Boy Ma Ayra Ma LUK Ɓiirimma 15 - Boy Lonana

Ndal boyna kay timiira viɗ ki hin faɗta

¹ Suu vi taara u suu cona ɦuɗ tasi eg Yesu a humum boy mamma.

² Suu Farisenna u suu wi magaara gaɗta hosok duk tasi ana, «Sa namma vi suu cona varam ti funa u asi lay.»

³ Nam Yesu tinisi ndal boyna ana,

⁴ «Lini sa ma dukugi u timigiina kom kis, lini taa dew viɗ ki wa ni nam ka hin suu dok dleeŋe yam dleeŋe suu wanna ka um tani, tuɗ hal ta dewra ay tuɗi su?

⁵ Nam faɗ ay wa ni, hurum furi cocoo. Nam tlaɗ ay kelemu.

⁶ Nam hin mbay voo, yi ndarayam suu zina ay egemu, dasi ana, An fi timii manda viɗ kira ay wa.

⁷ An dagi ha ni na may sa dew ma li corana hin coomba ki wa ni, suu kolo huulonna hin furi kammi su suu dok dleeŋe yam dleeŋe suu hurusi jivina.»

Ndal boyna kay begera viɗ ki hin faɗta

⁸ «Ɗowba lini cara sili maɗta koɗ doogo lini ta dewra viɗ ki wa ni, ndaɗ ka do kura koɗ do ni, too hu ziiɗ ki halaɗ gak gak faɗɗi su?

⁹ Ndaɗ faɗ wa ɗaŋŋi, yi banayaɗna u heneyeɗna, hin dasi ana, Furiyugi u an lay, an fi sili manda viɗ ki ginda wa.

¹⁰ An dagiya, suu sunda huulona hin furi kay sa co ma hin coomba kina ni na may.»

Ndal boyna kay goo ma viɗ ki hin famma

¹¹ Yesu di ana, «Sana u goryom kom mba'.

¹² Ma goona di bum ana, Aŋ ɦan ii tlegeyen ki gaw. Bum ɓorowosi tlegeyem ki u wayamma may.

¹³ Buu dagan ca ni ma goona gus tlegeyem ki gusni, tuɗ u gursu mamba hu mbassa dayra. Nam ɓeŋ gursu mam ndaɗta ki halaŋ.

¹⁴ Mayra hin ndi hu zi namma, va ti ka oloɗi.

¹⁵ Nam i kal li sunda fok sa maa dew. Nam tinim a taa kosoŋŋa.

¹⁶ Nam hal a ti tlesuu kosoŋŋa tasina, sa ka ɦamsinaɗi lay.

¹⁷ Nam gijaŋ saa kay dlaamba ana, Suu li sunda vi bunna ha ti funa, an ci tan ki u mayra tani kay mege?

¹⁸ An min holoŋ vi bun balamanu. An hin dam ana, Bunu, an li cora eg Lona may egeŋ may.

¹⁹ An ka min ana aŋ golon ko goroŋŋa na oloɗi. Golon ni ko suu li sunda varaŋŋa ɦawa na.»

²⁰ Nam hoŋ ay a nda vi bumba gaw. «Nam ay ki eg zina day tu ni, bum wam ay na ni, nam mbuɗ irim hahaw cocoo. Bum ndi liŋŋa ha a ŋgafamba gaw, mboɗom hurumu.

²¹ Goona di bum ana, Bunu, an li cora eg Lona may egeŋ may. An ndak ka a aŋ a golon a goroŋŋa oloɗi.

²² Bum di maŋ suu lam sun mamba ana, Yowogi baraw ma jivina ay toŋgo zak. Cukumma tamu, kalam walakka kay komu, cukum tuɓuruna sem may.

²³ Vagi mbutl ma aygi ɗooromma aya, ŋgaɗamu, taygi fu furira.

²⁴ Kayme goron ma namma ay ki gin ni miɗiya, nam dliɗ ki wa. Nam ay ki gin ni viɗiya, an fam wa.» Luu ma furira gi jaŋŋa ni na gaw.

²⁵ «Asi luu na ni, gorom ma ŋgolna ay ki hu senena, nam a hoŋ ay vora wanni, mba ŋgoo zin na tokŋi, hum timma tii may, suuna luu may.

²⁶ Nam yi sa ma li sun ma ay dew, joɓom ana, Va li nana ni mege?»

²⁷ Sa sunda hoŋom dira ana, Wayaŋŋa mba vo wa. Buŋ ci mbutl ma aygi ɗooromma ki wa, kay goromma mba tewem ki vo wa.

²⁸ Nam ma ŋgolna ɓeŋ hurum ki gaw, ka a kal vo oloɗi. Nam bum kal ay ki mba tayam ana nam kal ay voo.

²⁹ Nam goona hoŋ dira maŋ bum ana, Basara ki ni ŋgolo, an laŋ sunda. An gaŋ vunuŋ ka ki dewɗi lay. Aŋ ɦan ɦu ka na dew ana an ti fu furi u banayannara kaɗi lay.

³⁰ Goroŋ ma tin yam ay ki na, basaŋ bege maŋga ay ki u gawlaŋina, mba karam may, aŋ ŋgaɗam mbutl ma aygi ɗooromma ki na gaw ni nanage?

³¹ Bum hoŋom dira ana, «Goonna, aŋ tew tew ni egenu, tlesuu konna halaŋŋi maŋ lay.

³² Ay ndak a luu luu ma furira kayme wayaŋŋa gin ay ki ni ko miɗira na, cecemi nam mbuɗ ki ni iiriya. Nam ay ki ni baaya, cecemi an fam wa.»