Boy Ma Ayra Ma LUK Ɓiirimma 2 - Boy Lonana

Vuɗta vi Yesu

¹ Hu coki ndaɗta Sesar Auguste ɦal gaɗta kay ndum suuna hu mbassa Romba halaŋ.

² Ndum ndaɗta li ay jew ni hu li ma Kirinus a mulna hu mbassa Sirira.

³ Gegelay ni tuɗ ndumba hu li ma nam vuɗ ay huna.

⁴ Yosef col ay Nazaret hu mbassa Galilera, a tuɗ hu mbassa Yudera, hu zi ma David vuɗ huna yam ana Betlehem, kay nam vuɗ ni hu njafna vi David may.

⁵ Nam tuɗ ndumba u caamba Mari ni ndaɗ u wiina.

⁶ Asi tew Betlehem may ni, tiliɗ ma vuɗta ndak may.

⁷ Ndaɗ vuɗ goroɗ ma jewna, boɗom barawna kamu, ndaɗ gam hu bulla, kayme asi fi li ay ka hu zira buu koyoginaraɗi.

Sa sunda huulona tak tam ii suu taa yoona

⁸ Ki ŋgoo bagi hu li namma wanni, suu taa yoona buu ni huwa. Asi buu njeŋge ni ka buu senɗi a gol yoori masisina.

⁹ Sa sunda vi Bu Suuna tak tam irisi u bibiŋil mamba weleɗ kasiya. Asi mbuɗ ndaana.

¹⁰ Sa sunda huulona dasi ana, «Lagi ndaaɗi. An mba dagi ni Boy ma Ayra ma suuna hin furi um halaŋŋa.

¹¹ Sa Suɗta vuɗ ha karam njeŋge ni hu zina fi David. Ni sa Lona Fuurumma, Bu Suuna.

¹² An takagina ha ni agi hin tuɗ fi gogoo ma vuɗ wilina gi hu bulla u barawna boɗi kamu.»

¹³ Vunum bay ndi kaŋga tu may ni suu sunda huulona bolowo gijaŋ geleɗ Lona ha kolo huulona gaw, di ana,

¹⁴ «Geleɗey Lo ma kolona. Nam ɦal heɓ mamba ay kay ndaŋgara maŋ suu nam minisina.»

Suu taa yoona tuɗ Betlehem

¹⁵ Suu sunda huulona hoŋ kolo hoŋŋi, suu taa yoorina ɓak duk tasi ana, «Mbaygi Betlehem gol va Lona day ki kamma u va ma Bu Suuna takaygina.»

¹⁶ Asi cuk tasi tuɗta zak zak. Asi i fi Mari u Yosef u gogoo ma vuɗ wilina gi hu bulla.

¹⁷ Hu li ma asi wam na ni, cuɗ boy ma sa sunda dasina kay gogoo ma vuɗ wilina ki maŋ suuna.

¹⁸ Suuna mbuɗ lakir na jim kay boy ma suu taa yoorina cuɗusinna.

¹⁹ Mari humuɗ ka maa kay boy nammaɗi. Ndaɗ saa kam tew tew.

²⁰ Suu taa yoorina hoŋ ay voo wanni, asi gi deɓ maŋ Lona u furira kay dlara asi waɗ ay jivira. Dla ndaɗta li ni ko sa sunda dasira jewra na may.

Suuna mba tin sem goona

²¹ Hu buu ma kalavandina asi mba tin sem goona ana Yesu, ko sa sunda huulona di ki fok jew sum bay vi wiina tura na.

Asi tuɗ a tak Yesu hu Ziŋ Lonara

²² Buu namma ndak ndakŋi, Yosef u Mari tli goona tuɗum Yerusalem hu Ziŋ Lonara ko gaɗta vi Moiz dira na, a takam fok Bu Suunara.

²³ Hu gaɗta vi Bu Suunara ɓiiri ana, «Gor suu vuɗ fok jewna halaŋŋi maŋ Lona.»

²⁴ Asi li ɓivunna fok Lona u gugukka mba' ko gaɗta dira na.

²⁵ Sa Yerusalemma dew yam ana Simeon, nammi sa ɗegeena, hum u Lona ɦay, ka juɓ sa ma suɗ suu Israelna kina. Musuk Lonara ka u namu,

²⁶ dam ana, Nam ka hin miɗ bay wi Sa Lona Fuurumma u irimbi.

²⁷ Musuk Lonara gam irim ay hu Ziŋ Lonara. Somoyoŋ Yesuna tlam kosi tuɗ hu zira ko gaɗta vi Moiz dira na may.

