Boy Ma Ayra Ma LUK Ɓiirimma 12 - Boy Lonana

Li tagi jivi ko mbambara vi suu Farisenna

¹ Hu li namma suuna moli bolow cocoo ɦeɓ eg tasi ko lina kaɗira. Yesu di suu haɗi mamsina ana, «Gol tagi jivi ko kuffa vi suu Farisenna, ni kay mbamba masira.

² Va yam ki baarina suuna hin wam kiyo. Boy ma ki ŋgayna um hin gi ki lay.

³ Dlara agi daɗ duk njeŋgerara hin hum ki faaliya. Va ma agi hosok kam kalafna hin hum ki kay yam zira.»

Li ndaana ko gege?

⁴ «An dagi ni magi agi banayanna, lagi ndaana ko suu ci mbalatara ɦawa hol ka a li va daŋ ginaɗi.

⁵ An takagi sa ma agi a li ndaana komma, lagi ndaana ko Lona na ɗow. Nammi sa ma ci mbalatara lay, gi iirira ki duk kura layna. Gasi nammi sa ma agi a li ndaana komma.

⁶ «Agi gus layɦina vadl ni suŋgu mba'ɗi su? Taa dew ka a maa ki ko Lonaɗi.

⁷ Agi may ni tlimiɗ yagi lay ni ki ndumiya. Lagi ndaaɗi, sa dewna ŋgol su layɦi suu bolowna.»

Di ki kay Yesu fok suuna

⁸ «Sa ma di ki kan fok suuna ana nammi mannana Goŋ Sanna hin di ki kam fok suu sunda huulona ana nammi mamma may.

⁹ Sa ma tin vunum kan fok suuna ana nam ka wanɗina, Goŋ Sanna hin tin vunum kam fok suu sunda huulona ana nam ka wambi may.

¹⁰ «Sa ɓak co kay Goŋ Sanna coomba hin daɓ kiyo. Sa ɓak co kay Musuk Lonara, coomba ka daɓ kiɗi a fafatɗa.

¹¹ «Asi yowogi ha hu Zira Tokka fok suu ɓakŋa u suu ŋgolona wani lagi nda ana agi hin ndaa di ni ana megeraɗi.

¹² Musuk Lonara hin haɗagi va ma agi a damma ni ndaɗu.»

Ndal boyna kay sa ma ɦizi ma giniŋŋa

¹³ San dew duk suu molina di Yesu ana, «Mala Haɗta di maŋ wayanna nam ɓorowomi tlesuu bumi hinimsina kana kiyo.»

¹⁴ Yesu hoŋom dira ana, «Bananna sa ma tinin a kaɓakŋa a ɓorowogi tlen ni gege?»

¹⁵ Nam hin di suuna halaŋ ana, «Gologi tagi jivi kay godlom begera. Lini sana bege coco lay ka kak iirira ni kay ndaɗtaɗi.»

¹⁶ Yesu tin ndal boyna ana, «Sa ɦizina dew sene mamma jivim wana cocoo.

¹⁷ Nam saa hurumu, ɓak tam ana, An lini ana mege? Li ma an a cuk tlegeyen huna kaɗi.

¹⁸ Nam ana, Va an a lamma ni, an to vee manna ki to ni, min ma ŋgolna. Ma namma an hin tok tlegeyen hurum halaŋ gaw.

¹⁹ An hin di tan ana, An li tlena ŋgolo asi ndakan a li basara cocoo, koɗ tanu. An hin ti may, ci may, furi ɗaŋ.

²⁰ Lona dam ana, Aŋ sa ma giniŋ namma karam njeŋge wanni aŋ ka kak iiri oloɗi. Tlesuu aŋ tokosi asina hin hinisi ni maŋ gege?»

²¹ Yesu gi boy mamma fun ɗaŋi ana, «Sa ma tok tlena kay tamma fok Lona ni nam ka bege koɗi.»

Tin huruŋ kay Lona

²² Yesu di suu haɗi mamsina ana, «Agi gola an dagiya, Vun dikigi ɓigigi kay tlesuu agi tasinaɗi, kay baraw ma agi cukum taginaɗi lay.

²³ Iirira ni ŋgol su ti ma funuginaɗi su? Tliw tagi ni ŋgol su baraw ma cuk taginaɗi su?

²⁴ Gologi gawgawna pii kolo gige, nam ka zaa wa a feɗembi, ka cuk wa hu veeɗi lay. Lona ɦasi tina funusi ni nambi su? Agi ni, su layaginaɗi su?

²⁵ Sa dukugi ma ɦuɗ buu mamma fokom kay tamma ni gege?

²⁶ Lini agi ka a ndak a li va kay tlesuu gorinaɗi ni hin haɗ hurugi kay tlesuu hiŋŋa ni amege?

²⁷ Gologi eg ɓo tlena hu senena, ɓo tle asina ka li sunɗi lay, ka cil barawɗi lay. An dagiya, Salomon tlena kom coco lay ni, baraw mamma jivim tew ka u ɓo tle asinaɗi lay.

²⁸ Tlesuu kura hin ŋgalasi kina, Lona lasi ɓoosi jivi coco lay. Agi suu hurugi ka tini kay Lona ŋgolɗina, nam lagi ni jivi su ɓo tle asinaɗi su?

²⁹ Viɗ ii tagi a hal tlesuu agi tasina u suu agi casina na gak gakgi.

