Boy Ma Ayra Ma LUK Ɓiirimma 19 - Boy Lonana

Yesu u Zake

¹ Yesu kal Yeriko kalni, nam a jak ha ki ŋgoo zina wanni.

² San hu dew yam ana Zake. Nammi mulna vi suu vi taara. Nammi sa ɦizina.

³ Nam min a gol Yesu. Nam gedeŋe, ka wam ko suunaɗi.

⁴ Nam liŋ ha foko, tuɗ ɗuŋ hum ŋgusna a gol Yesu, nam hin jakŋi huwa.

⁵ Yesu tew u gu namma tew ni, tli irim kolo di Zake ana, «Ɗuŋ ay ki kaŋga zak, an tuɗ buu karammi varaŋu.»

⁶ Nam Zake ɗuŋ ay ki kaŋga zak gaw, vam varam u furira.

⁷ Suu wi dla ndaɗtana hosok tasi ana, «Sa namma tuɗ buu vi sa cona.»

⁸ Nam Zake col kolo di maŋ Yesu ana, «Aŋ hum haa, Mala Haɗta. An ɓorow tlegeyen ki duk gaya gaya, suu hiŋŋa an ɦasi ki maŋ suu hawra. Sa ma an lam irim u gursu mambana, an hoŋom na ga ga fiɗi.»

⁹ Yesu dam ana, «Suɗta kal karam hu taraŋ ndaɗta wa. Kay sa namma ni goŋ Abrahamma lay.

¹⁰ Goŋ Sanna mba ni a hal suu ki viɗina a suɗusi kiyo.»

Ndal boyna kay begera

¹¹ Yesu tin ndal boyna maŋ suu mba a humum boy mamma, kayme asi eg Yerusalem tok wanni, asi suu huna saa ana Mul Lonara mba ni mbay gaw.

¹² Nam dasi ana, «San dew hu deera ɦizira. Nam tuɗ hu mbassa dayra a hal mulla, hin a hoŋ ay a kak kay suu mamsina.

¹³ Nam a tuɗta wanni yi suu mam suu sunda doogo egem bel. Nam ɦasi gursura ka mbumbu dew dew, dasi ana, Agi mbuɗum irim kaa an hin hoŋ ay tuwa.

¹⁴ Suu hu mbas mambana ka minimbi. Asi sun suuna ha um ana, Ami ka min ana sa namma kak kami a mulnaɗi.

¹⁵ «Nam hin tuɗ fi mulla aya, hoŋ ay hu mbassamu. Nam yi suu mam suu nam ɓorowosi begera kana ay egem a wi va ma asi fam ka una.

¹⁶ Ma jewna mbaya nam di mulna ana, An fi mbumbu ka doogo u va ma aŋ ɦanna kana.

¹⁷ Mulna di ma namma ana, Ni jiviya, aŋŋi sa ma li sunda jivina. Aŋ li ɗegeera ka u tlesuu ewna, an kakaŋ a mulna kay zina doogo.

¹⁸ Ma mbana mba dam ana, Mulna, an fi mbumbu ka vadl u ma aŋ ɦanna kana.

¹⁹ Mulna dam ana, An kakaŋŋi kay zina vadl may.

²⁰ Ma daŋŋa mba di mulna ana, Viya, ni gursu maŋ ma an ŋgayam ka kolona,

²¹ kayme an li ndaana koŋ ɦay, kay aŋŋi sa dlaŋ cona. Vana li ka maŋŋaɗi lay ni, aŋ tlam ki lay. Aŋ feɗ wa ma aŋ zaaram kaɗina ki lay.

²² Mulna hin dam ana, Aŋ sa ma li sunda cona, an kaaŋ ɓakŋa kaŋŋi u boy maŋŋa aŋ damma. Aŋ wi kaŋ ana an ni sa irin eŋŋa, vana li ka mannaɗi lay ni, an tlam lay, an feɗ wa ma an zaaram kaɗina ki lay ni,

²³ aŋ ɦan gursu manna ka maŋ sa li sun u nambi amege? An hoŋ ay wanda fam gin u mboom um mayɗi su?

