Boy Ma Ayra Ma LUK Ɓiirimma 4 - Boy Lonana

Satan hal a ndem Yesu

¹ Yesu, Musuk Lonara hoɓom hoɓmi, nam hin lum ma Yurdanna ha ki tani, Musuk Lonara tinim ŋgoo bagiya.

² Yesu li buuna dok fiɗi. Satan hal a ndememu, hu buu namma nam ka ti vaɗi, mayra mbuɗ camu.

³ Satan mba egem dam ana, «Aŋ lini Goŋ Lonna ni, ɦinira wanni, aŋ mbuɗuɗ ki funa.»

⁴ Yesu hoŋom dira ana, «Ki ɓiiri ana, Sana ka kak iiri kay funa sasakgi.»

⁵ Satan tlam koloo, takam mulla kay ndaŋgarara halaŋ,

⁶ dam ana, «Tlesuu kay ndaŋgarana u mul masira lay ni an ɦaŋsina ni maŋu, tle asina ni varan halaŋ, an li a ɦasi ni maŋ gegelay ni u hurun anu.

⁷ Aŋ goɓ kaŋga fokon wani, tle asina halaŋŋi maŋu.»

⁸ Yesu hoŋom dira ana, «Ki ɓiiri hu magaara ana aŋ goɓmi Lona dew, sunummi nam dew daŋ.»

⁹ Satan jokom um hu zi ma ŋgolna Yerusalem kakam kay Ziŋ Lonara koloo, dam ana, «Aŋ li ni Goŋ Lonna ni, gi taŋ ay kaŋgaa,

¹⁰ kayme ki ɓiiri ana Lona hin sun suu mam suu sunda huulona ay a goloŋu.

¹¹ Asi hin dlakaŋ ki kolo kosiya, ka hin a seŋ daɓ u ɦiniraɗi lay.»

¹² Yesu dam ana, «Ki ɓiiri ana aŋ tuk taŋ u Lona Bu Suunaɗi.»

¹³ Satan daɓ dlaamba daɓmi, hin yesu tani, gi tam gaw.

Yesu gijaŋ sun mamba hu mbassa Galilera

¹⁴ Yesu hoŋ hu mbassa Galilera u saɓakŋa vi Musuk Lonara hurum cocoo. Asi ɓakam dlam ki hu mbas ndaɗta halaŋ.

¹⁵ Nam haɗ hu Zira Tokka. Suuna halaŋ ŋgaam cocoo.

Suu Nazaretna noy Yesu kiyo

¹⁶ Fali ndaɗta wanni Yesu mbay Nazaret hu li ma nam wul ay huna. Hu buu ma vi Lonna nam kal hu Zira Tokka ko nam li fok jewra na. Nam col kolo a ndum boy ma ɓiiri hu magaarana.

¹⁷ Asi ɦam magaara vi sa jok vun Lona Ezayi. Nam buɗ magaara kiyo, fi li asi ɓii kam huna ana,

¹⁸ «Musuk Bu Suunara ka kanu, nam ŋgaɓan a di Boy ma Ayra maŋ suu hahawra. Nam sunun ay a di boyna, cuk suu daŋgayna kiyo, a suu dugina irisi mbuɗ wi lay. A suɗ suu asi lasasina ki lay.

¹⁹ Nam sunun ay a di ki kay basara Bu Suuna hin a tak jivi mamba ki ii suunara.»

²⁰ Yesu ɗuɗ magaara ɗuɗni, hoŋoɗ maŋ sa ma li sunda hu Zira Tokkana kak kaŋga gaw. Suuna halaŋ hu zira tok irisi ni kamma dew.

²¹ Nam gijaŋ ɓakasi ana, «Boy ma agi humum wanna li ni karam gaw.»

²² Boy ma nam ɓakamma suuna hurusi furi kam cocoo, asi lak na jim kay boy ma jivina ma nam ɓakamma. Asi joɓ ana, «Nammi ka goŋ Yosefnaɗi su?»

²³ Yesu dasi ana, «Agi hin tinin ndal boyna ana aŋ sa ma dokdorna garaɗ taŋga ki may ɗaŋgi su, agi hin dan ana, Dlara aŋ laɗ ay Kapernaumba laɗ hu zi ma aŋ vuɗ huna may.»

