MARK 11 - Boy Lonana

Yesu kal Yerusalem

¹ Asi mbay eg Yerusalem tok, duk ɦoŋzi ma Betfage u ma Betanina, asi tew eg ɦinira Conora. Yesu sun suu haɗi mam suu mba' ha foko,

² dasi ana: «Tuɗugi ha hu zi ma fokogi wanna. Agi tew hu zi namma wani, agi fi goo kor ma bay sa ful kam tuna, njuniya. Buɗugina aya, mbaaraɗ ay tani.

³ Sa li joɓogi ana agi buɗum amege ni, agi dam ana, Bu Suuna a minimu. Nam hin hoŋogina ay cem cem.»

⁴ Asi kal ha hu zina ni, fi goo korona njuni vun grekŋa keŋ voɗta. Asi buɗum gaw.

⁵ Suu hu zi namma suu ɦiw joɓosi ana, «Lagi ni menage? Agi buɗum a li me u nam ge?»

⁶ Suu haɗina njaɗasi ko Yesu dasi ayra na. Asi hinisi gaw.

⁷ Asi mbaa goo korona ay maŋ Yesu mbaa ni, boɗ baraw masina kay ceremu. Yesu ful kamu.

⁸ Ŋgol suuna baa baraw masina fokom hu voɗta, suu ɦiw dan bubura ay hu senena, baaramba ha gaa hu voɗta fokomu.

⁹ Suu fok Yesuna u suu ŋgorom daganna sawalla ha kolo ana, «Geleɗeygi Lona. Nam paɗ vunum ki kay sa mbay u sem Bu Suunana.

¹⁰ Lona paɗ vunum ki kay mulla vi buy David ta hin mbayra na paɗ ge. Geleɗeygi Lona ha kolo huulona.»

¹¹ Yesu mba Yerusalem, kal hu Ziŋ Lonara. Nam daɓ suu egemma ki gola daɓmi, jak u suu doogo yam mbana Betani, ni fatɗa ki suya.

Yesu gi vunna maŋ tulumma

¹² Vin maɗiira, asi yow ay ki Betani yow ni, Yesu mayra mbuɗ camu.

¹³ Yesu wi ŋgus tulumma ha ki egem na day, nam tuɗ um ana fam vuɗum hu kalage. Nam tew um tew ni, fi vuɗ kaɗi, ni humum ɦawaa. Ni ka hu til ma tulumma vuɗ naɗi.

¹⁴ Yesu di tulumma ana, «Sa hin ka taŋ vuɗuŋ oloɗi.» Suu haɗi mamsina hum boy namma may.

Yesu hu Ziŋ Lonara

¹⁵ Asi tew Yerusalem tew ni, Yesu kal hu Ziŋ Lonara. Nam gijaŋ dik suu gus tlegeyesi kina, u suu mba gus kosina ki hu Ziŋ Lonara. Nam zuɗ tabulla vi suu mbuɗ gursura ki kaŋgaa, dlamba vi suu gus gugukka nam zuɗuɗ ki kaŋga lay.

¹⁶ Nam ka hin sa tli va kom a kal ki u nambi lay.

¹⁷ Nam haɗasi kay boy namma ana, «Ki ɓiiri ana, Ziinda hin li ni zira cen Lona maŋ suuna halaŋ. Agi mbuɗuɗ ki zira kulna ni a mege?»

¹⁸ Muli suu li ɓivunna u suu wi magaara hum boy namma na ni, hal a cam kiyo. Asi lam ndaaramu, kayme suuna halaŋ ŋgaam haɗ mamba cocoo.

¹⁹ Fiɗigira mba mba ni, Yesu u suu haɗi mamsina cuk ki doŋ kaana.

Haɗta kay tulum ma so kina

²⁰ Yesu u suu mamsina hoŋ ay maɗii wanni, asi wi tulumma tin sora ha kay sariyam na day, faɗ ki kay yamu.

²¹ Piyer humum gam kay boy ma Yesu gi vun tulummana, nam di Yesu ana, «Malaŋ Haɗta, gola, tulum ma aŋ gam vunnana, so ki wa.»

²² Yesu hoŋ dira daŋŋi ana, «An dagi ni gasira! Lini hurugi tini kay Lona ni,

²³ agi ndak a di ɦinira wanda ana, Gi tak ha ki duk mbo ŋgolna. Lini hurugi ka mbambaɗi ni, tin hurugi wa ana dla ndaɗta hin liya ni, ndaɗ hin li gasi may.

²⁴ Kay ndaɗta an dagi haa, Falira agi li cen Lona a joɓ kay vaa ni, tin hurugi ana va namma ki kogiya ni, agi hin fam gasi may.

²⁵ Falira agi col kolo a cen Lona, li ni hurugi co eg tagi u saa ni, daɓagi boy magi namma ay ki tuwa. Na ni Bugi ma kolo huulonana hin daɓagi coogira ki na may. [

²⁶ Lini agi ka daɓ cora duk tagira kiɗi ni, Bugi ma kolo huulonana ka daɓagi coogira kiɗi may.»]

Yesu li dlaamba ni u saɓak gege?

²⁷ Asi hoŋ ay Yerusalem olo. Yesu poy hu Ziŋ Lonara wanni, muli suu li ɓivunna u suu wi magaara u suu ŋgolona mbay eg Yesu,

²⁸ dam ana, «Aŋ li tlegeyeŋ ni u saɓak gege? Sa ɦaŋ voɗta a li tlesuu asina ni gege?»

²⁹ Yesu hoŋosi dira ana, «An ka joɓogi va ha dew. Agi gan u va namma ay ki wani, an hin dagi ana saɓak ma an li tlenana col ay ni eg sa wanna ni. Agi dan aya,

³⁰ Sa sun Jaŋ a mbus batemma ni Lona ɗowba suuna su?»

³¹ Asi gijaŋ joɓ tasi ana, «Lini aygi di wa ana, Lona sunum ay ni namu ni, nam hin ana aygi tin huruygi kambi ni amege?»

³² Lini ay di wa ana suuna sunum ay ni asiya ni, asi li ndaana, kay suuna halaŋ tin hurusi ana Jaŋ ma mbus batemma maŋ suuna ni sa jok vun Lona ma gasina.

³³ Asi wi na ni, hoŋom dira ana, «Ka irimiɗi.» Yesu hin dasi ana, «An lay ni ka dagi sa an li dlaanda funummaɗi may.»