²⁴ Nam di maŋ suu egemma ana, Vam gursu mamma aya, ɦam ha maŋ ma mamma kom doogona. [

²⁵ Asi ana, Mamma komma doogo day ni ko.]

²⁶ Mulna ana, Sa mamma ŋgolna ɦam ha kayam hu olo. Sa ma va ka kombina, va li kom ew ni, tlam ma kiyo.

²⁷ Suu ka min ana an kak kasi a mulnaɗina, yowonsina aya, ŋgaɗasi ki kaŋga fokon tani.»

Yesu kal Yerusalem

²⁸ Yesu daɓ ɓakŋa ki daɓmi, nam tuɗ ha fokosi a tuɗ Yerusalemba.

²⁹ Nam ca duk ɦoŋzi ma Betfage u ma Betanina eg ɦinira Conora tokŋi, Yesu sun suu haɗi mam suu mba' ha foko,

³⁰ dasi ana, «Tuɗugi ha hu zi ma ha fokogi wanna. Agi tew hu zi namma wani, agi hin fi goo kor ma bay sa ful kam tuna njuniya, buɗugina aya mbaaram ay tani.

³¹ Lini sa joɓogi ana agi buɗum amege ni, agi dasi ana, Bu Suuna a minimu.»

³² Nam hinisi asi tuɗ ɗaŋ, i fasi halaŋ ko Yesu dasira na.

³³ Asi a buɗumba wanni, maliyamma ana, «Agi buɗugi goo korna amege?» Asi hoŋosi dira ana,

³⁴ «Bu Suuna a minimu.»

³⁵ Asi hinisi gaw. Asi tuɗum ha maŋ Yesu, boɗ baraw masina kamu, hin tli Yesu kolo kamu.

³⁶ Nam tuɗ ha na ni, suuna boɗ baraw masina ha kaŋga fokom hu voɗta.

³⁷ Nam mbay Yerusalem tok hu voɗta, tuɗ kay ɦinira Conora. Suu molina u suu haɗi mamsina hurusi furi wanni, asi gijaŋ sawalla, geleɗ Lona kay dlara mbuɗta asi waɗta.

³⁸ Asi di ana, «Lona paɗ vunuŋ ki kay mul ma mba u sem Bu Suuna. Heɓpa huulona, geleɗta maŋ Lo ma kolona.»

³⁹ Suu Farisenna suu ɦiw duk suu tokina di Yesu ana, «Mala Haɗta, di suu haɗi maŋsina ana asi seŋ tasiya.»

⁴⁰ Yesu hoŋosi dira ana, «An ka dagi haa, lini asi seŋ tasi lay ni, gogoyra hin sawalla ha lay.»

Yesu tii kay zi Yerusalemma

⁴¹ Yesu mba wi yam zi Yerusalemma may ni, tii kam gaw,

⁴² di ana, «Aŋ humbi su, ay fokka wanni heɓpa kaa. Cecemi heɓ ndaɗta ŋgay ki iriŋ wa. Aŋ ka waɗ oloɗi.

⁴³ Ha fokka wanni suu maŋ suu babalira hin ŋguyuŋ yaŋu, hin ɦeɓeŋ duku.

⁴⁴ Asi hin hawaɗaŋ ki kaŋgaa, caŋ suu maŋŋa ki halaŋ lay. Ҥini ta dew hin ka a li jaki kolo kay ndaraɗɗi. Asi hin tooɗ ki kaŋga halaŋ, kayme aŋ wi buu ma Lona mba a njun uŋ huna kaɗi.»

Yesu hu Ziŋ Lonara

⁴⁵ Yesu kal hu Ziŋ Lonara, gijaŋ dik suu gus tlegeyesi kina kiyo.

⁴⁶ Nam dasi ana, «Ay ki ɓiiri ana, Ziinda hin lini a zira cen Lona. Agi hin mbuɗuɗ ki zira kulna ni nanage?»

⁴⁷ Yesu haɗ suuna hu Ziŋ Lonara tew tew. Muli suu li ɓivunna u suu haɗ gaɗta u suu ŋgolo suu fok suunana halam a cam kiyo.

⁴⁸ Asi ka fi dlara asi a lam u ndaɗtaɗi kay suuna halaŋ humum boy mamma jiviya.