MARK 1 - Boy Lonana

Bolla vi Jaŋ ma mbus batemma maŋ suuna

¹ Gola ni gijaŋŋa vi Boy ma Ayra ma di ki kay Yesu Kristu, Goŋ Lonna.

² Ezayi sa jok vun Lona ɓii hu magaa mamba, «An gi sun manda ha fokoŋu, nam mba wakaŋ voɗ maŋga.

³ Del sana sawalla ki ŋgoo bagiya, Ɗoɓogi voɗta vi Bu Suunara kiyo, mbuuɗ huruɗ kiyo.»

⁴ Na ɗaŋŋi Jaŋ kal ki ŋgoo bagiya, mbus batemma maŋ suuna. Nam di suuna ana, «Jokogi hurugi ki zeɗ, mbusugi batemma, Lona hin daɓagi coogira kiyo.»

⁵ Suu hu mbassa Yudera u suu vo Yerusalemma halaŋ tuɗ ha egemu, asi yi coosira ki u vunusiya, nam mbususi batemma duk yo lum ma Yurdanna ni na gaw.

⁶ Jaŋ baraw mamma cili ni u tlimiɗ jamballa, nam njun hurum ni gandina. Tlegeyem suu nam fasi a tira ni gi baarina u mbul yumma ki ŋgoo bagiya.

⁷ Nam ɓak hu bol mamba ana, «Sa ma dlam ŋgol suunna ka tuɗ ay ŋgoron daganni. An ndak ka a buɗum zew tuɓuru ma semma kiɗi.

⁸ Anu, an mbusugi batemma ni u yona, nam hin mbusugi batemma u Musuk Lonara.»

Yesu fi batemma fi ni, Satan hal a ndemem gini

⁹ Hu buu namma Yesu ay Nazaret hu mbassa Galilera wanni, nam fi batemma fok Jaŋ duk lumma Yurdanna.

¹⁰ Hu li ma nam taɓa ay kolo doŋ lumma taɓana, nam wi huulona ki maliya. Musuk Lonara sii ay kaŋga kam ko gugukka na.

¹¹ Della ɓak ay kolo huulona ana, «Aŋŋi gooron ma an miniŋ ɦayna. Aŋ irin jivi ɦay.»

¹² Cecemi Musuk Lonara tin Yesu ki ŋgoo bagiya.

¹³ Nam ay ki ŋgoo bagi li buuna dok fiɗi, Satan hal a ndememu. Nam ay ki ni duk mburi suu ŋgoo bagina. Suu sunda huulona sunumu.

Yesu yi suu ciwna fiɗi

¹⁴ Fat mayra asi vi Jaŋ ma mbus batemma maŋ suunana daŋgayna ni, Yesu tuɗ Galile gaw, ɓak Boy ma Ayra vi Lonna.

¹⁵ Nam di ana, «Lin ndak wa. Mul Lonara mba wa tok. Jokogi hurugiya. Vagi u Boy ma Ayra.»

¹⁶ Hu li ma Yesu tuɗ fun lumma Galilena wanni, nam wi suu ciwna mba', ni Simon u wayamma Andre, asi cuk bay masina goloŋ a ciwna.

¹⁷ Yesu dasi ana, «Tuɗugi ay unu. An hin mbuɗugi ki suu ciw suuna.»

¹⁸ Cecemi asi hin bay masina ha ki tani, cuk tasi um gaw.

¹⁹ Tuɗ fok na nde ni, nam wi Jak goŋ Zebedena u wayamma Jaŋ. Asi cil ii bay masina hu lumba.

²⁰ Cem cem Yesu yasiya. Asi hin busi Zebede hu lumba u suu mamsina tani, cuk tasi umu.

Yesu dik ful ma cona ki kay sana

²¹ Yesu u suu haɗi mamsina kal ɦoŋzina Kapernaum. Ni hu buu ma vi Lonna. Yesu kal hu Zira Tokka a haɗ suuna.

²² Asi mol na jim ko haɗ mamba. Kay mege nam haɗasi wanni, ko sa um eŋŋa na, ka ko suu wi magaara naɗi.