²⁸ Simeon tli goona kom tani, gi deɓ Lona di ana,

²⁹ «Cecemi Bu Suuna dlara aŋ dandara li wa, hin saaŋŋa sunda miɗ u heɓpa.

³⁰ Sa ma aŋ a suɗ suuna u namma an wam u irin wa.

³¹ Ni sa aŋ tinim ki fok suuna halaŋŋa.

³² Nammi sa hin takaŋ seŋ ki fok suuna buruna. Sem suu maŋ suu Israelna hin tii ki um halaŋ.»

Simeon gi soolla geleɗta

³³ Su Yesu u bum lakŋa jim kay boy ma Simeon damma.

³⁴ Simeon paɗ vunum ki kasiya, di Mari su Yesu ana, «Ndak gola, gogoo namma wanni suu Israelna ɦiw hin suɗ ki umu, suu ɦiw hin ba ki may. Nammi sa ma suuna hin ɓeŋ dukusi ki u Lona kamma.

³⁵ Dlara ay huu suuna ŋgayra nam hin takaɗ ki buruwa. Ndak wanni huruk hin haɗ kay goo namma ko sa cokok u ŋgew coki na.»

Anne, cara jok vun Lona

³⁶ Cara jok vun Lona yaɗ ana Anne, goŋ Fanuella, u deera vi Asserra, ndaɗ mbuɗ ki maari. Ay u goo taɗ ni ndaɗ li basara u njufuɗ kiɗisiya.

³⁷ Njufuɗ miɗ ki miɗ ni, ndaɗ kak vaydegeɗ li basara na dok kalavandi yam fiɗi. Ndaɗ kak hu Ziŋ Lonara gak gak, ndaɗ cen Lona faali lay njeŋge lay, li laara lay.

³⁸ Ndaɗ mba egesi may ni, gijaŋ a gi deɓ Lona kay goona gaw. Ndaɗ ɓak kay goo namma ana, «Ni sa hin suɗ suu Yerusalemma kina.»

Somoyoŋ Yesuna hoŋ u nam hu Nazaret

³⁹ Somoyoŋ Yesuna daɓ dlara Lona joɓosi kaɗta daɓmi, asi hoŋ ay Galile, lak hu zina yam ana Nazaret.

⁴⁰ Goona wula, mbuɗ saɓaki, wi tlena cocoo, saɓakŋa vi Lona ka u namu.

Yesu tuɗ hu Ziŋ Lonara ni basaɗam doogo yam mba'

⁴¹ Hu basara tew tew ni somoyoŋ Yesuna tuɗ Yerusalem a li luu ma Pakŋa.

⁴² Yesu basaɗam tew doogo yam mba' ni, tuɗ Yerusalem ko somoyom tuɗ fok jew day a li luunara na.

⁴³ Luuna daɓ daɓmi, somoyoŋ Yesuna hoŋ voo. Yesu hin ha ki hu Ziŋ Lonara, ni asi wam kaɗi.

⁴⁴ Asi saa ni ana Yesu li ka duk ndarayasi suu asi mbay u asina kalage, asi ɗik faɗta a tuɗta, gijaŋ halam duk gorsesina u banayasina.

⁴⁵ Asi ka fambi ni, hoŋ Yerusalem a halamba.

⁴⁶ Hu buu ma hindina asi tuɗ fi Yesu hu Ziŋ Lonara, kagi duk suu Juifna suu wi magaara, nam humusi may, joɓosi may.

⁴⁷ Suu may suu laki humumma mbuɗ gol na tigiriw, kay nam wi tlena cocoo, hoŋosi dira kay tlesuu asi joɓom kasina may.

⁴⁸ Somoyom wam na ni, hurusi saa cocoo. Sum dam ana, «Aŋ a lami egemi na ni dla mege? Ami li buuna ki ca ni hindi u halla halaŋgaɗi su? Ami ha buŋ halaŋ ay ni hurumi haɗ cocoo.»

⁴⁹ Yesu hoŋosi dira ana, «Agi halanni kay mege? Agi ka wi ana an hin a kakŋi hu ziŋ Bunna naɗi su?»

⁵⁰ Somoyom ka wi u boy ma nam dasinaɗi.

⁵¹ Yesu hoŋ ay u asi Nazaret, vasi vunusiya. Sum saa boy namma huruɗ kurufu na tew tew.

⁵² Yesu wula, mbuɗ wi dlara, nam mbuɗ jivi fok Lona fok suuna lay.