Boy Ma Ayra Ma LUK Ɓiirimma 16 - Boy Lonana

Ndal boyna kay sa ɓeŋ tlena kina

¹ Yesu di maŋ suu haɗi mamsina ana, «Sa ma begera dew tin sana a gusum tlegeyem kiyo. Suuna mba dam ana nam ka ɓeŋem tlegeyem kiyo.

² Sa ŋgol namma yam ay yi ni, dam ana, An hum boyna kaŋ na ni nanage? Aŋ van u tlena ay kiyo, aŋ ka a li a saan ma sunda oloɗi.

³ Sa sunda joɓ tam hurum ana, Saan ma ŋgolna hin dikin ki hu sunda wa ni, an hin li ni ana mege? Saɓakan ma horokŋa kaɗi may ni, an hin cen tlena ni, zolona hin canɗi su?

⁴ Haa, lini na ni, an hin wi dlara an hin a laɗta. Nam dikin ki wa ni suu a van varasina kaa.

⁵ Nam yi suu balna kasina ay ki dew dew halaŋ, di ma fok jewna ana, Balna kaŋŋi gage?

⁶ Nam hoŋom dira ana, Gegeli suu mbulna kan kis. Sa sunda ana, Aŋ gola ni bal maŋŋa, kak kaŋga zak, ɓii ana dok vadl.

⁷ Nam di maŋ ma hiŋŋa ana, Maŋŋa kaŋŋi gage? Nam ana suɓu wa blena kan kis kis vadl. Sa li sunda dam ana, Gola ni bal maŋŋa, ɓii ana kis kis fiɗi.

⁸ Mul ma vi sa li sunda co namma geleɗem kay mbeleŋŋa nam lammana. Kay suu kay ndaŋgarana li mbeleŋŋa duk ɦoŋ tasi u tlesuu vi ndarayasina su suu hu kiɗikkana.»

⁹ Yesu gi boy mamma fun daŋŋi ana, «An dagiya, vagi banara kogi u tlesuu agi fasi kay ndaŋgarana. Falira kogi kaɗaki wa ni, asi hin vagi ni hu zi ma ka daɓ kiɗina.

¹⁰ Sa ma ɗegee kay tlesuu ewna, ɗegee kay tlesuu ŋgolona ni na may. Sa ka ɗegee kay tlesuu ewnaɗina, ka ɗegee kay tlesuu ŋgolonaɗi ni na may.

¹¹ Agi li ay ka ɗegee u bas tlegeyegi suu kay ndaŋgaranaɗi ni, sa hin ɦizigi ɦizza gasira ni gege?

¹² Lini agi ay ka ɗegee u tlesuu vi ndaraginaɗi ni, sa hin ɦagi magisina ni gege?

¹³ «Sa sunda ndak ka a li sunda fok mulina mba'ɗi. Nam hin ma ki dew, li min ma hiŋŋa. Nam li ɗegee u ma dew ni hin noy ma hiŋŋa ki may. Agi ndak a sun Lona may gursura may na jakgi.»

Yesu di ki kay u boyna bolowo

¹⁴ Suu Farisenna hum boy namma ki halaŋ ɗaŋi, gijaŋ pan Yesu kay asi min gursura.

¹⁵ Yesu dasi ana, «Agi suu li tagi ɗegee ii suuna, Lona wagi hurugi kiyo. Kayme va suuna golom irisi ŋgolna, ii Lona ni ko va kaɗira na.

¹⁶ «Gaɗta vi Moiz u boy ma vi suu jok vun Lona daɓ ki ni kay Jaŋ ma mbus batemma. Tin ay hu li namma day ni, boy ma ayra hu Mul Lonara di ki maŋ suuna dew dew halaŋ, gege lay so tam ki a kal hu mul ndaɗta.

¹⁷ Boy ma goo hu gaɗta ewna, huulona u ndaŋgara hin daɓ ki ni jewem lay, hinim bay daɓa.

¹⁸ «Lini gegelay bus caamba ki wa, ɗumba daŋga um wani, nam li u ndaɗta ni zoŋga. Sa ma vi cara njufuɗ busuɗ ay kira li ni zoŋga u ndaɗ may.»

Sa begera u Lazar

¹⁹ «Sana dew ni genewra kom cocoo. Nam cuk tammi baraw ma jivi ma gus loɓma. Nam kaki u furira tew tew, ti ti ma jivina lay.

²⁰ Sa ma hahawra yam ana Lazar, tam halaŋ ki egem ha mbilna. Nam buu ni fun zira vi sa namma.

²¹ Nam min a ti tlesuu yak ki kaŋga ko mulnana. Diginina mba tanɗam ii mbilim ma egemma.

²² Sa hahawra miɗ miɗ ni suu sunda huulona mba tlam ha kolo eg Abraham. Sa begera hin miɗ miɗ ni, asi pam may.

²³ Sa begera wi hawra coco duk suu miɗina. Nam tli irim koloo ni, wi Abraham ha day u Lazar egemu.

²⁴ Nam sawalla ha kolo ana, Bun Abraham, wan hahawan aya. Sun Lazar ay sun ni, nam kal kom ay duk yona, mba laɓan sininu. An duk kura wanni, wi hawra cocowaɗi.

²⁵ Abraham dam ana, Goonna, humuŋ gaŋ kay tlesuu aŋ fasi ay kay ndaŋgara cocona may. Lazar wi hawra ay coco may. Cecemi nam fi ni dlara ɗigil irimba may. Aŋ fi wi hawra coco may.

²⁶ Olo, zul ŋgolla ki duk ɦoŋoygiya, suu col ha tani a tuɗ ha egegina ka ndakgi may. Agi col ay tanna a mbay egemira ka a ndakgi may.

²⁷ Sa begera di ana, An kalaŋŋi kaliya, bunu, aŋ sun Lazar ha hu ziŋ bunna.

²⁸ Gorsenna ha vadl, nam i neesi ha ki kasiya asi mbay hu li wi hawraɗi.

²⁹ Abraham hoŋom dira ana, Gorseŋŋa Moiz u suu jok vun Lona ha egesi a neesira, asi humusi vunusiya.

³⁰ Nam dam ana, Ni ka ndakgi. Bun Abraham, lini sa ma ha duk suu miɗina hoŋ fasiya ni, asi hin jok dlaasira ki zeɗ.

³¹ Abraham hoŋom dira ana, Lini asi ka min a hum vun Moiz u suu jok vun Lonaɗi ni, lini sa miɗi hoŋ ha ki dukusi iiri lay ni, asi ka hin a jok hurusi kiɗi lay.»