Boy Ma Ayra Ma LUK Ɓiirimma 18 - Boy Lonana

Ndal boyna kay cara donora u sa kaɓakŋa

¹ Yesu tinisi ndal boyna ni ana asi joɓ Lona tew tew a loɓ ki dukgi.

² Nam dasi ɗaŋi ana, «Sa ma kaɓakŋa ha hu zi ma dew ka li ndaa Lonaɗi lay, ka vi vun saɗi lay.

³ Cara donora hu zi namma may mba egem tew tew a nam kaaɗ ii ɓak maɗna. Ndaɗ ana gami ii boy mamina ki u saan ma gonokka.

⁴ Ndaɗ mba funum tew tew, nam ka minɗi. Nam ka saa hurum ɗaŋi ana, An ka li van ndaa Lonaɗi lay, ka vi vun saɗi lay ni,

⁵ ca ndaɗta loɓon tan ɦay, an gaɗ ii dlaaɗta kiyo. Li ka naɗi ni, ndaɗ hin mbay na gak gak ɓeŋen yan kiyo.»

⁶ Yesu hin di hu ana, «Agi humugi boy ma vi sa ma co ma kaɓakŋa damma ɗaŋ,

⁷ Lona may ni ka njun u suu mam suu tii tasi egem tew tewna naɗi su? Nam vi yam a njunusira su?

⁸ An dagiya nam njun usi zak gaw. Na ni Goŋ Sanna hin mba ni, fi suu hurusi tini kamma kay ndaŋgara su?»

Ndal boyna kay sa ma Farisenna u sa ma vi taara

⁹ Yesu tin ndal boy namma na ni kay suu ɦiw wi tasi ana asi ni ɗegee fok Lona, hin pan ndarayasina lay na,

¹⁰ ana, «Suuna mba' sel hu Ziŋ Lonara a joɓomu. Maa dew ni ma Farisenna, ma hiŋŋa ni ma vi taara may.

¹¹ Ma Farisenna col ki kay tamu, ɓak ana, Lona an gaŋ deɓpa kay an ka ko suu hiŋŋa naɗi. Asi ni suu kulla, suu hal boyogina vi ndarayasina. An gaŋ deɓpa olo kay an ka ko sa ma vi taara wanna naɗira.

¹² Hu buu ma kiɗisiyana ni, an li laara hu yan mba', tlesuu an fasina halaŋŋi an ɦaŋsina yasi ki bel bel.

¹³ Sa vi taara col ha ki na day ndak ka a tli irim kolo huulonaɗi lay, ɗuɗ kom hurumu di ana, Lona, Bu Suuna, wan hawan aya, kay an ni sa cora.

¹⁴ An dagiya, sa namma hoŋ vo wanni mbuɗ ki ɗegee su ma Farisenna. Suu tli yasi kolona, hin hoŋ ki kaŋgaa. Suu ka tli yasi koloɗina, hin tuɗ ni foko.»

Yesu paɗ vunum ki kay kemba

¹⁵ Suuna mbaa gorkemba eg Yesu a nam baa kom kasiya. Suu haɗina yal suu mbaarasi ayna.

¹⁶ Yesu wasi li na ni, nam ana, «Mbaaran kemba ay egenu, doorosiɗi, kay Mul Lonara ni maŋ suu ko asi nana.

¹⁷ An dagi ha ni gasira, sa fi Mul Lonara li ka ko gogoona naɗini, nam ka kal huɗi.»

Sa ɦizina

¹⁸ Mul ma vi suu Juifna dew mba eg Yesu joɓom ana, «Sa ma haɗ suuna jivina, an li nana a fi iirira ka daɓ kiɗira ge?»

¹⁹ Yesu dam ana, «Aŋ yan sa jivina ni kay mege? Sa jivi kaɗi, Lona dew jivira ni namu.

²⁰ Aŋ wi gaɗta vi Lonara di ana, Aŋ li zoŋgi, ci maɗɗi, kulɗi, ka boy kay ndaraŋŋaɗi, tli yam buŋ u suŋ koloo.»

