Boy Ma Ayra Ma LUK Ɓiirimma 7 - Boy Lonana

Yesu garaɗ gogoo ma vi mul asgaa ma Romma kiyo

¹ Yesu daɓ njaɗta maŋ suu egemma daɓmi, hin jak Kapernaum.

² Mul asgaana, gogoo mamma nam minimma, tam tamu, hin tok a miɗna.

³ Nam hum dla Yesu na ni, nam cuk suu mam suu Juifna a joɓ Yesu a nam mbay garaɗam gogoo mamma kiyo.

⁴ Suu ŋgolo asina mbay eg Yesu dam ana, «Sa namma ndaki a aŋ mbuɗum gogoo mamma ki jiviya.

⁵ Nam min suu mamisina ɦay, minimi Zira Tokka ni nam lay.»

⁶ Yesu tuɗ u asiya, zina hin ay fokomma tokŋi, mul asgaana sun banayamma ay ana dam ana, «Bu Suuna loɓ taŋgi. An ndak ka a aŋ kal vo varanɗi.

⁷ An tuɗ ha ka egeŋ u tandaɗi ni kay an ka ndakiɗira. Aŋ ɓak ay u vunuŋ ɦawa lay ni, gogoo manna garaɗ ki layɗi su?

⁸ Anu, suu suunna ka may. Asgaa suu an suusina ka may. An di maa wa ana nam tuɗa ni, nam tuɗa. An di maa wa ana ma daŋ mbay olo ni, nam mbaya. An di sa ma sunda wa ana nam li na ni, nam liya.»

⁹ Yesu hum boy namma na ni, nam furi ɦay, pereɗ irim, di suu moli suu tuɗ umma ana, «An dagi ni gasagira, duk suu Israelna halaŋ an bay wi sa viimba ko sa namma na tuwa.»

¹⁰ Suu sunda hoŋ ay vo vi mul asgaana ni, fi gogoo namma ki garaɗi gaw.

Yesu dliɗ goŋ ca dor ma miɗina kiyo

¹¹ Fali ndaɗta Yesu tuɗ hu zina yam ana Nain. Suu haɗi mamsina u suu daŋŋa tuɗ um may.

¹² Asi tew ha del kaana may ni, suuna ŋgafasi ay u sa miɗina kasi a pamba. Goo namma ni goŋ ca donora, koɗ na dew daŋ. Suu ay hu zi nammana moli egeɗ cocoo.

¹³ Bu Suuna waɗ na ni, ndaɗ mbuɗ irim hahawi. Nam daɗ ana, «Tiiɗi.»

¹⁴ Yesu ɦuɗ tam ha egesiya, kaw kom eg dlaɗta, sa miɗina hura, suu nam kasina col gaw. Yesu di ana, «Go zoŋŋa, an daŋ ha ni, col koloo.»

¹⁵ Sa miɗina kak ki ha umu, gijaŋ ɓakŋa gaw. Yesu hinim ha maŋ sum gaw.

¹⁶ Suu halaŋŋa mbuɗ ki ndaana, gijaŋ geleɗ Lona ana, «Sa jok vun Lona ma ŋgolna kal ay ki dukuygi wa. Lona mbay wa a njun u suu mamsina.»

¹⁷ Suu hu mbassa Yudera halaŋ u suu keŋesina hum dla Yesu kay dlara nam laɗta ki halaŋ.

Jaŋ ma mbus batemma sun suuna ay eg Yesu

¹⁸ Suu haɗi suu vi Jaŋ ma mbus batemma njaɗam dla tlesuu Yesu lasina ki halaŋ. Jaŋ yi suu dukusi mba',

¹⁹ cukusi eg Yesu ana asi joɓom ana, «Aŋŋi sa ami juɓ ana nam hin mbana ɗowba ami juɓ mi sa daŋ su?»

²⁰ Asi tew eg Yesu tewni, dam ana, «Jaŋ ma mbus batemma sunumi ay egeŋ ana, ami joɓoŋ ana aŋŋi sa hin a mbayna ɗowba ami juɓ sa daŋ su?»

²¹ Hu li namma Yesu garaɗ suu tuguɗira ki cocoo, nam dikisi fulina ki kasi lay, mal ii suu dugina ki lay.

²² Yesu di suu Jaŋ cukusi ayna ana, «Tuɗ njaɗagi maŋ Jaŋ kay tlesuu agi humusina u suu agi wasi u irigina lay. Suu dugina mbuɗ wiya, suu dalira mbuɗ tuɗa, suu liɓina mbuɗ ki jiviya, suu ŋgelina mbuɗ huma, suu miɗina paɗ ki kolo iiriya, Boy ma Ayra jok ki maŋ suu hawra halaŋ.

²³ Furira ka kay sa an ka mbuɗ irim bisɗi na.»

²⁴ Suu vi Jaŋŋa cuk tasi ca ni, Yesu gijaŋ ɓak kay Jaŋ maŋ suuna ana, «Agi ay gologi ni me ŋgoo bagi ge? Usu ma viriw u semeɗna su? Ҥawaa.

