Boy Ma Ayra Ma LUK Ɓiirimma 24 - Boy Lonana

Yesu paɗ ki kolo iiriya

¹ Faɗta damassa maɗii feɗet ni, boyogina tuɗ a gol ussa. Asi tli mbul ma hisna ma asi halam ay kosina.

² Asi fi ɦinira lagaɗ ki fun zulla day.

³ Asi sel ha hu zulla ni fi maɗ Yesu ka huɗi.

⁴ Saara ana va tlamma ni megera ka kasiɗi. Suuna mba' cuk ki irisiya, baraw ma tasina weleɗ ko me kalara na.

⁵ Boyogina mbuɗ ndaana kuluɓ irisi kaŋgaa. Suu asina dasi ana, «Agi halagi sa iirina duk suu miɗina ni nanage?

⁶ Nam ka tanɗi, nam paɗ ki kolo iiriya. Gagi humugi kay boy ma nam dagina ay Galilena.

⁷ Goŋ Sanna asi hin ɦam ki maŋ suu cona, asi hin ɓalam ki kolo hu gu garakŋa, hu buu ma hindina nam hin paɗ ki kolo iiriya.»

⁸ Boyogina humusi gasi kay boy ma vi Yesuna.

⁹ Asi hin ussa ha ki tani tuɗ njaɗ boy namma maŋ suu haɗi suu doogo yam dewna maŋ suu halaŋŋa lay.

¹⁰ Boyogi suu asina ni Mari ta Magdalara may, Jan u Mari su Jak may. Boyogi suu ay asina njaɗ dla ndaɗta maŋ suu vovoɗta ni na lay.

¹¹ Suu Vovoɗta saa kasi ana ni boy ma vi boyogina ni ɦawaa. Asi ka tin yasi kambi.

¹² Hu li namma Piyer ndi liŋŋa tuɗ gol ussa, nam goɓ ha ga ni wi baktana cukiya. Nam hoŋ ay vo ni, dlara nam waɗ ayra su ki kam ɦay.

Suuna mba' tuɗ hu voɗta Emmaussa

¹³ Hu buu namma suuna dukusi mba' tuɗ hu zina yam ana Emmaus. Zi namma ka eg Yerusalem dayɗi.

¹⁴ Asi ɓak dlara lira ha irisi voɗo.

¹⁵ Asi ciwayra duk tasi na ni, Yesu gi tam usi hu voɗta.

¹⁶ Asi wam tuɗa, ka wi ki ana ni namura naɗi.

¹⁷ Yesu joɓosi ana, «Agi cagi wayra ni kay mege?» Asi col col ni ɗus irisiya.

¹⁸ Maa dew sem ana Kleopas dam ana, «Aŋŋi sa Yerusalem ma hum dlara li cecem wanda kaɗi ni aŋ dew su?»

¹⁹ Nam joɓosi ana, «Ni dla mege?» Asi dam ana, «Dlara li eg Yesu ma Nazaretna, nammi sa ŋgol ma jok vun Lona fok suuna halaŋ lay.

²⁰ Muli suu li ɓivunna u suu ŋgolo masisina ɦam ki ana suuna cam kiyo. Asi ɓalam ki kolo hu gu garakŋa.

²¹ Ami tin hurumi ana nammi sa hin buɗ suu Israelna kina. Dla ndaɗta li na ni buuna ki hindi.

²² Boyogi suu dukumi ɦiw ni dami dlara suy kamira, dla ndaɗta ni u voɗoɗu. Asi tuɗ maɗii feɗet del ussa.

²³ Asi fam maɗam kaɗi. Asi hoŋ ay dami ana suu sunda huulona cuk ki irisiya dasi ana nam ka iiriya.

²⁴ Suu dukumi ɦiw ni yow tuɗ gol ay kay ussa tuɗ fi ko boyogina dira na may. Asi wam ay ka u irisiɗi ɗaŋa.»

²⁵ Yesu dasi ɗaŋ ana, «Suu laɓa agina tagi nekka a tin hurugi kay dlara suu jok vun Lona dagira.

²⁶ Agi ka wi ana Sa Lona Fuurumma wi hawra wi, hin kal hu bibiŋil mamba tuwa naɗi su?»