³⁰ Suu ka goɓ Lonaɗina hal tle asina gak gakŋi asiya. Agi may ni Bugi wi tlesuu agi minisina halaŋ ni namu.

³¹ Halagi Mul Lonara tlesuu hiŋŋa Lona hin ɦagisina.

Begera kolo huulonara

³² «Lagi ndaaɗi, yoori suu ewna. Bugi hurum min a ɦagi mulla ni nam daŋ may.

³³ Gusugi tlegeyegi kiyo, ɓorowogi begera agi faɗ u asira ki maŋ suu hawra. Minigi begera kolo huulonara. Hu li namma bege ndaɗta ka ba kiɗi, sa kul ka kuluɗɗi lay, toɓo ka taɗɗi lay.

³⁴ Lii bege maŋga huna, huruŋ tini ni hu may.

Suu juɓ u sun masira jivina

³⁵ «Lagi tagi jiviya, njunugi hurugiya maaɗi, doogi pindilla kogiya.

³⁶ Lagi ko ndal suu juɓ vok mul masina nam ay luuna nam mba daɓ vun grekŋa.

³⁷ Furira kay suu asina kay mul masina mba fasi iiriya. An dagi ha ni gasira nam u tamba hin min tamu ɦasi li kakŋa, tuɗ yow funa aya, cukusina fokosiya.

³⁸ Lini nam mbay ni duk ŋgikka lay, ŋgarapii lay, ni mba fasi ni iiri lay, asi furiya.

³⁹ Humugi dla ndaɗta ha ki jiviya, lini malaŋ zina wi li ma sa kulna mba kulumma ni, nam ka hinim a kal um voɗi.

⁴⁰ Minigi tagi jiviya, Goŋ Sanna hin mba ni hu faɗta agi ka saa kambira.»

Sa li sun mamba jivina u ma ka li mamba jiviɗina

⁴¹ Piyer di Yesu ana, «Bu Suuna aŋ tin ndal boy namma ni mami doy hol ɗowba maŋ suuna bel su?»

⁴² Yesu hoŋ dira ana, «Sa li sun mamba jivi yalaɗ irimma ni gege? Ni sa bu ziimma ɦam tlesuu hu ziimma kom halaŋ, tinim a nam ɓorow tina maŋ ndarayamma mayna.

⁴³ Sa namma bu zina mba fam fun sun mamba wa ni, furira ka kamu.

⁴⁴ An dagi ni gasira bu ziimma hin hinim tlena halaŋ komu.

⁴⁵ Lini sa li sunda namma saa hurum wa ana, malanna ka a mba vo zakgi, nam gijaŋ poŋ ndarayam suu li sunda may, ti funa ki may, ci summa guruɗ tam ki may.

⁴⁶ Na daŋŋi malamma hoŋ ay ni, ka fammi hu buu ma nam ka a wambina, hu lerra nam ka saa kaɗɗina. Nam vamu, gam daŋgayna, dikim ha ki duk suu cona.

⁴⁷ «Sa sun ma wi dlara malamma miniɗta nam ka min a laɗɗira, sa namma asi waɗam cocoo.

⁴⁸ Olo ni sa ma sun ma ka wi dlara malamma miniɗtaɗina, nam li dlara u min mamba wa ni, asi ka poŋom ŋgolɗi. Sa ma ɦam vana kom ŋgolna, hin joɓommi ŋgol may. Sa ma tinim kay tlena ŋgolna, hin joɓommi suwa.»

Yesu njaɗ kay ɓorow ira

⁴⁹ «An mba ni a gi kura kay ndaŋgara ko ndaɗ lini dooy gaw.

⁵⁰ An a fi batemma wi haw manda vunuɗ a faɗ kira ni saɓage?

⁵¹ Agi saa ana an mba ni heɓpa hu duliyara na su? Ҥawaa, an mba ni a ɓorow ira.

⁵² Cem wanda ni suu u deeresi vadlna suu hindi u tasi li cora eg suu mbana, suu mbana li cora eg suu hindina may.

⁵³ Asi hin ɓorow kiyo, buna li cora eg goromma, goona li cora eg bum may. Sura li cora eg goroɗta, goora li cora eg suɗ may. Su goona li cora eg caata, cara li cora eg kunuɗta may.»

Wi dlara ŋga lina kiyo

⁵⁴ Yesu di maŋ suu molina anaba, «Agi wagi ɗugulla tin ay u maɗiina wa ni, agi di ana, Lona hin siya. Nam hin si may.

⁵⁵ Semeɗna li hoŋ irim daliya ni agi ana, Lina karam zamali, nam hin li may.

⁵⁶ Agi suu hurugi mbambana, agi wi yal ma ŋga tlesuu kolo duk lonna u suu kay ndaŋgarana may ni, agi ka hum u dlara li cecemba kiɗi ni nanage?

Gi ii dlara ki u sa aŋ ɓak u namma ki jewe

⁵⁷ «Agi ka gi ii dlaagira duk tagi u dlara agi laɗ ɗegeeraɗi ni amege?

⁵⁸ Lini sa yakaŋ wa a tuɗuŋ ki fun ɓakŋa ni, gagi ii dlaagira ha ki voɗ gaw. Li ka naɗi ni, nam ɦaŋ maŋ suu kaɓakŋa, asi ɦaŋ maŋ asgaana, asgaana gaŋ daŋgayna.

⁵⁹ An daŋŋi gasi, Aŋ ka kal ki bunsu bay warak dlara kaŋga kiɗi.»