²¹ Sana hoŋom dira ana, «An vi gaɗ ndaɗta ay ni u goo tan day.»

²² Yesu hum na ɗaŋi dam ana, «Va ma dew maa ki uŋu. Tuɗ gus tlegeyeŋ ki halaŋ. Bege ndaɗta aŋ ɓorowoɗ ki maŋ suu wi hawra. Aŋ hin fi ɦizza ŋgolla ha kolo huulona. Ŋgoo daganda aŋ hin mbay unu.»

²³ Sana hum boy namma na ni, irim mbuɗ ɗussa, kayme nam ɦizi cocoo.

²⁴ Yesu wi ana irim mbuɗ ɗussa ni, nam di ana, «Loɓma kay suu ɦizina a kal hu Mul Lonara.

²⁵ Jamballa kal hu zul libirina ni loɓ ɦay, sa ɦizina a kal hu Mul Lonara loɓ su jamballa a kal hu zul libirina.»

²⁶ Suu humumma ɓak ana, «Ni sa hin suɗ kina ni gege?»

²⁷ Yesu hoŋosi dira ana, «Va ndak ka a li ko suu warnaɗina ii Lona ni ka loɓbi.»

²⁸ Piyer dam ana, «Aŋ hum haa, ami hin tlegeyemi ki na halaŋ a tuɗ uŋga.»

²⁹ Yesu dasi ana, «An dagi ni gasira, lini sana hin ziim ki wa may, caamba may, gorsemma may, somoyom may, goryom may ki kay Mul Lonara ni,

³⁰ hu cecemba lay ni nam hin fi ni su suu nam hinisi kina sem ŋgolo. Ha fokka nam hin fi iirira ka daɓ kiɗira olo.»

Yesu ɓak kay miɗ mamma u paɗ mamba kolora a yamba hindira

³¹ Yesu yow suu haɗi suu doogo yam mbana umu. Nam dasi ana, «Humugiya aygi tuɗuygi ha Yerusalem wanni, nda faɗ ki ni vun dla mayra suu jok vun Lona daɗ kay Goŋ Sanara.

³² Asi hin ɦam ki maŋ suu ɦawana, asi hin panamu, hin ŋgulumu, tofoɗom yoyona kam lay.

³³ Asi hin poŋomu, cam ki maɗna lay. Hu buu ma hindina nam hin paɗ ki kolo iiriya.»

³⁴ Suu haɗina hum dla ndaɗta kaɗi. U boy namma ki ŋgay irisiya. Asi ka wi u va ma Yesu ɓakasi kammaɗi.

Yesu mal ii sa dugina kiyo

³⁵ Yesu hin tok a kal hu zi Yerikona may ni sa dugina kak ki keŋ voɗta a cen suuna.

³⁶ Nam hum del suuna a jak tuɗta cocoo, nam joɓosi ana, «Ni dla mege?»

³⁷ Asi dam ana, «Yesu ma Nazaretna jakŋi namu.»

³⁸ Nam sawalla kolo ana, «Yesu Goŋ Davidna, wan hawan na wi ge.»

³⁹ Suu jak fokomma yalam ana, «Seŋ vunuŋu.» Nam jok um ha fok ni joki na ɗow ɗow ana, «Goŋ Davidna, wan hawan na wi ge.»

⁴⁰ Yesu col col ni ana asi mbaaramma aya. Sa dugina mba egem tokŋi, Yesu joɓom ana,

⁴¹ «Aŋ min ana an laŋŋi ana mege?» Nam hoŋom dira ana, «Mala Haɗta, malan irin kiyo.»

⁴² Yesu dam ana, «Iriŋ mbuɗ wiya. Huruŋ ma tini kanna suɗuŋ ki wa.»

⁴³ Na gaw ni irim mal ki gaw. Nam gi tam u Yesu geleɗ Lona. Suu molina wi dla ndaɗta na ni asi geleɗ Lona lay.