Boy Ma Ayra Ma LUK Ɓiirimma 23 - Boy Lonana

Yesu fok Pilat

¹ Suu moli halaŋŋa yow koloo, tuɗ Yesu fok Pilat.

² Hu li namma asi gijaŋ kaam boyna kam ana, «Sana wanni ami fam aya, nammi sa ɓeŋ suuna kina, nam doo suuna ki ana asi ɦal taara maŋ Sesarɗi. Nam di olo ana nammi Sa Lona Fuurumma, Mul Ŋgolna.»

³ Pilat joɓom ana, «Aŋŋi mulna vi suu Juifna su?» Yesu hoŋom dira ana, «Aŋ di ni aŋŋa diɗi.»

⁴ Pilat di muli suu li ɓivunna u suu halaŋŋa ana, «An ka fi cora vi sa namma a kaam ɓak mammaɗi.»

⁵ Asi gijaŋ sawalla ha kolo ni saay na ɗow ɗow ana, «Nam cuk suuna kay tasi u boy mamma, nam gijaŋŋa ay hu mbassa Galilera u mbassa Yudera gak gak tew ki karam tani u boy mamma.»

Yesu fok Herod

⁶ Pilat hum boy namma na ni, nam joɓ suuna ana, «Sa namma ni sa Galilena su?»

⁷ Pilat hum ana Yesu ni sa ma ay kay mbassa vi Herod ni, nam hoŋ sunumma ha egem Yerusalem.

⁸ Herod wi Yesu na ni, hurum furi ɦay. Ay jew day ni Herod hal a wi Yesu kayme nam humum dlamu. Nam min ana Yesu lam dlara mbuɗta dew.

⁹ Herod joɓ Yesu cocoo. Nam hoŋom va ka diɗi.

¹⁰ Muli suu li ɓivunna u suu wi magaara gaɗta taɓ vunusi ka dlara kay Yesu.

¹¹ Herod u asgaa mamsina pan Yesu cocoo, waɗam lay, cukum baraw ma jivina tamu, hoŋom maŋ Pilat.

¹² Jew ni Pilat u Herod duk ɦoŋosi ka taɓbi. Hu buu namma asi vi banara ki hu gaw.

Asi kaɓakŋa kay Yesu ana cam kiyo

¹³ Pilat tok muli suu li ɓivunna u suu ŋgolona egemu.

¹⁴ Nam dasi ana, «Agi mbaaran sana ay ana nam cuk suuna kay tasiya. Agi gola an joɓommi, fi va ma co ka funumbi.

¹⁵ Herod lay ni fam coomba ay kaɗi. Nam sunuygina ay tani. Sa namma li va co ma aygi cam ki kamma kaɗi.

¹⁶ An cam poŋga ci ci ni, hinimu.» [

¹⁷ Hu buu ma Pakŋa tew tew ni, Pilat gasi sa ma daŋgayna dew.]

¹⁸ Asi hum na ni, tum soora ha tumi na ɗow ɗow ana, «Ci sa namma ki ciya, gi Barabbas kiyo.»

¹⁹ (Barabbas asi vam ay daŋgayna ni duk suu mbuɗ vunna u mul masinana, asi ci sa ki dew, nam ay duk may.)

²⁰ Pilat saa ana nam a gi Yesu kiyo, nam joɓ suu molina olo.

²¹ Asi suuna tum soora ana, «Ɓalam ki hu gu garakŋa.»

²² Pilat dasi a yamba hindira ana, «Nam li ni co mege? An fam co mayra cam ki kaɗi, hin hinimu.»

²³ Suu molina vunusi ka a seŋgi, sawalla kolo gak gak ana, «Ɓalam ki hu gu garakŋa.» Wal masi ndaɗta su kam wa.

²⁴ Pilat kaɓakŋa ana nam hinisina ko va asi joɓomma na.

²⁵ Nam gasi sa ma asi vam ay duk suu mbuɗ vunna u mul masina, ci maɗna layna kiyo. Nam ɦasi Yesu ki ana asi li dlara egem u min masira.

Yesu ɓali kolo hu gu garakŋa

²⁶ Asi tuɗ a ɓal Yesu kira wanni, ŋgaf sa ma Sirenna voɗo, yam ana Simon. Nam ay hu sene mamma. Asi ɦeɓem ana nam zii gu garakŋa ha kay ce Yesu.

²⁷ Suu moli bolowna tuɗ ha kay ceremu. Boyogina tii ha irisiya, yoo tasi kam may.

²⁸ Yesu pereɗ irim egesiya dasi ana, «Boyogi suu Yerusalemma tiirigi kanɗi. Tii kay tagi ɗow. Tii kay goryogi may.

