiya. Ma ŋgolna vi cara miɗ ki bay vuɗuɗ goo koɗu.

²¹ Ma kamma kakaɗu, miɗ ki bay vuɗuɗ goo koɗ olo. Ma hindina li ni na lay.

²² U dlaasira kiɗisiyara jokoɗ usi halaŋ, daɓ miɗna bay vuɗuɗ goo koɗu. Ŋgorosi dagani cara miɗ ha may.

²³ Asi kiɗisiya kakaɗ ay ki usi bel may ni, hu buu ma suu miɗina paɗ ki kolona, ndaɗ hin kak a cara ni u maana ge?»

²⁴ Yesu hoŋosi dira ana, «Agi viɗ tagi wa, kay agi ka wi Boy Lonanaɗi, ka wi saɓakŋa vi Lonaɗi lay.

²⁵ Falira suu miɗina paɗ ki kolo iirira, sa njufna ka ɗum caɗi lay, ca ka kak njufɗi lay. Asi hin kakŋi ko suu sunda kolo huulonara na.

²⁶ Agi gol ka hu magaara vi Moiz kay paɗta kolora vi suu miɗina u boy ma Lona dam maŋ Moiz duk gu ma siinaɗi su? Lona di ana, Anni Loŋ Abrahamma, Loŋ Isaakŋa, Loŋ Yakobma.

²⁷ Nam ka Lo ma vi suu miɗinaɗi, Lo vi suu iirina ni namu. Kay boy namma wanni, agi viɗ tagi kam cocoo.»

Gaɗta su ndarayaɗnara

²⁸ Sa wi magaara humusi asi ciwayra duk tasiya. Nam wi ana Yesu hoŋ dira maŋ suu Sadusenna jiviya ni, nam ɦuɗ tam egemu, joɓom ana, «Gaɗta su ndarayaɗnara ni taarage?»

²⁹ Yesu hoŋom dira ana, «Gola ni gaɗta su ndarayaɗnara, Suu Israelna, humugi haa. Looygina Bu Suuna ni nam dew. Lo ma daŋ kaɗi.

³⁰ Aŋ min Lona Bu Suuna u huruŋ halaŋ, u musukuŋ halaŋ, u saɓakaŋ halaŋ. Nira jewra.

³¹ Ta mbara wanni ana, Aŋ min ndaraŋŋa ko aŋ min taŋga na. Gaɗta su kay ta mbara ca ni kaɗi.»

³² Sa wi magaara dam ana, «Malaŋ Haɗta, aŋ di ni u voɗoɗu. Ni na ɗaŋ may. Bu Suuna ni Lona dew, ma daŋ kaɗi.

³³ Sana min Lona u hurum halaŋ, u musukum halaŋ, u saɓakam halaŋ, min ndaramma ko tamba na. Dla ndaɗta jivi su ɓivunna u poora suuna laɗta halaŋ.»

³⁴ Yesu wi ana sana hoŋom dira ɗegeera ni, nam dam ana, «Aŋ ka ki eg Mul Lonara dayɗi.» Ŋgoo daganda wanni, sa ndak ka a joɓom boy ma daŋ oloɗi.

Kristu ni goŋ ki na ge?

³⁵ Yesu haɗ hu Ziŋ Lonara joɓ ana, «Suu wi magaara di ana Sa ma Lona Fuurumma ni Goŋ Davidna ni nanage?

³⁶ David u tamba di ki u saɓakŋa vi Musuk Lonara ana, Bu Suuna di maŋ Bu Suuna manna ana, Kak kay bikin ma njufna, gak gak an cukuŋ babali maŋsina ki kaŋga u seŋ tuwa.

³⁷ David u tamba yam ana, Bu Suuna mamma, nam hin mbuɗ a Goŋ Davidna ni nanage?» Suuna moli cocoo hum Yesu u ayra.

Yesu ne suuna ki eg suu wi magaara

³⁸ Yesu di suu nam haɗasina ana, «Lagi tagi jivi ko suu wi magara. Asi suu poy u baraw ma ŋgolona. Asi min deɓpa duk bolowra.

³⁹ Asi min ana hu Zira Tokka ni, asi lakŋi foko. Asi man lii jivina a ti funa duk bolowra.

⁴⁰ Asi daɓ tlesuu vi boyogi suu ki donona ni asiya. Lay ni asi li cenda fiyekka a jiv tasi ki ii suuna. Suu asina Lona hin mba kaasi ɓak ma cona kasiya.»

Cara donora ɦal gursura maŋ Lona

⁴¹ Yesu kak eg zandukka suuna cuk gursura maŋ Lona hura. Nam gol suu cuk gursura huna. Suu ɦizina cuk ŋgolo.

⁴² Cara donora hawi mba cuk sili mba'.

⁴³ Yesu yi suu haɗi mamsina egemu, dasi ana, «An dagi ha ni gasira, suuna kof day cuk gursura ni, cara donora wihawra cuk suusi bel bel.

⁴⁴ Asi halaŋ cukŋi kay asi kay tasi ndakiya. Ndaɗ u hahaw maɗta cuk ki ni, ma ndaɗ ti gin vunuɗ u namma halaŋ.»