²³ Cecemi asi hu Zira Tokka wanni, sa ma ful ma cona kamma col koloo, sawalla ana,

²⁴ «Aŋ a lami ni nanage? Yesu ma Nazaretna, aŋ mba a viɗimi ki su? An waŋ uŋ kiyo, aŋŋi sa teteɗ ma Lona sunum ayna.»

²⁵ Yesu bay ful ma cona ana, «Seŋ taŋu! Kal ay kiyo, hin sana ki ɦawaa.»

²⁶ Ful namma dlak ta sana ki na jik jik, nam sana bay na haŋgak ni, fulna kal ki gaw.

²⁷ Asi halaŋ mbuɗ na jim, saa gak gak, joɓ tasi ana, «Ni dla me na ge? Agi gola sa ma haɗaygi boy ma wilina, ko sa ma um eŋŋa na. Nam yal fuli suu cona u saɓakŋa na ni, asi vam vunumu.»

²⁸ Asi humum dlaamba njay ki hu mbassa Galilera halaŋ gaw.

Yesu garaɗ suu tuguɗira ki bolowo

²⁹ Asi hin Zira Tokka ki tani, tuɗ vi Simon u wayamma Andre, gi Jak u Jaŋ tuɗ um may.

³⁰ Kunuŋ Simonda buuri kaŋga taɗ taɗu. Taɗ egeɗ kura na keŋ keŋ. Asi di Yesu kaɗu.

³¹ Nam tuɗ egeɗu, vaɗ koɗu, coloɗ koloo. Tuguɗira hiniɗ ki tani, ndaɗ gijaŋ sunusi gaw.

³² Fiɗigira mba mba ni, lina ziwin ki ziwin ni, asi yowom suu tuguɗira ay egem halaŋ, suu ful ma cona kasina ay duk lay.

³³ Suu may suu hu ɦoŋzina halaŋ tok ay vun zira,

³⁴ tuguɗi masira njafaɗ ki zeɗ zeɗ, nam suɗusi ki halaŋ. Nam dik fuli suu cona ki bolow lay. Nam doo fulina ki ana asi ɓakgi, kay asi wam umba col ayra.

Yesu poy yam mbassa Galilera

³⁵ Ŋgarapii i lina ndufun nde nde tu wanni, Yesu col koloo, kal ki buruwa, tuɗ hu fulla a cen Lona hu li namma.

³⁶ Simon u ndarayamma tuɗ ha kay cerem a halamu.

³⁷ Asi fam fi ni, hin dam ana, «Suuna halaŋ ka halaŋu.»

³⁸ Yesu hoŋosi dira ana, «Tuɗuygi hu zi ma daŋŋa. An hin ɓakasi Boy ma Ayra ki lay. An mbay ni kay ndaɗta.»

³⁹ Nam kal hu Zira Tokka hu mbassa Galilera bel bel, nam ɓakasi Boy ma Ayra, nam dik fuli suu cona ki lay.

Yesu garaɗ sa busuna lamma kiyo

⁴⁰ Sa busuna lamma mbay eg Yesu, goɓ kaŋga fokomu, joɓom ana, «Lini aŋ mina ni, aŋ ndak a mbuɗun ki jivi mbuɗge.»

⁴¹ Yesu wam hawam wi ni, maɗ kom kamu, ŋgenemu, dam ana, «An mina. Aŋ garaɗ kiyo.»

⁴² Cecemi busuna hinimu, nam garaɗ kiyo.

⁴³ Yesu gaɗam u eŋga, gam ki buruwa,

⁴⁴ dam ana, «Li taŋ jiviya. Aŋ di boy namma ki maŋ saɗi. Tuɗ tak taŋ ki maŋ sa li ɓivunna. Aŋ ɦal va li ɓivunna ko Moiz di kay mbuɗta jivira na may. Dla ndaɗta tak ki maŋ asi ana taŋ hiniŋ ki wa.»

⁴⁵ Sa namma kal ki kal ni, ɓak ki maŋ suuna wet wet kay boy namma. Ni kay ndaɗta Yesu ndak a kal ki ɦoŋzina oloɗi. Nam col ki ŋgoo bagiya, asi suuna mbay egem na ziɗim ziɗim.