Boy Ma Ayra Ma LUK Ɓiirimma 6 - Boy Lonana

Yesu u buu ma vi Lonna

¹ Fali taa dew Yesu jak tuɗta duk senena hu buu ma vi Lonna. Suu haɗi mamsina kus yam wana hosom u duk kosiya, muɗum ha kolo irisi voro.

² Suu Farisenna suu ɦiw dasi ana, «Agi li dlara gaɗ maygira doo ki kaɗ hu buu ma vi Lonna ni amege?»

³ Yesu dasi ana, «Dlara David laɗ u suu mamsina hu li ma mayra casina, agi bay waɗ hu magaara tu su?

⁴ Nam kal hu Ziŋ Lonara u suu mamsina ti fu ma li ɓivunna maŋ Lona u namma, ɦal maŋ suu umma may. Fu namma suu li ɓivunna tammi asi doy hol.»

⁵ Yesu dasi olo ana, «Goŋ Sanna ni malaŋ buu ma vi Lonna.»

Yesu garaɗ sa kom miɗina kiyo

⁶ Hu buu ma vi Lona ma daŋŋa olo Yesu kal hu Zira Tokka haɗ suuna. Nam fi sa ma kom ma njufna ki miɗina huwa.

⁷ Suu wi magaara gaɗta u suu Farisenna juɓ u Yesu ana lini nam hin mbuɗ san ki jivi hu faɗta buu ma vi Lonna kalage. Asi ɦal a tinim dlara kam a vam u ndaɗta.

⁸ Yesu wasi saa masira na ni, di sa ma kom ki miɗina ana, «Col kolo fok suuna halaŋ.» Sana coli kolo fok suuna gaw.

⁹ Yesu hin dasi ana, «An joɓogiya, gaɗ maygira di ana san li jivira hu buu ma vi Lonna ɗowba li cora su? Suɗ iirira vi san ki ɗowba baaɗ ki su?»

¹⁰ Nam golosi halaŋ hin di sana ana, «Maɗ koŋ ha kiyo.» Sana maɗ kom ki na ni, nam mbuɗ ki jivi gaw.

¹¹ Suu ɦiw wi na ni hurusi mbuɗ yara eg Yesu. Asi gijaŋ ɓak duk tasi a hal mbeleŋ ma vi Yesuna.

Yesu man suu mam suu doogo yam mbana

¹² Fali ndaɗta Yesu ɗuŋ kolo kay ɦinira a cen Lona. Nam fo lina ay kay ɦinira a cenda.

¹³ Maɗiira fo foni, nam yi suu haɗi mamsina egemu, man suu doogo yam mba', yasi ana suu vovoɗta.

¹⁴ Simon (nam tinim sem ana Piyer) u wayamma Andre, Jak, Jaŋ, Filip u Bartelemy,

¹⁵ Matiye u Tomas, Jak ma goŋ Alfena, u Simon ma (min buɗ suu mamma kina),

¹⁶ Yudas, ma goŋ Jakŋa, u Yudas Iskariyot, ma di ŋgeŋŋa kay Yesuna.

Yesu haɗ suuna garaɗ suu tuguɗira ki may

¹⁷ Yesu ɗuŋ ay ki kaŋga kay ɦinira ɗuŋŋi, tuɗ hu li suu haɗi mamsina moli huna. Suu ay hu mbassa Yudera mbay hu coco may, suu Yerusalemma u zi keŋ lumma, Tir u Sidon may.

¹⁸ Asi mbay a hum boyna, a garaɗ tasi ki ko tuguɗira lay. Suu fulina kasina mbuɗ ki jivi lay.

¹⁹ Suu halaŋŋa hal a ŋgen kosi egemu, kay saɓak mamma egemma ndak a garaɗasi kiyo.

Jivira u dla cora

²⁰ Yesu gol suu haɗi mamsina hin di ana, «Furira ka kagi agi suu wi hawra, Mul Lonara ni magira.

²¹ Furira ka kagi agi suu mayra cagi cecemma, agi hin fi ti ma ka daɓ kiɗina. Furira ka kagi agi suu tii cecemma, kayme agi hin mbuɗ sana.

²² «Furira ka kagiya, agi suu suuna noyogi kina, ŋgulugi lay, gologi ko suu puluɗina na kay sem Goŋ Sana.

²³ Lini dla ndaɗta laki na lay ni, furiyugiya, warak magira ha juɓugi kolo huulona. Somoyosi las suu jok vun Lona ay jew ni na daŋ may.

²⁴ Hahawra ka kagi agi suu begera kogina, kayme agi fi jivi magira ki kay ndaŋgara tani wa.

²⁵ Hahawra ka kagi agi suu ka u tlena kogi cecemina, mayra hin cagiya. Hahawra ka kagi agi suu san cecemina, hahawra hin mba kagiya, agi hin tii lay.

²⁶ «Hahawra ka kagi agi suu suuna dagi dlaagi jivina, somoyosi li ay jew u suu jok vun Lona ki cona ni na daŋ may.»