²⁴ Nam hin dasi olo ana, «Sa jok vun Lona ma gorsemma vam hu mbas mamba jivi na gaw kaɗi.

²⁵ An dagina, hu li ma Eli cen Lona ana nam siɗi, li basara hindi u til karkiyana ni, boyogi suu donona ka hu mbassa Israella cocoo, mayra ci suuna hu mbassa halaŋ.

²⁶ Na may ni Lona hin sun Eli ha ka vi taa dewɗi. Nam hin sunummi vi cara donora ha hu zina Sarepta hu mbassa Sidonda.

²⁷ Hu li ma Elise sa jok vun Lona kana, suu liɓina ka hu mbassa Israella cocoo, suu ndondo asina halaŋŋi sa fi jivi dukusi kaɗi. Naaman ma Sirina suɗ ki ni nam doy hol»

²⁸ Suu hu Zira Tokka hum boy namma na ni, hurusi ɓeŋ ki eg Yesu.

²⁹ Asi taɗam ha ki doŋ kaana kay ɦinira ziisina mini kaɗta, a zuɗum ha ki kaŋgaa.

³⁰ Nam jak dukusi, tuɗ ni na gaw.

Sa ful ma cona kamma

³¹ Yesu tuɗ Kapernaum hu mbassa Galilera. Nam haɗ suuna hu buu ma vi Lonna tew tew.

³² Suu mba haɗtana lak na jim, ko haɗ mamba, kaymege nam haɗasi wani ko sa um eŋŋa ne.

³³ Nam fi sa ma ful ma cona kamma hu Zira Tokka, sa namma gijaŋ sawalla kolo eŋe,

³⁴ «Aŋ a lami ni nanage? Yesu ma Nazaretna, aŋ mba a viɗimi ki su? An waŋ uŋ kiyo, aŋŋi sa teteɗ ma Lona sunum ayna.»

³⁵ Yesu bay ful ma cona ana, «Seŋ taŋu, kal ay kiyo, hin sana.» Fulna gi sana kaŋga duk suuna, hin kal ki gaw, lam va ma co ka egembi.

³⁶ Suu molina ŋgususi paɗ ki na fak, ɓak duk tasi ana, «Dla ndaɗta ni ana mege? Nam yal fuli suu cona u eŋga u saɓakŋa na ni, asi humum lay ni nanage?»

³⁷ Asi hum dlaamba njay ki hu mbas ndaɗta halaŋ.

Yesu garaɗ suu tuguɗira ki cocoo

³⁸ Fali ndaɗta wanni Yesu kal ay ki hu Zira Tokka, jak yam vi Simon. Kunuŋ Simonda taɗ taɗu. Taɗ egeɗ kura na keŋ keŋ. Asi joɓ Yesu ana nam garaɗaɗ kiyo.

³⁹ Nam goɓ kaŋga kaɗ na ni bay tuguɗira, tuguɗi ndaɗta hiniɗ ki gaw, ndaɗ col kolo col ni, gijaŋ lasi sunda gaw.

⁴⁰ Faɗta ndi ki kaŋga may ni, asi mbaaram suu tuguɗira ay egem na zeɗ zeɗ, nam tin kom kasi ta ta ni, asi garaɗ ki na gaw.

⁴¹ Fulina sel ay ki hurusi sawalla ana, «Aŋŋi Goŋ Lonna.» Yesu dasi u eŋga ana asi seŋ tasiya, kay asi wi ki fok jew ana nammi Sa Lona Fuurumma.

Yesu paɗ bolla hu mbassa Yudera

⁴² Lina fo ki fo ni, Yesu tuɗ ŋgay tam ha ki ŋgoo bagiya. Suu molina gijaŋ halamu. Asi fam fi ni dam ana nam tuɗ ki hu li ma daŋgi kakŋi u asiya.

⁴³ Yesu dasi ana, «An tuɗ di Boy ma Ayra vi Mul Lonara ha ki hu zi ma daŋŋa layɗi su? Lona sunun ay ni kay sun ndaɗta.»

⁴⁴ Nam di bolla hu zigini suu tokka hu mbassa Yudera.