²⁷ Ŋgoo daganda nam hin gasi u dlara ay ɓiiri kamba ki halaŋ, gijaŋŋa ay kay boy ma vi Moizna, hin jak ha kay dlara vi suu jok vun Lona halaŋ.

²⁸ Asi tew ha u sii kaana hu zi ma asi a tuɗ huna Yesu li gin ko nam a jak day na,

²⁹ Asi hin ɗelem ana nam kak u asiya, «Fatɗa ɗikŋi ɗiki may nige.» Nam hin kak may.

³⁰ Asi a ti funa wanni nam tli funa kom tani, gi deɓ Lona kamu mbulukum irim ki mbulukŋi, ɦasina. Asi tam ti ni,

³¹ irisi gijaŋ wammi na gaw. Nam viɗ irisi ni na gaw may.

³² Asi gijaŋ njaɗasi ana, «Mayra nam li ɓakay ay hu voɗta gaygi u boy ma ɓiirina kira ni, huruy ka ŋgalay ko kura naɗi su?»

³³ Asi yow kolo hoŋ Yerusalemmi na gaw, tuɗ fi suu haɗi suu doogo yam dewna toki u ndarayasina.

³⁴ Njaɗ ana, «Bu Suuna paɗ ki kolo gasi. Gasi Simon wam lay.»

³⁵ Asi u tasira njaɗasi dlara li ay egesi hu voɗtara lay ta asi gijaŋ wamu hu li ma nam ɓorowosi funara lay.

Yesu tak tam ki ii suu haɗi mamsina

³⁶ Suu haɗina ɓak duk tasi wanni Yesu u tamba mba col dukusiya. Nam dasi ana, «Heɓpa vi Lona kak u agiya.»

³⁷ Asi mbuɗ ki ndaana kay asi tin hurusi ana va ndi ki irisi ni ndiya.

³⁸ Yesu hin dasi ana, «Agi dlak ŋgusugi ki ni kay mege? Agi cagi wayra hurugi kurufu ni nanage?

³⁹ Agi golon duk kon u sen gige. Ni an daŋ may. Laman ki tan gige. Agi wi ni musukka tliwiɗ u sokoɗ ka su? Agi wi ana mansina ka egen halaŋ.»

⁴⁰ Nam di na di ni hin takasi duk kom may ŋgoo sem may.

⁴¹ Asi tin hurusi ka kam gasi tuɗi, hurusi furi vasiya, kay dla ndaɗta su ki kasiya. Nam hin joɓosi ana, «Va ma ti ka kogi tanɗi su?»

⁴² Asi ɦam kuluf ma cufina dew.

⁴³ Nam vam vi ni komom fokosi halaŋ.

⁴⁴ Nam hin dasi ɗaŋ, «Agi gola ni dla mayra an dagira ay ki fok jew an ay u agi tura, boy ma ɓiiri kan hu magaara gaɗta vi Moizza, u ma vi suu jok vun Lona u ma hu magaara Soolla, dla ndaɗta a li ki ni halaŋ.»

⁴⁵ Nam malasi yasi ki ni ana asi wi boy ma ɓiirina kiyo.

⁴⁶ Nam hin dasiya, «Ki ɓiiri ana, Sa Lona Fuurumma hin wi hawra, nam hin paɗ ki kolo iiri hu bu ma hindina.

⁴⁷ Suuna hin njaɗam sem ha ki hu mbassa halaŋ gijaŋŋa ha Yerusalem kay a di suuna asi jok hurusi ki zeɗ, daɓ coosira kiyo.

⁴⁸ Agi ni suu vovoɗta kay boy namma.

⁴⁹ An hin sunugi va Bun a ɦaginana ay u tanda, agi kakagi hu zin tani gak gak juɓugi saɓak ma kolo huulona mbay kagi tuwa.»

Yesu tuɗ kolo huulona

⁵⁰ Ŋgoo daganda Yesu yowosi ha ki um doŋ kaana hu voɗta Betanira. Hu li namma nam yow kom kolo paɗ vunum kasiya.

⁵¹ Nam paɗ vunum kasi na ni dukum ɓorow u asi gaw gaw tuɗ kolo huulona.

⁵² Asi may ni goɓom may, hoŋ vo Yerusalem wanni, hurusi furi ɦay.

⁵³ Asi lak hu Ziŋ Lonara Yerusalemba a geleɗ Lona.