Minigi suu babali magisina

²⁷ «An dagi ha ni agi suu humun vununna, minigi suu babali magisina, li jivira maŋ suu noyogi kina.

²⁸ Suu yagi tlena kagina, agi yasi sesi jiviya. Cenegi Lon na ni hurugi jivi eg suu lasagina.

²⁹ Sa caŋ kiriŋiŋ ma njufna wani, aŋ pereɗem ma gulna may. Sa yowoŋ baraw maŋŋa wani, aŋ fokom ma hin egeŋŋa ha hu olo.

³⁰ Sa joɓoŋ va koŋ wani, aŋ ɦamu. Sa tlaŋ vaŋ wani, aŋ li ɓak u nambi.

³¹ Tlesuu agi min ana suuna lagisina, agi lasisina na may.

³² «Agi li minni suu minigina doy holni, agi hin di ana agi gi jivi zeɗ ni u mege? Suu cona minni suu minisina na layɗi su?

³³ Lini agi li jivira ni maŋ suu lagi jivira doy holni, agi hin di ana agi ki jivi zeɗ ni u mege? Suu cona li ni na layɗi su?

³⁴ Agi li ɦal tlena ni maŋ suu a hin hoŋogisina ay na doy holni, agi hin di ana agi ki jivi zeɗ ni u mege? Suu cona ɦal tlena maŋ tasi ni na layɗi su?

³⁵ Minigi suu babali magisina, lasi jiviya, ɦasi tlena, tin hurugi ana asi hin hoŋogisina ay ni saɓagera naɗi lay. Agi hin fi warakka ŋgolla, hin mbuɗugi ki goryoŋ Lo ma kolona. Nam li jivira maŋ suu hurusi cona u suu hurusi jivina lay.

³⁶ Laki hurugi jivira ko Bugi Lona hurum jivira na may.»

Kaɓakŋa kay ndarayaŋŋaɗi

³⁷ «Kaagi ɓakŋa kay ndarayaginaɗi. Sa hin ka kaagi ɓakŋa kaɗi may. Kaagi ɓak ma ba ndarayagina kinaɗi, Lona hin ka kaagi ɓak ma baagi kinaɗi may. Hinigi suu hiŋŋa, Lona hin hinigi may.

³⁸ Ҥagi tlena suuna, Lona hin ɦagi may, mbumbuugira hin oy ki u dlaagira jivira may. Lona warak sana ni u jivira nam laɗ maŋ ndarayammara may.»

³⁹ Yesu dasi u ndal boyna ana, «Sa dugina ka taɗ ndaram ma duginaɗi, naɗi su? Li ka naɗi ni, asi cuk hu zulla u dlaasira jakka.

⁴⁰ Sa haɗta ka ŋgol su sa haɗammaɗi. Sa haɗta hin mbuɗ ni ko sa haɗamma na may.

⁴¹ «Aŋ gol usu ma ii wayaŋŋana ɗow ni, ka gol gu ma iriŋŋa ki fok jewɗi amege?

⁴² Aŋ hin di wayaŋŋa ana, Hinin an tlaŋ usu ma iriŋŋa kiyo, ni gu ma iriŋ taŋgana aŋ ka wambi may ni amege? Aŋ sa ma giniŋŋa, tli gu ma iriŋŋa ki jewe, iriŋ mbuɗ wi ki jivi wani, aŋ hin tli usu ma ii wayaŋŋana ki tuwa.»

Guna u vuɗumu

⁴³ «Gu ma jivina ka vuɗ vuɗ gu ma conaɗi, gu ma cona ka vuɗ vuɗ gu ma jivinaɗi may.

⁴⁴ Gugunina ay wasi ni u vuɗusiya. Aŋ sana ndak ndoɗ vuɗ tulumma hum wayvirna su? Hin ndoɗ vuɗ gugutlura hum ndulna su?

⁴⁵ Sa hurum jivina fi tlesuu jivina ni kay hurum ma jivina may. Sa hurum cona fi tlesuu cona ni kay hurum ma cona may. Vun sana di ki ni va ma ay oy hurumma.»

Ndal boyna kay ziginina mba'

⁴⁶ «Agi yan u vunugi ana, Bu Suuna, Bu Suuna, ka li dlara an dagiraɗi may ni nanage?

⁴⁷ An min takagi ndal dla taari, sa mba egen hum boy manna li um mayna.

⁴⁸ Sa namma tli tammi ko sa a min zira, vek zulla, nja gogoyra kaŋga huwa, tin u zira kaɗta na. Babaana paɗa, mbona tli uɗ lay, ndaɗ ka bowɗi, kay ndaɗ mini jiviya.

⁴⁹ Sa hum boy manna ka li umbina, tli tammi ko sa min zira kay ŋgetlna bay vekeɗ uɗ kaŋgara na. Lona siya, yona tli wani, zi ndaɗta bow ki gaw, kayme ndaɗ mini kay ŋgetlna, ni ndaɗ bow ki kaŋga kirim.»