Boy Ma Ayra Ma LUK Ɓiirimma 3 - Boy Lonana

Bolla vi Jaŋ ma mbus batemma maŋ suuna

¹ Hu basara doogo yam vadlla Tiber Sesar hu mulla, Pilat ay a mul ma goona hu mbassa Yudera wanni, Herod kak a mul ma Galilena may, wayamma Filip mi mul ma Iturena u suu Trakonitna. Lisaniyas kak mulla kay suu Abilenna may.

² Aan u Kaif ni muli ŋgol suu li ɓivunna. Lona ɓak boy mamma maŋ Jaŋ goŋ Zakarina ki ŋgoo bagiya.

³ Nam poy ki kay mbassa fun lumma Yurdanna halaŋ. Nam di suuna ana jokogi hurugi ki zeɗ, mbusugi batemma, Lona hin daɓagi coogira kiyo.

⁴ Lini dlara Ezayi sa ma jok vun Lona ɓiiri ay jew hu magaa mamba ana, «Del sana sawalla ki ŋgoo bagiya, ɗoɓogi voɗta vi Bu Suunara kiyo, mbuɗuɗ huruɗ kiyo.

⁵ Li ɦuɗugumba halaŋ hin tos kiyo, ɦinira u li mbuyna hin kaasi ki kaŋgaa. Ta huruɗ bay horokŋa, horokoɗ kiyo.

⁶ Ni suuna halaŋ hin wi suɗta vi Lonara ni na tuwa.»

⁷ Suuna moli eg Jaŋ coco ana nam mbususi batemma. Jaŋ dasi ana, «Agi njaf guy magira, sa haɗagi a agi puruɗ tagi ki ko yara vi Lonara ni gege?

⁸ Lagi dlara jivira a tak ana hurugi ki joki zeɗ. Dagi ana Abrahammi bumiya naɗi. An dagiya, Lona ndak a mbuɗ ɦinira ki a goryoŋ Abrahamma layɗi su?

⁹ Njetna ka gira a ka sari gugunina kiyo, gu ma vuɗum ka jiviɗi na, kaam kiyo, gam ki duk kura.»

¹⁰ Asi suuna joɓom ana, «Ami hin li nanage?»

¹¹ Nam hoŋosi dira ana, «Sa baraw mamma kom mbana ɦal ki maŋ sa ka kombina dew. Sa va tira kom ŋgolna ɦal maŋ sa ka kombina may.»

¹² Suu vi taara mbay eg Jaŋ a nam mbususi batemma, asi joɓom ana, «Ami hin li ni nana may ge?»

¹³ Nam dasi ana, «Lagi sunda ɗegee ko gaɗta dira na. Kul suunaɗi.»

¹⁴ Suu asgaana joɓom olo ana, «Ami hin li ni nana may ge?» Jaŋ dasi ana, «Tli va ko sa u eŋgaɗi. Juɓugi ni warak magira doy hol.»

¹⁵ Suuna saa hurusi ana, Jaŋ li ka ni Sa Lona Fuurumma kalage?

¹⁶ Jaŋ dasi ana, «An mbusugi batemma ni u yona, sa ma mbay ŋgoron daganna ki suy kanu, an ka ndaki a buɗum zew ma fun tuɓuru mamma kiɗi. Nam hin mbusugi u Musuk Lonara u kura may.

¹⁷ Kaalam mamba feɗ wa blena ka komu, vaa ma neena cukum hu veena, barra nam hin ŋgalaɗ ki duk kura ka miɗɗira.»

¹⁸ Jaŋ njaɗasi na ni, dasi Boy ma Ayra ha duk cocoo.

¹⁹ Jaŋ di Herod ana, «Aŋ ndak a tli Herodiad, caŋ wayaŋŋara ki uŋ bay nam miɗɗi.» Jaŋ dam na ni kay nam li dlara ndaŋga coco olo.

²⁰ Herod li cora ndaŋga olo, vi Jaŋ, gam daŋgayna.

Batem ma vi Yesuna

²¹ Suuna halaŋ fi batemma eg Jaŋ ma mbus batemma wanni, Yesu fi batemma may, hu li ma nam cen Lona na ni, huulona mal kiyo.

²² Musuk Lonara sii ay kam ko gugukka na, della ɓak ay kolo huulona ana, «Aŋŋi goron ma an minim ɦayna. Aŋ irin jivi ɦay.»

Ni sem somoyoŋ Yesuna

²³ Yesu li basa va ma dok hindi ni, gijaŋ sun mamba. Asi saa kam ana nammi goŋ Yosefna, goŋ Helina.

²⁴ Goŋ Mattatna, goŋ Levina, goŋ Melsina, goŋ Janayna, goŋ Yosefna,

²⁵ goŋ Mattatiyasna, goŋ Amosna, goŋ Nahumma, goŋ Eslina, goŋ Nagayna,

²⁶ goŋ Maatna, goŋ Mattatiyasna, goŋ Semeyna, goŋ Josekŋa, goŋ Jodana.

²⁷ Goŋ Joananna, goŋ Resana, goŋ Zorobabelna, goŋ Salatiyelna, goŋ Nerina.

²⁸ Goŋ Melsina, goŋ Addina, goŋ Kosamma, goŋ Elmadamma, goŋ Erna,

²⁹ goŋ Yosuwena, goŋ Eliezerna, goŋ Jorimma, goŋ Mattatna, goŋ Levina.

³⁰ Goŋ Simeonna, goŋ Yudana, goŋ Yosefna, goŋ Jonamma, goŋ Eliakimma,

³¹ goŋ Meleana, goŋ Mennana, goŋ Mattatana, goŋ Natanna, goŋ Davidna,

³² goŋ Jesena, goŋ Jobedna, goŋ Boozna, goŋ Salana, goŋ Naassonna.

³³ Goŋ Aminadabma, goŋ Adminna, goŋ Arnina, goŋ Esromma, goŋ Faresna, goŋ Yudana,

³⁴ goŋ Yakobma, goŋ Isaakŋa, goŋ Abrahamma, goŋ Tarana, goŋ Nakorna,

³⁵ goŋ Serukŋa, goŋ Ragauna, goŋ Falekŋa, goŋ Eberna, goŋ Salana,

³⁶ goŋ Kainamma, goŋ Arfaksadna, goŋ Semma, goŋ Nowana, goŋ Lamekŋa,

³⁷ goŋ Matusalana, goŋ Henokŋa, goŋ Jaredna, goŋ Maleleelna, goŋ Kainanna,

³⁸ goŋ Enosna, goŋ Setna, goŋ Adamma, goŋ Lonna.