²⁵ Na ɗaŋi agi ay gologi ni mege? Agi ay golni sa cuk baraw ma jivi ɦayna su? Suu cuk baraw ma jivi ɦayna lay, kaki u furira tew tew lay, ha ni hu zina vi mulina.

²⁶ Agi ay gologi ni me ɗow ge? Sa jok vun Lona su? An dagi wanni sa namma ŋgol su sa jok vun Lona.

²⁷ Jaŋŋi sa ɓiira di ki kam jew day ana, Gola, Lona di ana, An gi sa vun sunda ha fokoŋu a miniŋ voɗta ki fokoŋu.

²⁸ An dagi ni gasira, duk suu boyogina vuɗusina halaŋŋi sa ma su Jaŋ ma mbus batemma ay kaɗi. Doli ni ma goo hu Mul Lonara ni ma ŋgol suumma.»

²⁹ Suuna halaŋ u suu vi taara lay ni hum u boy namma. Asi wi ana Lona ka gasi, fi batemma u Jaŋ lay.

³⁰ Suu Farisenna u suu wi magaara gaɗta vi boy ma vi Lonna kaɗi. Asi min batemma vi Jaŋ kaɗi lay.

³¹ Yesu dasi olo ana, «Suu cukunina an ŋgaasi ni u mege?

³² Asi tli tasi ni ko kemba luu hu mbudufna, sawalla maŋ suu hiŋŋa ana, Ami ŋguruɗ diffa agi luu njoŋŋa kaɗi, ami tiira agi yooromi kaɗi lay.

³³ Jaŋ mba wanni, nam ka ti vaɗi, ka ci sumbi lay, agi ɓak kam ana nam ki ni guruɗiya.

³⁴ Goŋ Sanna mba wanni, ti funa may, ci summa lay, agi ɓak kam ana, Ni sa kurufukka. Ci summa coco lay. Banayamma ni suu vi taara u suu cona.

³⁵ Doli ɗini nera vi Lona, suu tin hurusi kaɗna, wi ana ndaɗ ɗegeera.»

Yesu kagi hu zina vi Simon ma Farisenna

³⁶ Sa Farisenna yi Yesu ha a ti funa varamu. Yesu kak a ti funa vi sa Farisenna wanni,

³⁷ hu zi namma cara gawlaŋga ka huwa hum ana Yesu ka ti funa vi sa Farisenna ni, ndaɗ tli mbul ma hisna hu koloɓona ay koɗu.

³⁸ Ndaɗ kak ay kaŋga ŋgoo Yesu u semu, gijaŋ tiina mbus sem Yesu ki u simina. Ndaɗ hin va simi ma kay sem Yesuna ki u tlimiɗ yaɗu. Ndaɗ furiyum furi ni, hin yamam mbul ma hisna kay semu.

³⁹ Sa Farisen ma yi Yesu ha varamma wi na ni, ɓak hurum kurufu ana, «Lini sa namma ni sa jok vun Lona gasi ni, nam hin wi ana cara gawlaŋga.»

⁴⁰ Yesu ɓak maŋ sa Farisenna ana, «Simon boyna ka an min a daŋŋa.» Simon hoŋ dam ana, «Mala Haɗta, ɓak aya.»

⁴¹ Yesu di ana, «San dew ɦal balna kay suuna mba' Ma dew nam ɦam gursu kis, ɦal hiŋŋa gursu doogo may.

⁴² Asi jakŋi sa fi va warakam kaɗi, nam hinisina ki ɦawa gaw. Suu mba' asina ca ni, sa nam lam jivi cocona ni manage?»

⁴³ Simon hoŋom dira ana, «Ni sa gursu mamma kisna.» Yesu dam ana, «Aŋ di ni u voɗoɗu.»

⁴⁴ Yesu pereɗ irim eg cara di Simon ana, «Cara wanni aŋ waɗ su? An mba ni varaŋu aŋ ɦan yo mbus sen kaɗi, ndaɗ hin mbusun sen ki u simiyiɗu, saɗan sen ki u tlimiɗ yaɗ lay.

⁴⁵ An mbay varaŋ aŋ mboɗon ka huruŋ u furiraɗi, ndaɗ ni tanda mbay kof dayra ni ndaɗ kay furiyun na gak gak.

⁴⁶ Aŋ yaman mbul ka kanɗi, ndaɗ hin yaman mbul ma hisna kay senu.

⁴⁷ Kay ndaɗta minda ndaɗ minin wanda ni tak ki ana cooɗta ki daɓiya. Sa coomba daɓ ka ki ŋgolɗina, min mamba ka ŋgolɗi may.»

⁴⁸ Yesu hin di cara ana, «Cookka daɓ ki wa.»

⁴⁹ Suu kaki ti u namma gurni kaŋga duk tasi ana, «Sa daɓ cora vi suuna kina ni gege?»

⁵⁰ Yesu di cara ana, «Huruk ma tini kana suɗuk ki wa, ndak tuɗ heɓe.»