²⁹ Buu ma hin mba ni, asi hin ana furira kay cara vuɗ goo kaɗira, ta goo caɗ pooɗ kaɗira lay.

³⁰ Fat ndaɗta suuna hin di ana ɦinira bow ay kamiya, mbura kolo ŋgolla bow ay kamiya.

³¹ Lini asi ka gu ma ŋgolomma kiyo ni, ma sooyna hin lini nanage?»

³² Asi yow suu li dla cora ay mba' a casi ki u Yesu.

³³ Asi mba hu li ma ŋgot yamba wani, asi ɓal Yesu ki hu gu garakŋa, ɓal suu li dla cora ki egem mba' may, ma dew kay bikim ma njufna may, ma hiŋŋa kay ma gulna may.

³⁴ Yesu di ana, «Bunu, vaɗasi coosira kiyo. Dlara asi laɗta asi ka waɗɗi.» Asi ɓorowom baraw mamma ki kosi a ci ɓelera.

³⁵ Suuna moli a golla. Muli suu Juifna panamu di ana, «Nam suɗ suu daŋŋa kiyo, lini nammi Sa Lona Fuurumma, ma Lona ŋgaɓam ayna ni, suɗ tamba ki may.»

³⁶ Suu asgaana panam lay. Asi ɦuɗ tasi egem ɦuɗni, ɦam sum ma dlayna,

³⁷ di ana, «Lini aŋŋi mul ma vi suu Juifna ni, suɗ taŋ ki may.»

³⁸ Ki ɓiiri kam kolo ana, «Sa namma ni mulna vi suu Juifna.»

³⁹ Suu ɓali kolo egemma maa dew panam ana, «Aŋŋi ka Sa Lona Fuurummaɗi su? Suɗ taŋga ki may suɗumi ki may.»

⁴⁰ Ma hiŋŋa hoŋom dira ɗaŋi ana, «Aŋ ka li ndaana ko Lonaɗi su? Aŋ ma wi hawra u nam dewna

⁴¹ ay wanni wi haw mayra ni u voɗoɗu kay dlara ay laɗ u bik koyra. Nam wanni li va co kaɗi.»

⁴² Nam hin di Yesu ana, «Falira aŋ hin hoŋ ay a mulnara wanni, gi humuŋ kan may.»

⁴³ Yesu hoŋom dira ana, «An daŋ ha ni gasira, hu faɗta karamba an hin tuɗ Paradis u taya.»

Miɗ ma Yesu miɗna

^44-45 Faali faɗta col duk wanni, lina mbuɗ ndufunda ha ki kay yam mbassa na halaŋ, gak gak faɗta leŋ ki a boyogina du barra u ndaɗta. Baraw ma ŋgolna caki hu Ziŋ Lonara haa ki duk gayra.

⁴⁶ Yesu bay eŋga na haŋgak ana, «Bunu, an cuk ŋgusun hu duk koŋu.» Nam di na di ni, seeɗ gaw.

⁴⁷ Mul asgaa ma Romma wi dla ndaɗta na ni, geleɗ Lona ana, «Gasi sa namma ay ni sa jivina.»

⁴⁸ Suu may suu mbay moli hu li namma wi dla ndaɗta na ni, hoŋ voo, ci kosi ɦayasiya.

⁴⁹ Banayaŋ Yesuna u boyogi suu tuɗ u nam Galilena col ha ki na day a gol dlara li ndaɗta may.

Asi gi Yesu hu zulla

^50-51 Sa maa dew yam ana Yosef hu zi ma Juif ma Arimatena, nammi sa ma jivina, ni sa ma ɗegeena lay. Nam tin hurum kay Mul Lonara ta mbayra. Nammi duk suu ŋgolo suu gi ii dlara. Nam kal vunum ka duk boy ma ndarayam suu gi ii dlara lammaɗi.

⁵² Nam tuɗ joɓ Pilat kay ta Yesu.

⁵³ Nam tlam maɗam ay ki kaŋga tani, ganam u baraw ma haɓma, gam hu zulla nam vekeɗ duk ɦinira wilira, bay gi sa huruɗ tuwa.

⁵⁴ Ni buu ma asi min tasi a vinda ni buu ma vi Lonna.

⁵⁵ Boyogi suu tuɗ ay u Yesu Galilena mbay u Yosef. Asi gol hu zulla Yesu gi hura ana nam gammi ana mege?

⁵⁶ Ŋgoo daganda asi hoŋ vo a hal mbul ma hisna a lam ta Yesu. Buu ma vi Lonna asi koɗ tasi huwa ko gaɗta dira na.